Dual PanelPanga
1Duh Ratu Sang Hyang Widi Wasa, Palungguh IRatu sampun nulak tur ngaonang titiang. Palungguh IRatu sampun duka ring titiang. Nanging sane mangkin ledang Palungguh IRatu mawali ring titiang.
2Palungguh IRatu sampun ngawinang jagate magejeran, tur Palungguh IRatu nyibak jagate punika. Sane mangkin warasangja tatun ipune, santukan ipun sampun sagsag.
3Palungguh IRatu sampun ngawinang kaulan Palungguh IRatu nandang sangsara banget pisan. Titiang mamargi srayang-sruyung milehan sakadi rikala titiang punyah.
4Palungguh IRatu sampun mapakeling ring jadmane sane ajerih ring Palungguh IRatu, mangda ipun prasida luput saking pasisip.
5Luputangja titiang antuk kawisesan Palungguh IRatune. Daginginja pinunas titiange, mangda kaula sasayangan Palungguh IRatune prasida rahayu.
6Saking genah Idane sane suci, Ida Sang Hyang Widi Wasa sampun masabda sapuniki: “Sajeroning kamenangan, Ulun lakar ngadum kota Sikeme, tur ngadumang Lebak Sukote teken kaulan Ulune.
7Gilead ento gelah Ulun aketo masih Manasene. Epraim dadi tetopong Ulune tur Yehuda dadi tungked kagungan Ulune.
8Nanging Moab lakar anggon Ulun dadi pabasehan Ulune, tur Edom lakar dadi tongos ngentungang sandal Ulune, makadadi tanda mungguing ia dadi duen Ulune. Apake wong Pilistine ngaden ibanne nyidayang menang tur masuryak-suryak nglawan Ulun?”
9Duh Ratu Sang Hyang Widi Wasa, sapasirake jaga ngajak titiang ka kota sane maserung antuk benteng? Sapasirake sane jaga nuntun titiang ka Edom?
10Punapike sawiakti Palungguh IRatu nulak titiang? Punapike Palungguh IRatu nenten jaga sareng-sareng mamargi medal nyarengin wadua balan titiange?
11Tulunginja titiang nglawan mesehe punika. Pitulungan manusane nenten wenten pikenohipun.
12Yening Ida Sang Hyang Widi Wasa ngabih titiang, titiang jaga menang. Ida sane jaga ngaonang meseh-meseh titiange.