Dual PanelKidun
1Manah titiange kabekin antuk kruna-kruna sane becik, rikala titiang ngawi kidunge puniki pabuat ida sang prabu. Bungut titiange bek antuk sloka waluya sakadi sang pangawi sane pradnyan.
2Palungguh iratu anak sane pinih bagus ring pantaran manusane, palungguh iratu anak sane pascad mabaos. Ida Sang Hyang Widi Wasa tan mari ngamertanin iratu.
3Duh ratu sang prabu sane maha wisesa, rarisang sunglit pedang druene. Palungguh iratu maraga agung tur luih.
4Rarisang lumampah sajeroning kaluihan buat molih kamenangan, nindihin kapatutan miwah kadilan. Kakuatan palungguh iratu jaga ngawinang iratu molih kamenangan sane ageng.
5Muncuk panah iratune lanying pisan. Muncuk panahe punika nuek ulun atin meseh-meseh iratune. Parabangsane pada bah malingeb ring buk padan palungguh iratu.
6Kaprabon sane kapaicayang antuk Ida Sang Hyang Widi Wasa ring iratu jaga langgeng ngantos salami-laminipun. Palungguh iratu jaga mrentah kaulan iratune saha adil.
7Palungguh iratu ledang ring paindikan sane patut tur bendu ring paindikan sane corah. Punika awinannya Ida Sang Hyang Widi Wasa, Widin iratune, sampun nyelik iratu, tur sampun mriokang kaliangan sane maweweh-weweh ring iratu, bandingang ring sang prabu sane lianan.
8Ambun wewangen mur miwah cendana nglikub busanan palungguh iratu. Suaran tetabuhane ngawinang kayun iratune gargita ring puri sane kapayasin antuk danta.
9Ring pantaran istri-istrine sane ring purin iratune, wenten putri-putrin sang prabu, tur ring tengen singasanan iratune ngadeg sang pramesuari, sane ngrangsuk busana mas-masan sarwa mule.
10Duh ratu sang pramesuari, pirengangja atur titiange, tur laliangja kaula miwah parasemeton iratune.
11Kaayuan iratune jaga ngawinang sang prabu kasemaran ring iratu. Ida makadados gustin iratune, duaning punika iratu patut sairing ring ida.
12Rakyate ring Tirus jaga ngaturang aturan ring iratu, tur jadmane sane sugih-sugih jaga mamanah ngalap pakayunan iratune.
13Ida sang pramesuari wenten ring puri. Ida kalintang ayu apekik. Busanan idane kakardi antuk benang mas.
14Sajeroning ngrangsuk busana manca warna, ida katuntun ka ajeng ida sang prabu, kairing antuk parapanyeroan idane. Parapanyeroane punika taler katurang ring ida sang prabu.
15Antuk pakayunan sane bingar tur bungah sang pramesuari miwah parapanyeroan idane raris ngranjing ka purin ida sang prabu.
16Duh ratu, ratun titiange, dumadak iratu akeh madue putra lanang buat ngentosin paraleluur iratune madeg ratu, tur iratu jaga nadosang ida mrentah sakuub jagate sami.
17Kidung titiange jaga ngluihang palungguh iratu turun-temurun, tur jadmane makasami jaga ngluihang palungguh iratu salami-laminipun.