Dual PanelPanga
1Duh Ratu Sang Hyang Widi Wasa, Palungguh IRatu sampun sih sueca ring jagat druene, tur Palungguh IRatu sampun ngawinang wong Israele malih gemuh landuh.
2Palungguh IRatu sampun ngampurayang dosa-dosan kaulan Palungguh IRatune, tur ngaksamayang sakatahing kiwangan ipune.
3Palungguh IRatu sampun wusan duka ring ipun, tur sampun ngurungang pidukan Palungguh IRatune sane ngendih murub.
4Duh Ratu Sang Hyang Widi Wasa, juru rahayun titiange, waliangja kawentenan titiange sakadi jati mula tur wusanja Palungguh IRatu duka ring titiang!
5Punapike Palungguh IRatu jaga duka ngantos salami-laminipun ring titiang? Punapike pidukan Palungguh IRatune nenten jaga rered?
6Dadosangja mangda titiang malih siteng, tur titiang parakaula druene jaga muji Palungguh IRatu.
7Duh Ratu Sang Hyang Widi Wasa, sinahangja ring titiang sih pasuecan Palungguh IRatune sane nenten rered-rered, tur paicayangja ring titiang pitulungan sane ngawinang titiang rahayu.
8Titiang jaga miragiang paindikan sane kapangandikayang antuk Ida Sang Hyang Widi Wasa. Ida nyanjiang dame ring titiang kaulan Idane, yening titiang nenten mawali nglaksanayang paindikan sane nambet.
9Sujatinipun Ida sampun sayaga jaga ngrahayuang jadmane sane ngluihang Ida, tur teja wedanan Idane sane ngawinang rahayu punika jaga manggeh wenten ring panegaran iragane.
10Sih kapitresnane miwah kasatiane jaga matemu, tur kadilan miwah damene jaga saling gelut.
11Subaktine jaga tumbuh ring jagate, tur kadilan Ida Sang Hyang Widi Wasa jaga macingak saking suargan.
12Ida Sang Hyang Widi Wasa jaga ngawinang iraga gemuh landuh, tur tanah iragane jaga muponin pamupon sane katah.
13Kadilane jaga mamargi ring ajeng Ida Sang Hyang Widi Wasa, tur nyawisang margi pabuat Ida.