Dual PanelPanga
1Duh Ratu Sang Hyang Widi Wasa, suecaninja titiang, malantaran sih pasuecan Palungguh IRatu sane nenten rered-rered. Masrana sih pasuecan Palungguh IRatu sane ageng, ampuhangja dosa-dosan titiange!
2Anyudangja sakancan kacorahan titiange, tur dadosangja titiang suci saking dosan titiange!
3Titiang marasa ring kiwangan-kiwangan titiange, tur titiang setata rumasa ring dosa-dosan titiange.
4Titiang sampun madosa pamantuka ring Palungguh IRatu, inggih wantah ring Palungguh IRatu kewanten, tur titiang sampun nglaksanayang paindikan sane kabaos corah antuk Palungguh IRatu. Duaning punika Palungguh IRatu nepasin titiang, tur Palungguh IRatu adil sajeroning nyisipang titiang.
5Titiang sampun madewek corah ngawit saking wau lekad. Ngawit saking wau lekad titiang sampun kabekin antuk dosa.
6Palungguh IRatu ngarsayang kajujuran miwah kapatutan. Bekinja manah titiange antuk kawicaksanaan Palungguh IRatune.
7Kaonangja dosan titiange, sinah titiang jaga suci. Umbahja titiang sinah titiang jaga putihan bandingang ring saljune.
8Lugrainja titiang miragi suara kaliangan miwah kabungahan, yadiastu Palungguh IRatu sampun ngelung tur ngenyagang titiang, titiang jaga malih rumasa bagia.
9Peremangja pangaksian Palungguh IRatune marep ring dosa-dosan titiange, tur ampuhangja sakancan kacorahan titiange.
10Duh Ratu Sang Hyang Widi Wasa, rarisangja makarya manah sane anyar ring dewek titiange, tur daginginja roh sane anyar sane tansah astiti bakti.
11Sampunangja titiang entunganga saking ayun Palungguh IRatu. Sampunangja ambila Roh Palungguh IRatu sane suci saking padewekan titiange.
12Icenja titiang malih kaliangan sane rauh saking karahayuan paican Palungguh IRatu, tur dadosangja mangda titiang demen astiti bakti ring Palungguh IRatu.
13Sasampune punika titiang jaga ngurukang pituduh-pituduh Palungguh IRatu ring parajadmane sane madosa, tur ipun jaga mabalik tangkil ka ayun Palungguh IRatu.
14Duh Ratu Sang Hyang Widi Wasa, agemja urip titiang, tur rahayuangja titiang, sinah titiang saking liang jagi nglumbrahang kadilan Palungguh IRatu.
15Duh Ratu Sang Panembahan, tulunginja titiang mabaos, sinah titiang jaga muji Palungguh IRatu.
16Palungguh IRatu nenten ngarsayang aturan. Yadianja titiang ngaturang aturan, Palungguh IRatu nenten ledang ring aturan sane maborbor.
17Duh Ratu Sang Hyang Widi Wasa, aturan titiange punika wantah manah sane alap asor. Palungguh IRatu nenten jaga nulak manah sane alap asor miwah sane rumasa pariselsel.
18Duh Ratu Sang Hyang Widi Wasa, suecaninja Gunung Sione tur tulunginja ipun, wangunja malih tembok-tembok kota Yerusaleme.
19Irika Palungguh IRatu jagi rumasa ledang ring kayun malantaran aturan sane patut miwah antuk aturan titiange sane maborbor. Samaliha makudang-kudang banteng jaga katurang ring pamorboran aturan Palungguh IRatune.