Dual Panel1Labi ba neo digat meida labe Farisi dam totbaho lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi totbaho lamti vazisi kota Yerusalem labe li Yesus bake ab vi ailo gagoham.
2“Guru oa, dam ahamda ibi iho fi hasi vou mode usehe im lam Yahudi dam bake vuusu im vameame faheme modiam dam busaoda bada zi nibe iho fa vame ibi iho ozoho baket vi tauidume dualehe im lam akati modi Oba vi tau meedam dam labe tau modem vaba mode? Akati modi na àlo modem di ibi iho anekehà valo ekeme itatame neàdi na àiam baket modem vaba vedi anekehà gi labihasu na àdam damat modela?”
3Lahame labi gagoha Yesusat fa ab vi gagoham. “Ne lahana um akati Alat Aba Aho gagu fi hasi esuhu im nim uho mu zidazi fa gi dam ahamda labe ibi iho fi hasi vou mode usehe im lam vame fa ubu uho ozoho bak vi tauidume tombuli meedàla?
4Nehaha bak. Alat aham di iube nehi gagu fi hasi esuhu bak. ‘Um ai bake modeo, um oi bake modeo, ahu adat iedi uba gagoho im laba vuzehi meedale.’ Labi im meida neha: ‘Meit am ai modeo, am oi modeo, faki, “Seee. Taho elole,” lahame feàtàme vi uloome gagomeam làhà meit ame da laba fa neo oteme vataum bak.’ Lahame aham di iube Alat gagu fi hasi esuhu im lam uho akati meedam vaba vazidazehela?
5Uho vedi fa nehi ozome vahokedam damat modem bak. Uho meit am ai bake modeo, am oi bake modeo, nehi gagomeam, ‘Ai oa, oi oa, em na nim oba lom neàte. Lahana eho amu Ala bake lolo gagu vàmadi fi hasi esuhu labe oba lom vabi mozo,’ lahame ame da labe labi gagomeam làhà uho vedi ame da labe aho lab gagoho bak laba, ‘Ahole modeho,’ lahame vi gagodam damat modem bak.
6Uho labi vi gagodam labe ame da labe am ai bake modeo, am oi bake modeo, ahu adat iedi vou baedam vaba, ‘Gi voom neàte,’ lahame vi vahokedam damat modem bak. Um gi um tai ahamda labe ibi iho fi hasi vou mode usehe im lam um dam bada nibe fa vame meedume tombuli, ‘Iho ame im meedase,’ lahame meedam damat modem bak. Uho gi labihasu meedam labet um gi Alat Aba Aho amu lab gagu fi hasi esuhu im lam ab modi voou seteham bak.
7Um gi ahobat neàdi meedam damat modem bak. Dat ahamda Alat vameadaha im aime fa dam bake ahate vameaidahada Yesaya labe aba aho aham di iube fet toeme esuhu Alam im meida nim gi um dam badate vàlu gagoho imot modem bak.
8‘Alat neha, “Ame Israel dam nim Em ee vousai Eba vou baedam di gi im ahat ahamo vou baeda. Ba ame dam labe im ahulat vi tau Eba deelem vabak.
9Ame dam nibe iho, ‘Em abo feàte,’ lahame Eba vou baedam di gi modeme vanamai voom damat modem bak. Labi laha ibi iho lab vahokedam im lam ba Ebe Eho gagu fi hasi esuhu im vahokedam vaba vedi fa gi dam bakdat ihimo ahulat ozome gagu fi hasi vou vahoke usehe im vahokedam damat modem bak,” lahame Alat gagoho bak.’ Lahame Yesayat aho aham di iube lab fet gagu vàmadi esuhu bak labe imbodi uho ab meedamam bak,” lahame Yesusat ab vameadaham.
10Labi im lada lam vameadume neàdi Yesusat neo dam dua bak laba, “Aba lele,” lahame gagodume li netàdi Aho ab vi vameadamam. “Um ahu iademe vi ozodume ozobohudem bake Eho etei uba vameadalo modem im nidi nim mahate iademe aidale.
11Um Yahudi dam busaoda labe ubu uho nehi vahokedam im nim Alat ba uledem vabak. Uho vedi iho im ahat na ve àm bak labet modi it vàhàdeme faidi fi hasi modesda tiba. Lahana Alat ozomta ba im ahat na àm bak labet modi im it vàhàdeme faidi fi hasi modesdam vabak. Gi im ahat futom im labet iba modi im vàhàdeme faidedam bak.”
12Lahame Yesus gi etei labi gagoha Aba vi tau meedam dam labe Aba li netàdi gago, “Aia, Oho etei lab vameadaha im lam Farisi damat vi aime Oba ahu adat fakehe bak Om ozodà?”
13Làhàmu Yesusat fa ab gagoham. “Ne, um ozom vaba? Em Aiat Ahamo debe usihi vabna ahebu omnaoti vaome voedume dehalem meo bak.
14Labihàmu ame Farisi dam laba gi ozahigeàmu mu vou esule. Dam lam guruta guru. Lahana ame dam lam gi fako faina modesdam bak. Neham bak. Dam fako faida behàsu labe dat meida anekehà vuusu vou lam biem bak. Labihameam dam ahim lam gi amait bak bumat laba nom ilum bak.”
15Lahame labi gagoha Petrusat Yesus bake vi ailo ab gagoham. “Aia, Oho amu neha, ‘Alat ozomta ba im ahat na àm bak labet modi im it vàhàdeme faidi fi hasi modesdam vabak,’ lahame gagoho im lam am tombu iba fa ahate vameadale. Im ozom biem bak.”
16Lahahat Yesusat fa ab gagoham. “Oo, um vi ozome ozobohudem vaba? Neha taia?
17Na àmna gi ahat àme zulu esum bak. Labi vou faobe ba haeli vieme setem bak.
18Lahana ibi iho im ahulat vi ozome neàdi futodam im lam iba modi it vàhàdeme faidedam im am bak.
19Dam ahulat it ozome modi faidem im neha: Bisi fai bak meedam bak ozom bak ame. Mei otem bak ame. Nam dat eheda modeo, dat nam eheda modeo, aa modem bak ahebu ame. Ostame fi loholi ot vai ot vaidam bak ahebu ame. Mei na aa vam bak ame. Meia giomim vàlu gagodam bak ame. Meia feàtàdam bak ame.
20Labihasu ame im zi lam iba modi it vàhàdeme faidemna am bak. Ba ame dam labe ibi iho ozoho baket anekehà valo ekeme itatam vaba na àm bak labet meia modi vàhàdeme faidem vabak,” lahame Yesusat ab vahokedaham.
21Labi Yesusat ame bak lada vou esmozi neo ladume num debu Tirus lamti num debu Sidon lamti laha obe modesuhu bak laba ab laham.
22Labi laba le lafusi modeha Kanaanda nam abo Yahudi namet modem vab nam busao labe aho azihi bak netàdehemu lehe labe Yesus bake li nehame tauleda. “Boehàda oa, Om abo Dat Ahamda Boehàda Daud Vou Faat Lehe Mekehàda am bak. Labihàmu Om eba aame faobekesi taule. Em adnamat mei ahu oli veimam setan am ahu laba veimai geàdam bohu modesdalo. Oho gagu futoi itale,” lahame ab tauledamam.
23Lahame labi tauledume modeha Yesus ba dae bum kai. Gi daleà lada. Làhàmu Aba vi tau meedam dam labe fa Yesus bake vuli ab gagodamam. “Aia, Oho nam laba gagu fa lale. Nam lam bisi iba vi vaiti vaitidume imti vabidume im alihi nemahuseo mozo.”
24Lahahat Yesusat fa gago, “Alat Eba gagu oluhu di lam gi Israel dam abo domba vou aasdam dam vabalehe bake Em gagome oluhu bak. Ba Yahudi damat modem vab dam laba gagu oluhu vabak.”
25Lahame labi gagoha ame nam labe geàmu ozahit Yesus bake netàdi am ahu adat iedi, “Am abo feàte,” lahame vou baedalo Am naba modesdam bak laba ahit ogomasu ab biteham. Biti Yesus bake vou baedam labe neo tauleda. “Boehàda oa, eba taule,” lahame neo tauleda.
26Lahahat Yesusat fa gago, “Data bake lu àlo modemna ba im veme esu àm vabak. Labiham fai bak.”
27Lahahat ame nam labe fa neo gago, “Lo. Lamota imbot. Lahana Boehàda Om ozom vaba? Vem deda labe am na vaheme àm ut gaheba laba datalu na lu àm di na keobe goagoadamna lam am vem ad laba dozomna labe gi labaha àmna taia?”
28Lahahat Yesusat fa ab gagoham. “Oia, oho etei Eba lab tu vuzehehe bak lam abo feàna modeho. Oho Eba lab gagoho bak lam Eho mode tame,” lahame uledi gagoha am adnamat lam gi omozit ame di labe fa ab neàdeham.
29Labi Yesus neo ame bak lam vou esmozi fa neo ledume Itea Galilea valau obe lezi ab ladamam. Labi ladume bak buzoho laba laisi ab nusuham.
30Labi nusu aaha dam aheda zi labe fa dam ahaladiame nisileheda zi vuusualame Aba vi valada. Neha: Abo nao zoho modeo, anekehà modeo, nutabedeheda zi ame. Labi fako faida zi ame. Labi dae vabda zi ame. Labi dam faida zi totbaho amomoi ame. Labihasu dam ahe damat Yesus bake vou ledume Am naba modesuhu bak laba oumahedume Yesusat ab uladdume modi fa ab neàdedaham.
31Labi ame dam giida labe iho aaha, dam dae vabda fa modi im vameada. Labi dam nisileheda modi fa neàdeda. Labi nao nutabedeheda fa neàdedume usnadume lada. Labi dam fako faida modi fa na aam neàdeda. Labihasu ahebu meedume neàdedam bak aadahemu àvodi Israel dam vuusdam Ala bake, “Abo feàte,” lahame ab vou baedamam.
32Labi ame di labe Yesusat Aho Aba vi tau meedam dam laba gagome li dozeadume neàdi ab gagoham. “Dam duada zi nim iba tau iddume usi làteladi im na àmna folehe labe idoali feà bak fuhu bak lam aam faimu Em faobekeho. Em ba dam nim na àhà vabna ideia olum kaio. Zie bohu nim fa ladameam gi doni bake ahadou faa susume lam bili la biti le bitiam zohàme ba labihasu olum maleho.”
33Lahame labi gagoha Aba vi tau meedam dam labe fa ab vi gagoham. “Ne lahana dam vaba alim bak nim iho ake le na àmna aame vame fa vou li dam bake lodume uloholi àdàla?”
34Lahahat Yesusat fa vi ailo gago, “Rotibu ubuda amamo vou lehela?” Lahahat Am dam labe fa ab vi gagoham. “Im rotibu tujuh ehete. Labi bohe koena ame. Gi labihasu vou lehe bak.”
35Laham bak lam aime neàdi Yesusat fa ame dam duada zi laba gagome bak laba ab nusualadaham.
36Labi nusualadume neàdi Aho ame rotibu tujuh lamti bohe koena lamti vame Ala bake, “Neàte,” lahame tom gagu neàdi fahedume Aba vi tau meedam dam laba lodume iho fa vame ame dam duada zi laba lodume uloholi ab àdaham.
37Labi ame dam zi fai labe ame na zi lam àdume modeha dam ahebu dedehemu zoho ab vahedaham. Labi Aba vi tau meedam dam labe damat lab àme dedehemu vahehena zoho lam fa vi ateti atetidume boloseh vahedume modeha boloseh ab tujuhleham. Labi modeha ame boloseh lam ahebu ab bektoham.
38Dam etei lab nusualadume na àhà dam lam gi dam aabota dem di abo empat ribu fuhu bak. Ba lahiti datati tau dem kaio.
39Labi na lam àdume neàdi Yesus ame dam duada zi lam gagome fa ibi bake ab oudaham. Labi dam lada lam oudume neàdi Yesus Aba vi tau meedam dam lamti iheba ziddume Magadan bak laba ab bioham.