Dual Panel1Labi ba neo digat meida iube Yesusat fa num debu Kapernaum laba ab laham. Le modeha kehàm vaba dam ahebu, “Yesus fa num debu bake leho,” lahaha bak lam ab aidaham.
2Yesus lehe bak aihemu dam ahebu ame num laba valadume modeha num bumat keke. Labi num doozoh laha keke. Labihada. Labihadam di lam Yesus im nehasu dam bake vameada. “Alat Aba Aho Gagu Fihasi Vimteme Olulo Modem Dat Boehàda lam etei bak niba oluhemu Aho dam bakda modi Am damali vuusu im vahokedam bak lam etei ab faasi gàhàli meedalo modemam bak,” lahame dam bake ab faasi vameadamam.
3Labi ame im lam vameadam di labe dam amomoi labe im dat nao zoho eloi nutabedeheda lam ileba esu dam ahim labe ahim labe zoho vuusui vuusuiame Yesus bake ab vou ledamam.
4Labi vou ledume numa olesome modeha dam bà tadi num kekesi olem biehemu fa num ohut vabna baa ahoba laba vou zisi ame numa suusuhuna baa lam feàkmome bumatali afoezobe ame dat ileba lamti loa vààsu num ohut bumat labe fa damat nusualadaha tomba laba abo Yesusat avaesdam laba nom vousdume ab nom esuham.
5Labi nom esuha Yesusat ozo, “Ame dam labe bisi Eba tu vuzehi meedà?” laham bak aame ozobohudehemu Aho fa dat nao zoho eloi nutabedeheda niba ab gagoham. “Em adat ozomomda oa, om ade? Obo oho faina meedaha bak lam Eho ozahigeàmu fa vei neàdeho,” lahame ab gagoham.
6Lahame Aho etei lab gagoho di lam dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi laba laha tau nusualadaha dam ehet. Labi Yesus etei lab gagoho bak lam ame guru zi labe aime ihimo ahulat aa nehi ozoda. “Oo, da nim gi imti ulohona baka ana modi feà Dateli nehi gagodàla? ‘Obo oho faina meedàmu Alat beolo modem bak lam Eho gi vei mu fa faamome vei neàdeho,’ lahaha bak lam gi Alat Ahamo gagom bak akati Da nibe labi gagodàla? Da nim gi Ala bake feàtàdam dàt mode taia?” lahame ab ozodamam.
7(2:6)
8Lahame aa ozodaha bak lam Yesusat Ahamo ozobohudi ab gagoham. “Um ana modi um ahulat labi ozodàla?
9Uho ozom, Eho ame nisileheda niba im gagom di im adida bisi damat aame ozobohudela? Eho nehameam, ‘Obo oho faina meedàmu Alat beolo modem bak lam Eho gi vei mu fa faamome vei neàdeho,’ lahame gagomeam damat aame ozobohudeo? Laham vabameam Eho gi neha, ‘Om nao zoho eloi nutabedehe bak lam Eho modi fa neàdeho. Nasi usai om ileba giame vuusu fa num bake lale,’ lahame gagomeam làhà damat aame ozobohudeo? Adida bisi damat aame ozobohudela?
10Lahana Em Abo Asum Ahoba Iubet Bak Niba Li Dateleheda nim Ala naedat Eba gagu olu Eho fa im dedateli ot vai meit faina meedàmu Alat beolo modem bak lam Eho gi vei mu fa faamome vei neàdem meoda Em am bak. Lahana Eho labihasu meedam bak lam um biem bake Ebe Eho etei modelo modem bak nim uho nasi aasu vou faomale. Labi dat nao zoho nutabedeheda nim Eho modi fa neàdi usam bak uho aameam làhà um laha neo, ‘Em meit faina meedàmu Alat beolo modem bak lam Eho gi vei mu fa faamome vei neàdem meoda Em am bak,’ laham bak lam etei uho laha aame vi ozobohudem bak,” lahame Yesusat labihasu vameadume neàdi ame dat nao zoho nutabedeheda laba ab gagoham.
11“Om usai om ileba visoi vuusu fa om num bake vou lale.”
12Lahame Yesusat gi etei labi gagoha ame da labe fa neàdi damat aasdahit amti usai am ileba visoi giame vuusu ame num labe futoi fa am num bake ab laham. Labi modeha dam ahebu ame lab modehe bak lam aame àvodi anekehàso it gaadam labe ahu adat iedi Ala bake ab vou baedamam. “Aa làhà! Im amu im feàna lamohona ba aaha vabak. Gi etei alimeat ab aaham bak,” lahame àvodi Ala bake ab vou baedamam.
13Labi Yesus ame num lam vou esmozi fa Itea Galilea valau obe laba neo lada. Labi ladam di labe dam duada labe aaha Yesus lehemu ab valadamam. Aba valadàmu Aho ame dam laba faasi ab vahokedamam.
14Labi vahokedume neàdi neo ladameam aaha meia gagu gi teo vi vaiam doi pajak lam atemda abo Alfeusam adat Lewi labe aho gi am pajak vadam num buà laba aidamna ab aaham. Làhàmu ab gagoham. “Lewi oa, oho Ebe Eho vahokedam im vi tau meedam datelele,” lahame labi gagoha Lewit usai Yesus bake ab vi tau meedam dateleham.
15Labi ba neo Yesus Aba vi tau meedam dam lamti Lewim num laba le na tau àda. Di lam Lewi bake tau meia gi teo vi vaiam doi vadam dam totbaho zi lamti labi damat neha, “Faina modeho,” lahame ozomsum dam lamti labihasu ba li ame dam laba vi tau vazisi na àda. Ame dam zi lam iho Yesusat Aba Aho vahokedam im ozobohudelo meedàmu laba tau vazisi na ab àdamam.
16Laham bak lam Musat toedaha im ahamda vahokedam guru zi abo Farisi dam bake vi tau meedam dam labe iho ba li aaha ame bak lam aahemu Yesus bake vi tau meedam dam laba ab gagoham. “Yesus Dat neàda modem bak akati modi um fa meia gagu gi teo vi vaiam doi vadam dam ziti labi damat neha, ‘Faina modeho,’ lahame ozomsum dam lamti vazisi na zi vàmtea àdàla?”
17Lahame vi ailo gagoha Yesusat fa dam laba im totobe nidi nim nehame ab vi fi koadamam. “Uho ozom, dam aheda dokter abo obat vuusumdate lam meo? Vabà! Gi dam gaileheda ihimo obat vuusumdate lam bak. Bak lam gi neham bak. Eho bak niba lehe bak neham bak ozome lehe vabak. Damat neha, ‘Im abo Alat gagu fi hasi esuhu im zi ahebu ulohodesu vamdesu meedam dam im am bak,’ lahame ahobat neàdem dama Eho neha, ‘Uho faina meedam bak lam nasi voedume fa ahu neà bak vàmadi meedale,’ laham bak gagolo lehe vabak. Em gi damat neha, ‘Iho faina meedam damat modem bak,’ lahame it ozome gagodam dam laba neha, ‘Uho faina meedam bak lam nasi voedume fa ahu neà bak vàmadi meedale,’ laham bak gagolo lehe bak,” lahame ab vameadaham.
18Di labe Farisi dam zohoti dam Yohanes Mei Vuu Valo Baptisleiamda labe aba aho vahokedam im ozobohudelo vi tau meedam damti labihasu Ala bake tom gagodalo modemu ahit na àm mohonale. Lahana ame di labe Yesus Aba vi tau meedam dam labiham kai. Labi modeha dam amomoit Yesus bake li vabi vi ailo ab gagoham. “Yohanes bake vi tau meedam dam lamti Farisi dam bake vi tau meedam dam lamti labihasu Ala bake tom gagodalo modemu ahit na àm mu izidam meo bak. Lahana akati modi dam Oba vi tau meedam dam lam labiham vaba modela?”
19Lahame labi gagoha Yesusat gi damat Aba ba modem im laba ozome im totobe nidi nim nehame ab fi koadamam. “Dat soao labe nam soao valo na vahedam di labe ame da labe amti ot deeliam dam laba gagu vahi deelehat na àdam meo dam taia? Labi laha dat soao labe nam soao valo modemda ehe lahasuhu di lam am dam gi deeli na àm meo dam taia?
20Lahana ba diamut ame nam valo modemda lam naat aa si utasi vou le setem di lam am dam totbaho labe im ahu faidi na àm mom di am taia?” lahame ab vi vameaham.
21Labi im lada lam vameadume neàdi Aho neo Yahudi dam labe im tai ahamda zi labe ibi iho vou vahoke usehe im lamti fa Aba Aho etei li vou vahoketedam im gàhàna nimti ulohodesu fa vahem biem bak laba vi ozome im totobe nidi nim ab vi fi koadamam. “Meit am sue amu soa dusumda vàusi bumatalemeam làhà ba sue gàhàna baa amu valo kikeme modi koedehe vabna zoho vaitoi ame sue vàuhu bak laba taasu tadem vabak. Labihameam ame sue etei tadeheda lam fa valo kikeme àga bake esu dehalem di ame sue gàhàna zoho lam gi ahamo fa koedi etei tadehena etehàso lam ziambitoi vàusi bumat olozebalem bake ozome ahit moho bak.
22Labi laha meit anggur oo gi etei unaha vaksa gàhàda fi kidi neàdehe vabda lam ba kambing fi ho sokba amu buhaleme bugeahana modi esu dehalehena laba fedem vabak. Meit labi modemeam ame na vaksa lam ba fi kidehe labe ame na sokba amuda lam modi fi fasi ame na vaksa lam gi bake veàtom bak. Labi ame na sokba lab fedehena lamti gi amait vàhàdeme setem bak. Labiham bake meit ame na lam ba ozome modem vabak. Gi ame anggur vaksa gàhàda lam fa ame na sokba gàhàda buhaleme bugeame afoezobe laba fedem bak. Labi modem labe ame na sokba lamti ame na vaksa lamti gi amait iademe fi kidi neàna modesdam bak,” lahame Yesusat ame im totobe lam ab vameadaham.
23Labi ba hari Sabat abo Yahudi dam labe ibi iho gi azibe im digat meida labe Yesus Aba vi tau meedam damti iho bak mei bake lalo modemu gandum dee zie labe lada. Ladam di labe Aba vi tau meedam dam labe idoalehemu ame gandum oo amdeheda lam auet vi vuu footoi ab vou à ladamam.
24Labi vou ladam di labe Farisi dam totbaho labe ame bak lam aahemu Yesus bake ab gut gagoham. “Ne, etei nim gi hari Sabat abo im Yahudi dam labe ibi iho gi azibe im digat nim akati modi Oba vi tau meedam dam labe na oo auet vi vuu footoi vou à ledàla? Ne, im tai ahamda Musat aham di iube neha, ‘Hari Sabat fum di na a meedamule,’ lahame toeme fi hasi esuhuna Oba vi tau meedam dam labe akati ailahigeàmu na meedàla?”
25Lahame labi gut vameadume modeha Yesusat fa ab gagoham. “Ne, im tai ahamda Boehàda Daud labe aho amu modehe im lam meit Alat Vameadaha Im Toedahana laba im meida nim um aame ozobohudehe vaba? Amu Daud aba vi tau meedam damti idoalehemu dam ahamda labe iho Teohet Mome Fa Faatoiam Num Fihamna abo Alat Israel dam bake le tau im vameaidam num laba oli Ala bake lu fi haha beahuba laba esuhu roti lam aho visoi faheme am dam bake lodume iho vahi àdaha bak lam um vi ozobohudehe vaba? Ame di lam Abiatar aho Damat Ala Bake Lomna Ve Vua Vahudam Tohe Dam Zi Labe Bisi Boehàdateboli meedam bak. Labihadam di labe ame roti lam dat ahamda Musat aho aham di iube neha, ‘Ame roti lam damat Ala bake lomna ve vua vahudam toheda zi labe ihimo àm rotit modem bak. Ba dam giida tau àm fi ham roti modem bak,’ lahame gagu fi hasi esuhu roti lam dam giida labe àhà bak. Lahana ame dam labe iho ba, ‘Faina modeho,’ lahaha vabak.
26(2:25)
27Eho gi neham bak ozome uba labi gagoho bak. Alat aham di iube na totbaho meedume neàdi dam alimeat ab modeham bak. Labi ba ame hari Sabat abo gi azibe im digat lam ba modehe bak. Labiha labe Eho ozoha, ame gi azibe im digat lam bisi feà vab labe ba dam fa vafozem vabak.
28Labihàmu Alat Gagu Fihasi Vimteme Olu Asum Ahoba Iubet Bak Niba Li Dateleheda nim Em ame Da amemu ame hari Sabat deda Em am bak. Labiham labe Ehemo neha, ‘Ame digat labe im nehasu modem neàte. Im nehasu a modemule,’ lahame ozome gagomda Em am bak,” lahame ab gagoham.