Dual PanelKidun
1Ida Sang Hyang Widi Wasa ngandikayang tiang ngidungang kidung kaduhkitan pabuat pararatun Israele makakalih, kadi asapuniki:
2“Memen kitane tan bina buka singane luh. Ia miara panakne di pantaran singa-singane muani ane galak.
3Ia miara panakne tur urukanga maboros. Panakne ento laut bisa nyarap manusa.
4Bangsa-bangsane pada ningeh unduknyane totonan, laut pada masangin jeet di bangbange. Ditu laut ia paida aji sangket, tumuli abana ka Mesir.
5Memenne ngantiang kanti tusing ada ane buin nyandang ajap-ajapa. Sasubane keto ia laut miara panakne ane lenan. Panakne ento laut dadi singa ane galak.
6Sasubane panakne ento gede ia nglalana ajaka singa-singane ane lenan. Ia masih mlajah maboros tur bisa nyarap jlema.
7Ia nguugang benteng-benteng muah kota-kota. Sabilang ia aung-aung, rakyate ane di gumine pada karesresan.
8Bangsa-bangsane pada mapunduh buat lakar nglawan ia. Rakyate pada teka uli milehan. Ia pada ngebatang jaring ane anggona maboros, laut ngejuk ia aji jeetne.
9Singane ento lantas wadahina krangkeng laut abana ka ajeng ida sang prabu di Babel. Ditu ia pangkenge, apanga munyinne tusing buin kadingehan di bukit-bukit Israele.
10Memen kitane waluya buka punyan anggure, ane mentik di sisin tukade. Sawireh ditu ada yeh, dadinne punyan anggure kakaput baan don muah buah.
11Carang-carangne pada siteng, tur sayan ngedenang kanti dadi tungked kaprabon sang prabu. Punyan anggure ento dadi tegeh pesan kanti nganteg sig ambune. Makejang anake nepukin ambate rob donne muah tegeh punyanne.
12Nanging ada anak pedih ane ngabut kanti kayang akahne, laut entunganga di tanahe. Angine ane uli kangin laut ngampehang kanti tuh. Carang-carangne makejang pada lung tur laut katunjel.
13Ane jani ia kapula di tegal melakanga, di gumine ane tuh ane tusing misi yeh.
14Bungkil punyan anggure ento dilap api, tur apine ento laut ngeseng carang-carang muah buahne. Carang-carangne tusing enu buin siteng, tur tusing buin dadi tungked kaprabon ida sang prabu.” Sapunika kidung kaduhkitan, sane patut kakidungang mawali-wali.