Dual Panel1Labi ame di labe Yahudi dam Yesus bake tu vuzehi meedam dam totbaho abo Yudea bak labe fa Siria bak nibe am num debu Antiokia niba li iho vou lehe im lam fa Yahudi damat modem vab dam abo Yesus bake tu vuzehi meedam dam niba nehi ab faasi vahokedamam. “Uho dat ahamda Musat toedume fi hasi esuhu im abo dam badate vou vahoke usehe Im Feàna lam, ‘Laso aubehà sokba ukbole,’ laham bak lam uho uledi meedam vabameam làhà uho faina meedàmu Alat uba beodalo meedam bak lam Aho fa mu uba soat vausu fa vei neàdedam vabak,” lahame ab li vahokedaham.
2Labi vahokedume modeha Paulusti Barnabasti ame Yahudi dam labe etei vou li vahokehe im lam gut aime modeha mu vedi otesi otesidam labe ab dahobuleham. Labihàmu dam ahim nibe ab gagoham. “Vabo. Ba labiham vabak. Meit am faina meedàmu Alat aba beolo meedam bak lam gi ame da labe am laso aubehà sokba ehena Alat ozahigeàmu mu vei neàdi aba soat vausum bak. Gi labihasule. A ukbomule,” lahame otesi otesida. Labihàmu ame Yesus bake tu vuzehi vahi meedam dam Antiokia laba azim dam labe ozodaha vabamu fa Paulusti Barnabasti labi Yesus bake tu vuzehi vahi meedam dam Antiokia esum dam totbaho lamti labihasu fàsi fa kota Yerusalem laba ab oluham. “Uho le Yesusat Aho gagu olu Am im vameadume esmozi laiam dam lamti kota Yerusalem laba azim Yahudi dam bake vuusu im vameame faheme modiam dam busaoda zi lamti laham dam laba le ame im modehe debu lam iademe aile.”
3Lahame ame dam lam vule vi odosi im vameadume neàdi kota Yerusalem laba ab oluham. Labi Antiokia labe ladam labe Fenisia bak labe am num debu meida izi labohote. Labi neo num debu meida izi labohote. Labi neo ladameam Samaria bak labe am num debu meida izi labohote. Labi neo num debu meida izi labohote. Labiha lada. Labe izi labohotidam di labe nehi gagu labohotida. “Um aihe? Yahudi damat modem vab dam laha Yesus bake tu vuzehi meedam bak,” lahame labe gagu laida. Labihàmu ame lab gagoho bak lam ame doni esuhu dam Yesus bake tu vuzehi vahi meedam dam lam ahebu aiha ab aime àvodi deeli meedaham.
4Labihadume kota Yerusalem laba ab lafuham. Lafusi modeha Yesus bake tu vuzehi vahi meedam dam ame kota Yerusalem laba azim dam lamti Yesusat Aho gagu olu Am im vameadume esmozi laiam dam lamti ame Yahudi dam bake vuusu im vameame faheme modiam dam busaoda zi lamti labihasu ahebu Antiokia iube lehe dam laba ab gut deeli, “Neàte,” lahame im ab gut vameadamam. Labi neo Paulusti Barnabasti Alat iba modi vizi vuusu teudehe labe iho Yahudi damat modem vab dam laba Yesus Aho amu meedume vou esmoho Im Neàna lam dam laba vahokedaha di dam lam gi uledi Yesus bake tu vuzehedaha bak lam kota Yerusalem dam zi laba ab vameadaham.
5Labi vameadume modeha ame Yahudi dam Yesus bake tu vuzehi meedam dam zi labe im dam totbaho Farisi dam laba tau na ibi iho ozomdata meedam dam totbaho labe usai duzu im ab vameadamam. “Yahudi damat modem vab dam Yesus bake tu vuzehi meedam dam labe im Yahudi dam nibe ibi iho modem baket im laso aubehà sokba ukbom bak lam laha tau modem bak. Gi labihasu laso aubehà sokba ukbom vabna modem biem bak. Labi laha im tai ahamda Musat toedume fi hasi esuhu im fi hamda ziti im fi ham vabda ziti laham Im Feàna lam ahebu laha aime uledi meedam labe neàdem bak,” lahame ab vameadaham.
6Labi Yesusat Aho gagu olu Am im vameadume esmozi laiam dam lamti labi ame Yahudi dam bake vuusu im vameame faheme modiam dam busaoda zi lamti labihasu lab vameadaha im aihemu dam ihimo ame im lam ot vameaidalo bakamta ab nusualadaham.
7Labi bakamta nusualadume neàdi meit aho ozoho bak vameada. Meit aho ozoho bak vameada. Gi labihadam bohu modesu otesi otesida. Labi otesi otesidaha vabamu Petrusat usai duzu im ab vameadamam. “Um emti Yesus bake tu vuzehi meedam dam totbaho oa, um ozobohuna taia? Amu di iube Alat um mu em vàmtea utasi gago, ‘Yesus Aho amu meedume vou esmoho Im Neàna lam eho Yahudi damat modem vab dam laba le vou vameatedale,’ lahame eba gagu eho le vou vameatedam di labe ame dam labe aime uledi Yesus bake ab tu vuzeheham bak.
8Labi eho laba le vou vameatedaha di lam Yahudi damat modem vab dam lam Yesus bake ab tu vuzeheham bak. Uho eho Kornelius Yahudi dàt modem vabda labe am num laba le im vameadaha ame da labe am dam totbaho lamti Yesus bake tu vuzehedaha bak laba uho vi ozodale. Alat Am Aha Nutabe Neàna lam amu iba Yahudi dam bake modi vizi vuusu teudehe Aha Nutabe Neàna lam fa neo ame Yahudi damat modem vab dam laba laha neo ab modi vizi vuusu teudeham bak. Labiha labe iho nehi ozo, ‘Ahu meibada ozobohu Ala labe Aho laha Yahudi damat modem vab dam vam meote,’ laham bak lam im ahebu ab ozobohudeham bak.
9Alat ba nehi vi ozome gagodaha vabak. ‘Im Yahudi dam. Dam lam Yahudi damat modem vab dam,’ lahame Alat ba ahulat vi ozome faheme gagodaha vabak. Neha labe im labi ozobohudehe bak. Iho amu Yesus bake tu vuzehedaha labe iho faina meedàmu Alat iba beolo modem bak lam Aho ozahigeàmu mu fa vei neàdedaha bak. Labi laha ame Yahudi damat modem vab dam labe iho laha gi Yesus bake tu vuzehedaha labe ame dam labe ibi iho faina meedàmu Alat iba beolo modem bak lam Aho laha ozahigeàmu mu fa vei neàdedaha bak.
10Am labiham Alat modem labe um akati imti vahi Yesus bake tu vuzehi meedam dam totbaho laba im tai ahamda Musat toedume fi hasi esuhu im fi hamda ziti im fi ham vabda ziti laham Im Feàna lam uho vedi, ‘Meedale,’ lahame vi ootedàla? Im tai ahamda Yahudi dam zi lamti labi im dam bada zi nimti ame Im Feàna zi lam modem biem damat modem labe uho akati etei Yahudi damat modem vab dam Yesus bake tu vuzehehe dam laba bisi ame im lam vi ootedume alihi nemahuseo modela? Alat gi modi neàdehena uho akati im lada zi lam neo vi tauidume vàhàdelo modela? Làhà, um gi, ‘Alat ba iba fakeo?’ laham bak ozahit modi ozolo meedam dam taia?
11Vabo. Ba a labi modemule. Eho nehi ozoho labe labi gagoho bak. Im Yahudi dam dat ahamda Musat toedume vou usehe Im Feàna zi lam iho ulohodesu meedam labe Alat iba soat vausu fa vei neàdedaha vabak. Gi nehaha bak. Im Boehàda Yesus labe Aho iba ozahit deeli im neà bak modi esuiam Dàt modem labe Aho iba soat vausu fa vei neàdedam bak. Labi ame Yahudi damat modem vab dam laba laha ame baket modehe bak. Labiha labe uho neha, ‘Iho Im Feàna zi lam ame Yahudi damat modem vab dam laba vi tauidameam làhà Alat iba fakeo?’ laham bak ozahit modi ozolo modem bak lam a modemule. Gi labihasu voole,” lahame Petrusat ab vameadaham.
12Labi Petrusat lab vameadaha im lam dam laba vahi im vameadam dam zi totbaho labe aime vi ozodam labe dae vabali ab daleàdeham. Labi daleàdi vou faodam labe Paulusti Barnabasti dam ahim labe iho im nehasu faasi vameada. Dam giida labe, “Ala abo feàte,” laham bak biem bake Alat amu iba modi teudehe labe iho damat fet aame àvodi ozobohudemna abo na damat ihimo modem biem im feàna lam iho Yahudi damat modem vab dam labe im bak iuba le meeda. Bak iuba le meeda. Laham im lam ab faasi vameadamam.
13Labi Paulusti Barnabasti im ibida vameadume ab neàdeham. Labi im vameadume neàdi modeha Yakobus im abada neo faasi ab vameadamam. “Um emti Yesus bake tu vuzehi meedam dam totbaho oa, im ebeda nasi aimale.
14Alat Aho amu nehi fet ozo, ‘Yahudi damat modem vab dam nim Eho modi ame dam labe fà Eba tu vuzehi Em damali im Ebeda meedase,’ lahame Aho ozoho dam totbaho alimeat fàsi faobekesi fa Am damalehe bak. Laham bak lam Simon Petrusat iba vameadume neàdehe labe im ab ozobohudeham bak.
15Alat Aho Yahudi damat modem vab dam totbaho fàsi, ‘Aba tu vuzehi Am damali fa im Abada meedase,’ lahame alimeat fàsi Am damalehe bak lam gi Alat vameadaha im aime fa dam bake ahate vameaidaha dam ahamda zi labe ibi iho nehi fet toedume esuhu im lamti ulohote.
16‘Boehàda Daud aham di iube aho vuusu im vahokedaha Israel dam lam iba fakemoholehe damat beome elodume foli seddaha bak. Lahana ame dam labe ibi iho ba vou faat ladam mekehà zoho laba Eho ba diamut li Daud amu modehe bakti ulohona modi ame dam laba vuusu im vahokedume fa gàhàdi teudeda tame.
17Nehame modem bake Eho ahit labihada tame. Dam bakda debu vekeheda totbaho lamti labi Yahudi damat modem vab dam abo Eho neha, “Eba laha tu vuzehi Em damali im Ebeda meedale,” lahame Eho vame Em damalelo modem dam lamti labihasu ahebu Ebe Eho ba meedam bak laba aame ozo, “Iba laha vuusdase,” lahame ahu adat iedi Eba labi gagoda tame. Ame im lam Eho Boehàda Alat oba gagu esuhu bak. Ame im lam Eho gi aham di iube Em damalehe dam laba vou vamea usdume fa dam badate vou fusi fi gatehe imot modem bak.’ Laham im lam Amosat aho fet toedume ab esuham bak. Labihàmu Petrusat etei iba li neha, ‘Alat Yahudi dam laba alimeat faobekesi dam lam ab modi Am damaleham bak,’ lahaha bak lam eho ozom, Amosat aham di iube lab fet toedume esuhu im lam ab modi imbodeham bak.
18(15:17)
19Labihahemu eho nehi vi ozome ozobohudi neàdi gagodam bak. Imo Yahudi damat modem vab dam etei Ala bake tu vuzehi meedam dam lam im feàna zi lam a vi ootedume im alihi nemahudamule!
20Imo fa gi sunit nehame toedume oluse. Dat ahamda Musat aho toedume fi hasi esuhu Im Feàna zi lam fàsi dua bak voou im nidi nimota sunit toedume oluse. Damat, ‘Ala am tame,’ lahame ostamna it modi vou baedamna laba vou baedalo na fi ho otemna zoho lam a àmule. Labi laha na vasea a udemule. Labi meit na otem di na vasea ad laba bekehedabu lam a àmule. Labi laha ostame fi loholi ot vai ot vaidam bak ahebu a meedamule.
21Im Yahudi dam fa ame Yahudi damat modem vab dam laba fakem vabake imo gi im fi hamda lamota sunit toedume oluse. Ame Yahudi damat modem vab dam labe ame bak lam ozobohu bak. Ba biem vabak. Neham bak. Hari Sabat abo Yahudi dam labe ibi iho gi azibe im digat fum di labe ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli ame Musat aho toedume fi hasi esuhu Im Feàna zi lam sunit bolohona laba toehena meit visoi aame gagodam labe damat gi dogoit aida. Labi neo hari Sabat neo fum di labe gi ame baket neo meeda. Gi amu di iube faasi meedume etei vou fusi ab lahasdamam bak. Abo Yahudi dam labe im num debu bak iumti num debu bak iumti ahebu labihadaha bak. Labiha labe Yahudi damat modem vab dam labe ame bak lam ozobohudem bak. Labihàmu im fi hamda lada lamota sunit toedume Yahudi damat modem vab dam laba oluse,” lahame Yakobusat im labihasu ab vameadaham.
22Labi Yakobusat aho lab vameadaha bak lam ame dam Yesus bake tu vuzehi vahe vahedaha dam zi lam abo Yesusat Aho gagu olu Am im vameadume esmozi laiam dam lamti labi Yahudi dam Yesus bake tu vuzehi meedam dam kota Yerusalem esuhu dam lamti ame Yahudi dam bake vuusu im vameame faheme modiam dam busaoda zi lamti labihasu vahi ab aime uledeham. Labi uledehemu im dam totbaho fàsi Paulusti Barnabasti ame dam ahim laba vi tau fa Antiokia laba olum bak ab ozoham. Labi ozohemu ame Yesus bake tu vuzehi vahi meedam dam lam iba im vameame faheme modiam dam behàsu ab fi me vaham. Yudas ee meida taluhuda Barsabasti labi Silasti laham dam behàsu lam fi me utasi Paulusti Barnabasti tau Antiokia laba ab oluham.
23Ame dam vahe vahehe dam zi labe dam behàsu laba lu Yesus bake tu vuzehi vahi meedam dam abo Yahudi damat modem vab dam labe Antiokia laba azim dam lamti Siria bak ahebu azim dam lamti Kilikia bak ahebu azim dam lamti laham dam laba oluhu sunit lam neha: “Imti vahi Yesus bake tu vuzehi meedam dam oa, sunit nim iho Yesusat Aho gagu olu Am im vameadume esmozi laiam dam nimti Yahudi dam bake vuusu im vameame faheme modiam dam busaoda zi nimti iho uba sunit nim oluho. Neàte.
24Iho aiha im Yahudi dam totbaho iho gagu oluhu vabda uba amu li im iho gagu oluhu vab im uba vahokedam labe uba vabidume um ozom biehe bak im aiho.
25Labihàmu im ahebu vahi im vameadume neàdi ahu vàmadi dam ibida fàsi fa Paulusti Barnabasti im bisi vou alem dam behàsu laba tau uba olum bak ab ozoham.
26Ame Barnabasti Paulusti dam behàsu nim im Boehàda Yesus abo Alat Gagu Fihasi Vimteme Oluhu Dat Boehàda labe Aho meedume vou esmoho im lam amu dam bake vou vameatedàmu damat iba otelo meedam di labe, ‘Im fà otem neàte,’ lahame ozahigeàmu vou meedam dam behàsu am bak.
27Labiha labe iho im vameadume neàdi Yudasti Silasti uba ab oluham bak. Ame dam behàsu lam iho uba toeme oluhu im lam gi ahumna uba ahat vameada tame. Ba im meit modem vabak. Labi uho, ‘Imbote,’ laham bake iho ahit uba dam behàsu lam ab oluham bak.
28Alam Aha Nutabe Neàna labe iba neha, ‘Gi Im Feàna fi hamda nimota dam laba gagu ozobohudele,’ lahame iba modi fi gatehe labe im aime uledi fa neo uba gagolo sunit nim ab oluham bak. Uba im fi hamda ziti im fi ham vabda ziti laham Im Feàna lam ahebu vazisi duali uba gagu vabidume alihi nemahum bake moho. Labihàmu gi im nidi nimota, ‘Malele,’ lahame uba gagolo modem bak.
29Damat, ‘Ala am tame,’ lahame ostamna it modi vou baedamna laba vou baedalo na fi ho otemna zoho lam a ve àmule. Labi laha na vasea a udemule. Labi meit na otem di na vasea ad laba bekehedabu lam a àmule. Labi laha ostame fi loholi ot vai ot vaidam bak ahebu a meedamule. Uho lada lamota fi hasi meedameam làhà Yahudi dam ba uba fakem vabak. Uho gi iademe vamdesuhuna meedam bak. Im ibida ab foleham. Neàde.”
30Laham im lam sunit laba toedume neàdi ame kota Yerusalem laba vahe vaheme im vameadam dam zi labe ame dam behàsu laba vi vameadume neàdi sunit vi lu Paulusti Barnabasti ame dam behàsu laba vi tau ab oluham. Labi ame dam labe num debu Antiokia laba ab laham. Le lafusi Yesus bake tu vuzehi vahi meedam dam Antiokia dam ahebu gagome bakamta vazisi neàdi iho vou laha sunit lam ame dam laba ab loham.
31Labi ame dam labe ame sunit ve aaha, “Im fi hamna dua bak voou gi im nidi nimota fi hale,” lahame iba vabededam im iho ve aahemu im ahu amu faidehe bak lam fa ab neàdi deeleham.
32Labi Yudasti Silasti taho fa lam kai. Ame dam behàsu labe Alat vameadaha im aime fa dam bake ahate vameaidaha dam behàsu modemu gi Antiokia laba imti vahi Yesus bake tu vuzehi meedam dam totbaho laba dihasi im vahokeda. Dihasi im vahokeda. Gi labihadam bohu meeda. Labihadam labe ame dam lam amu fota bee bak lam fa etei lab vahokedam bak lam aihemu iho Yesus bake tu vuzehi meedam bak fa keàtedi meeda. Labihada.
33Labihadume Yudasti Silasti Antiokia laba azibehamdi fa ibi bake lalo meedàmu ame Yesus bake tu vuzehi vahi meedam dam Antiokia dam labe nehame vi vameada. “Neàte. Uho lab ladam di iademe ladale,” lahame vi vameadume neàdi ame dam behàsu iba gagu oluhu dam zi laba kota Yerusalem laba fa ab oluham. [
34Lahana Silas vedi fa lam mu gi Antiokia laba aida.]
35Labi Paulusti Barnabasti laha gi Antiokia laba aida. Taho fa laha vabak. Ame dam behàsu lamti dam amomoi totbaho lamti im Boehàda Yesus labe Aho amu meedume vou esmoho Im Neàna lam Antiokia esdam dam laba vahokedume fi desi neo vi vameada. Abo dihasi mode. Dihasi mode. Labihada.
36Labi ba neo di iube Paulusat Barnabas bake gago, “Imo im Boehàda Yesus labe Aho amu meedume vou esmoho Im Neàna lam amu vou le vameame fi dehe num debu bak iudu iumti iudu iumti ahebu laba le, ‘Ame Yesus bake tu vuzehi meedam dam labe iho meedam lahasuheo?’ laham bak imo fa le aase.”
37Lahame labi gagoha Barnabas uledi vedi Yohanes ee meida, “Markus,” lahame taluhuda lam, “Iba tau vou lase.”
38Lahame labi gagoha Paulus ame da lam vou lam mu gago, “Eho ozom, da lam vou lam faite. Iho amu Yesus im Boehàda labe Aho amu meedume vou esmoho Im Neàna vou vahoketehe di lam da lam vou laha iho meedam bak taum mu iba Pamfi lia bak laba vou esmozi fa itahada akati neo tau lalo modela? Feidate.”
39Lahame labi gagoha Paulusti Barnabasti Yohanes vou lam bake otesi otesidaha vabamu Barnabas aho geàmu Markus ve ahili sue baa vààsu nutabet vou lam ihe buduada Siprus bake lam ihe laba ab zisi Siprus bake ab bioham.
40Labi Paulus ozoha vabamu amti ahilemda vabalehemu aba tau lalo modemda Silas ab gagome vaham. Labi ame Yesus bake tu vuzehi meedam dam Antiokia laba azim dam labe Paulusti Silasti olulo modem di labe Ala bake tom gago, “Ai Boehàda oa, dam behàsu nibe Oho gagohona iuba le mode iuba le mode lahadam di lam Oho vou aasu ozahit deeli im neà bak modi esuidale,” lahame tom gagu vi vameadume neàdi ame dam behàsu lam ab oluham.
41Labi Paulusti Silasti ladam di labe abo Siria bak lamti Kilikia bak lamti laham bak laba ahebu lada. Yesus bake tu vuzehi vahi meedam dam laba le im vou vahoketedume dam labe im ahu modi fa teudeda. Labiha lada.