Dual Panel1Kristus bake tu vuzehi meedam dam laba vuusu im vameame faheme modiam dam busao dam oa, eho etei uba gagolo modem im nim uho aimale. Em laha Kristus bake tu vuzehi meedam dam laba vuusu im vameame faheme modiamda meida em am bak. Labi laha damat amu Kristus bake vabidume geàdaha di lam tau duzu aasuhet meedahada em am bak. Labi ba diamut Kristus labe Am feà bak lam Alat dam bake modi fi zeam bitom di abo um ee vousam di lam em laha vi tau ee vousamda meida em am bak. Eho labihamda nibe uba im nehasu gagolo mozo.
2Dam Kristus bake tu vuzehi meedam dam lam abo ubu uho vuusu im vameame faheme modiam dam lam uho busao damat iademe vou aasu vabiedale. Abo domba fi ho vou aasu vabiedamda labe aba aho am domba fi ho iademe vou aasu vabiedam bak lamti ulohona meedale. Uho lab vou aasu vabiedam bak lam a odohalehebeat tet meedamule. Abo Alat uba gagoho imot modemu uho gi ule neàt keàtedi meedale. Labi laha ame bak lam meedam di, “Ubu uho lab meedam bak lam gohali doi duana vam bak ehete,” lahame a vi ozome meedamule. Gi ubu uho amu lab ule neàt meedam bak lahasu meedale.
3Labi Alat uba gagu uho vuusum dam lam a bakda boehàdat meia tet ootedam bakti ulohona a meedamule. Gi iademe im neà bakta meedume damat fà vi aame ame baket vouhodase.
4Uho labi modemeam làhà uba Vou Aasu Vabiedamda Bisi Feàda Yesus abo Alat ba modi fi zeam bitomda lam lem di ame Da labe Aho uho lab meedam bak gohali Am feà bak lam fa uba modi vizi um ee laha vousam bak. Um ee lab vousai ahu adat iedi vou baedam bak lam ba setem vaba gi labaha bohu vuusda tame.
5Um dam gàhà lahasuhu dam oa, um laha uba vuusu im vameame faheme modiam dam labe im im lam aime uledi meedale. Labi laha um ahu a bisi it daetbadume ubu uho ozome meedam im laba ozome meedamule. Gi um dam totbaho labe ibi iho ozome meedam im laba ahu ladehebeat tau meedale. Alat Vameadaha Im Toedahana laba meit nehi toehena ehe labe eho uba labi gagoho bak. “Dam im ahu it daetbadam dam lam Alat faki mu odosdam dam am bak. Lahana dam im ahu ladehebeat meedam dam laba Alat aame ozahit deeli im neà bak modi esuiam dam am bak.”
6Labihàmu Ala abo im feàna meedam Alat modem labe Aba Aho gagoho im laba uho ahu ladehebeat uledi meedale. Uho labiham labe Alat Aba Aho fet ozoho digat feàda fuhuzobe um ee vousai fa feà damalem bak am bak.
7Uba faobekesi vou aasu vabiedam Alat modem labe uba modi ahu faidi vi ozomna ahebu vou le Ala bake ahate tom gagodume esule.
8Uba faki mu odosdamda Iblis labe aho gi singa fai labe aautedam labe godume na veeme àme setem bakti ulohona aho uba dalu um ve ubu uho amu Kristus bake tu vuzehi meedaha bak lam, “Fà vàhàdedase,” lahame uba modi am damalelo vou faodam bak ehe bak. Labihàmu uho um ahu it vou faovoi so ateme vou faodale. A gi daleàdi ahusobuli esdamule.
9Iblisit uba lem bak uho gi ubu uho Kristus bake lab tu vuzehi meedam bak labet keàtet ahate Iblis bake gut odosi meedale. Neham bak. Naat uba etei lab vabidume geàdam bak lam gi umota meedam vabak. Abo umti vahi Kristus bake tu vuzehi meedam dam totbaho abo bak iumti bak iumti ahebu laha ame baket meedam bak. Bak lam um ba biem vaba abo ozobohu bak.
10Ala abo dam ahebu ozahit deeli im neà bak modi esuidam Ala Am am bak. Labi laha Aho uba gagu fi hasi Am damalelo modemu Aho neha, “Uho Am adat Kristusti vou ali ahu vàmadem labe Aho uba modi Am feà bak abo setem biemna gi labaha bohu vuusdamna lam fa uba modi vizi, ‘Um abo feàte,’ lahame fa uba vou baedase,” lahame labi fet ozome esuhu Ala Am am bak. Labihasu meedam Alat modem labe uho bak niba esdam di naat uba teohet lab vabidume geàdamna lam nasi vaitoi neàdi afoezobe Aho ba um bitelo modem bak lam kehàm vaba um fa si vabededume vou duzu teudi laodoamsu ab modi neàbodelo modemam bak.
11Imo Dat bisi feàda Ahamo labaha feà bak bohu vuusdamda abo ba setem gikida laba vou baedase. Labihadase.
12Eho etei nib toedume oluhu sunit buuna nim ehemo toem kaio. Emti vahi im Boehàda Kristus bake tu vuzehi meedamda meida Silas labe aho eba tau toedume uba oluhu bak. Ame da Silas lam emti vou ali ahu ulohodesuhuda am bak. Em abo gi uba vabededume um ahu teudem bak ozome eho sunit nim toedume uba oluhu bak. Labi laha Alat iba ozahit deeli im neà bak modi esuidam bak lam, “Imbote,” laham bak lam um fota biem bake, “Fa vi ozobohudi fi gatedase,” laham bak laba ozome eho sunit nim toedume uba oluhu bak. Ame bak lam uho mahate tu vuzehi keàtedi meedale.
13Umti vahi Kristus bake tu vuzehi meedam dam abo Alat uba gagu fi hasi vadaha bakti ulohona meedaha dam num debu Babilon niba esdam dam nibe uba, “Neàte,” lahaho. Labi Markus abo emti bisi vou aleheda modemu em adat modemna ozomomda nibe laha uba, “Neàte,” lahaho.
14Labi um sunit nim ve aame neàdehezobe nasi um Kristus bake tu vuzehi meedam damat ubu uho ot aaiam di ot siame deelem bak laba ozome ame baket modele. Uho Kristus bake vou ali ahu vàmadehemu eho gi, “Alat Aho uba modi um ahu faheme fi goaitom vaba gi vabademsuse,” lahame eho Ala bake tom gagodam bak. Neàte. Sunit nim iho Silasti toedume ab neàdeham. Àhàm.