Dual PanelIndik
1“Ring jagat sane jaga kapaicayang ring semeton antuk Ida Sang Hyang Widi Wasa, Widin semetone, yening pet wenten anak padem ring pategalan, tur semeton tan uning ring anak sane mademang ipun,
2parapamimpin miwah hakim-hakim semetone patut medal tur nyikut doh genah sawane punika klawan asing-asing kota sane nampek, sane wenten ring kiwa tengenipune.
3Parapamimpin kotane sane pinih nampek saking genah sawane patut milih godel banteng asiki, sane durung naenin kanggen makarya.
4Parapamimpin kotane punika patut makta godele punika ka sisin tukade sane nenten naenin pegat toyanipune, tur sane tanahipune durung naenin katekapin, wiadin katandurin. Irika baong godele punika patut kaelungang.
5Parapandita suku Lewine taler patut sareng lunga mrika, santukan dane sane patut nepasin saananing wicara sane ngeniang indik kawirosan. Ida Sang Hyang Widi Wasa, Widin semetone sampun nyelik dane, buat ngancangin Ida miwah buat ngucapang merta masrana parab Idane.
6Sasampune punika sakancan pamimpin sane saking kotane sane paling nampeka saking genah sang padem punika, patut masehin tangannyane ring duur godele punika,
7sarwi maucap-ucap sapuniki: ‘Titiang sareng sami nenten wenten ngamademang jadmane punika tur titiang nenten uning sapasira sane ngamademang ipun.
8Duh Ratu Sang Hyang Widi Wasa, ampurayang kaula druene bangsa Israel, sane sampun bebasang Palungguh IRatu saking Mesir. Ampurayangja titiang, tur sampunangja titiang kapitegenin patin jadmane sane tan padosa punika.’
9Dadosipun malantaran semeton ngamargiang pituduh Ida Sang Hyang Widi Wasa, semeton nenten pacang kapetegenin patin anake sane padem punika.”
Indik
10“Yening Ida Sang Hyang Widi Wasa, Widin semetone mapaica kamenangan ring payudan tur semeton molih tawanan,
11saking pantaranipune semeton dados milih anak luh sane jegeg sane senengin semeton, sane jaga anggen semeton rabi.
12Ajakja ipun ka umah semetone. Tur irika ipun patut ngetep bok miwah kukunipune,
13miwah ngesehin panganggenipune. Ipun patut nongos ring umah semetone. Irika ipun mangelingin meme bapanipune sane padem asasih suenipun. Sasampune punika, semeton dados nganten ngajak ipun.
14Benjangan yen semeton nenten kantun seneng ring ipun, semeton patut mebasang ipun. Semeton nenten dados nganggep miwah ngadol ipun sakadi panjak. Santukan semeton sampun mamaksa matemu semara ring ipun.”
Indik
15“Menawita wenten anak maderbe somah kekalih tur makakalih nglekadang pianak muani-muani, nanging pianak sane paling kelih nenten lekad saking somah sane sayangang ipun.
16Rikala ipun mamanah ngedumang waris ring pianak-pianakipune, ipun tan patut mapilih kasih ring somahipune sane sayangang ipun malantaran ipun ngwehin pianakipune, duman sane patut katampi antuk pianak sane pinih keliha.
17Pianakipune muani sane pinih keliha patut wehin ipun duman kalih bagian saking pagelahanipune, yadian pianakipune punika nenten lekad saking somah sane sayangang ipun. Anake punika patut ngamanggehang tegak pianakipune sane paling keliha, tur ngwehin ipun duman sane patut dados dumanipune.”
Indik
18“Menawita wenten anak sane maderbe pianak muani sane bengkung tur duraka, sane nenten nyak ngidepang munyin meme bapanipune, yadiastu ipun sampun kukum.
19Meme bapanipune patut ngajak pianakipune ka ajeng parapamimpin kota genahipune mumah, tur irika pianakipune mangda katepasin.
20Wong tuanipune patut matur ring parapamimpin kotane sapuniki: ‘Pianak tiange puniki kalintang bengkung, samaliha duraka tur nenten nyak ngidepang munyin tiange. Ipun mamotoh, mamiut miwah mamunyah.’
21Irika sawatek wong kotane punika patut ngencurin pianakipune punika antuk batu kantos padem. Malantaran punika semeton jaga ngampuhang kajaatane punika. Sawatek wong Israele pacang miragi indike punika tur pacang pada ajerih.”
Pidab
22“Yening wenten anak sane sampun kukum mati malantaran laksananipune sane jaat, tur sawanipune magantung ring tiang gantungane,
23sawanipune punika sampunang banggayanga nginep irika. Sawane punika patut katanem ring rahinane punika ugi. Santukan sawa sane magantung ring tiang gantungane ngrauhang temah Ida Sang Hyang Widi Wasa marep ring jagate. Tanemja sawane punika, mangda sampunang semeton ngletehin jagat sane kapaicayang ring semeton, antuk Ida Sang Hyang Widi Wasa, Widin semetone.