Dual Panel1Eho etei lab vameadaha bak lam uho meidavat mu nehi gagoe moio? “Aa làhà! Im Yahudi dam nibe ibi iho modi baleàhà bak lam abo im laso aubehà sokba ukbom bak labet modi Alat iba ba deeli vame Am damalem vabna ozomo? Làhà, imo fà gi Yahudi damat modem vab damalese,” lahame fa it ozodume gagodameam làhà eho fa uba gi nehi gagom bak.
2Um git ozodalo. Iba im neà bak duana modesuhu labe im ahole Yahudi damat modem bak. Ahamte gagomda neha: Im Yahudi dam im tai ahobada lam Alat Musa bake vameadume aho fa ot vai dam bake fet vameadume fi hasi vàmadi esuhu Im Feàna zi lam lodume vou esmoho dam im Yahudi dam am bak. Labiha labe im ahole Yahudi damat modem bak.
3Lahana eho etei lab gagoho bak lam uho meidavat mu daetesu nehi gagomeam, “Im Yahudi dam tai ahobada labe ibi iho Ala bake neha, ‘Iho mode tame,’ lahame gagoho im lam vedi gi daet vageme mu voou setemeam làhà Alat ba Aba Aho iba Yahudi dam bada niba neha, ‘Eho uba im neà bak meeda tame,’ lahame iba fet gagu vàmadi esuhu im lam Aho ba laha modi imbodem vab taia?” lahame uho labi gagomeam làhà eho fa uba nehi gagom bak.
4Vabà! Ala ba labiham vabak. Alat Aba Aho fet gagu vàmadi esuhu im lam ahebu gi imbodem tadem bak. Im dam bakda ahebu nim iho amu Ala bake neha, “Iho neham bak mode tame,” lahame ibi iho lab fet vameadume esuhu im iho modehe vaba vedi, “Iho ab modi neàdeham bak,” lahame iho lab gagu vagehe bak lam Alat modi fa tombali damat ab ozobohudemam bak. Lahamnàme Ala ba vageiam vabak. Uho nasi dat ahamda Boehàda Daud labe aho Ala bake aham di iube gagoho im vi ozomale. Daud aho faina modehemu Alat aba vàlu vatau beolo gagoho bak lam, “Ahole modeho,” lahame aho Ala bake nehi gagoho im Alat Vameadaha Im Toedahana laba nehi toehe bak ehete. “Iho dam bakda faina meedàmu Oho iba vàlu gagom bak laba iho vi ozom di Om gi ahole im vamdesu vameadam Ala Om am bak. Labi laha meit Oba vàlu gagom di Om ba àvodem vaba Obo Oho ozoho baket modi meodemda Om am bak.” Lahame toeme esuhu bak.
5Labihàmu iho Yahudi damat im vamdesu meedam vabak lam Alat faki beodàmu Aba Aho ahole im vamdesu meedam bak lam modi fa tombalemna am bak. Labihameam iho akatihasu ozome gagoe? Làhà Alat dam faina meedam dam laba vàlu vatau beodameam làhà Am ba ahole im vamdesu meedam Alat modem vab taia? Eho etei lab gagoho bak lam eho gi im dam bakda ostame ozome gagom bak vouhodam bak.
6Lahana, “Alat iba, ‘Beose,’ lahame gagom bak lam Am ba ahole im vamdesu meedam Alat modem vabak,” laham bak lam iho a labi ozome gagomule. Ala ba labiham vabak. Ne, um ozom vaba? Alat iba Yahudi dam labe ibi iho meedaha im laba vi ozome ozobohudi faki gagu beodam bak lam Aho ahole modehe vaba git modemeam làhà ba diamut dam bakda ahebu ibi iho bak niba meedaha im vi ozome ozobohudi gagu faasi beodume vataudam digat fuhuzobe ba akati Aho iademe ozome dam gagome fahedà? Ba labiham biem bak.
7Lahana eho etei lab gagoho bak lam uho meidavat aime mu nehi daetesu gagoe moio? “Aa làhà! Alat eba gagohona eho meedaha vaba vageiam bak lam Aho faki eba beodam bak labet modi Aba Aho vei vageiam vaba abo imbodem tadem bak lam modi fa tombali damat aame ozobohudi, ‘Am abo feàte,’ lahame Aba vou baeda. Ame bak labet modi Aba vou baedàmu ba akati Alat eba neha, ‘Eho faina meedam dàt modemu beom neàte,’ lahame eba faki gagodà?” lahame uho meidavat labi daetesu gagoe moio?
8Lahana uho lab daetesu gagoho bak lam imbodemeam làhà uho gi nehasu fa vi gagom vaba? “Damat Ala bake vou baedam bake imo gi fai bak mei fai bak meime meedam bak tadi meedase,” lahame vi gagom vaba? Eho etei lab gagu vouhoho im lam dam totbaho labe vedi eba git vàlu neha, “Eho Paulusat labihasu vou vameatedaho,” lahame eba git vàlu feàtàda. Lahana em ba labi vou vameatedaha vabak. Dam lada lam Alat ba ozome ozobohudi ahole gagu beodume vatauda tame.
9Eho etei lab vameadaha bak lam labihasumeam làhà im akatihasu ozoe? Làhà, Alat iba Yahudi dama aame ozom di imota neà? Labi Yahudi damat modem vab dama aame ozom di fai? Vabà! Ba labiham vabak. Em amu uba nehi gagoho taia? Im dam bakda ahebu abo Yahudi damat modeo, Yahudi damat modem vab dam modeo, im ahu ad laba faina meedamna labe iba ootedam labe simtedehe bak.
10Eho etei lab gagoho bak lam meit Alat Vameadaha Im Toedahana laba nehi toehe bak ehete. “Ba im vamdesu meedamda vàmtea buà na vabak.
11Ba, ‘Ala akatihasu meedam Alat modela?’ laham bak lam ozome ozobohudi neàdeheda na vabak. Labi laha, ‘Ala akatihasu meedam Alat modela?’ laham bak lam ozome ozobohudem zie nabidamda ba na vabak.
12Labi laha dam bakda ahebu Ala bake tu vuzehi im Aho gagohona lam meedaha vaba voedaha bak. Labi laha ame dam lam Alat ozom di gi voomnat modem bak. Labi laha ba im vamdesu neà bak meedamda vàmtea buà na vabak.
13Dam bakda ahebu im ahat futom im fait. Abo koei esum bake le duzum di koei ahana fai naum bakti uloho bak. Labi laha dam bakda ahebu im gagom di iso kibuli meia vagemoho damat modem bak. Labi laha dam bakda labe im aubehà meia im gagom di feàtàdam labe mei ee vousaha bak fa vàhàdedam bak. Abo ozbat meia veeme geàdume vàhàdem bakti uloho bak.
14Labi laha dam bakda ahebu, ‘Mei fà beose,’ lahame meia uloom bakti meia ahu adat teidi fakem bakti tadehe damat meedam bak.
15Labi laha dam bakda ahebu gi mei taho otelo àhàki meedam damat modem bak.
16Labi laha ibi iho iuba lam di modi bohudi vàhàdedume geàda. Iuba lam di neo ame baket meeda. Labihadam damat modem bak.
17Ba dam amomoiti ot vahiame neàna esdam vaba gi ot fakiame meedam damat modem bak.
18Labi laha ba Ala bake ahu adat iedi vou baedam vab damat modem bak.”
19Meit Alat Vameadaha Im Toedahana laba labihasu toedume esuhemu iho ozom, “Ba im dam bakda nim im vamdesu meedamda vàmtea buà ba na vabak,” laham bak lam im ozobohu bak. Alat aham di iube Aho Musa bake lab gagu fi hasi vàmadi esuhu Im Feàna zi lam, “Ulohodesu meedale,” lahame lab gagoho bak lam gi iba Yahudi dam bake toedume esuhu bak. Labihàmu iho nehi ab ozoham bak. Im dam bakda ahebu Alat iba vàlu neha, “Iho faina meedaho. Beom bak,” lahame iba gagodam bak lam im meidavat abo Yahudi dam modeo, Yahudi damat modem vab dam modeo, ba nehi gagom biem damat modem bak. “Im abo im vamdesu meedam dam im am bak,” lahame ba labihasu fa daetesu gagom biem bak. Alat Aho iba aame ozom di im gi ahebu, “Faideho,” lahame vàlu gagom bak tadehe bak.
20Eho gi neham bak ozome uba labi gagoho bak. Meit gi ame Im Feàna lam ulohodesu meedam bohu meedam labe Alat ba ame da laba neha, “Im vamdesu meedam dàt modem bak,” lahame ozahit deeli gagu vadam vabak. Fa gi neham bak. Ame Alat lab gagu fi hasi vàmadi esuhu Im Feàna zi lam iho vi ozoi vi ozoidume im ozobohu labe iho neha, “Ame Im Feàna zi lam iho meedaha vaba im abo faina meedam dam im am bak,” lahame im naedamat it ozobohudemna modem Im Feànat modem bak.
21Eho etei lab gagoho bakta am. Lahana Alat neha, “Im vamdesu meedam damat modem bak,” lahame meia ozahit deeli gagu vadam di Aho ba Alat Musa bake gagu aho toedume fi hasi vàmadi esuhu Im Feàna zi lam, “Iho ulohodesu meedào? Meedam vabao?” laham bak laba ahumdi vou faodume ba meia gagu vadam vabak. Alat meia ozom di, “Im vamdesu meedam dàt modem bak,” lahame ozahit deeli gagu vadam bak lam gi fa veimdi ab gàhàdi esuham bak. Alat iba deeli gagu vadam bak abo gàhà bak lam ame Musat lab toedume fi hasi vàmadi esuhu Im Feàna zi lamti dam ahamda Alat vameadaha im aime fa dam bake ahate vameaidaha dam zi lamti iho toedume esuhu Alam im lam ame gàhà bak lam fet nasi ozobohudi tau gagodam im ehe bak.
22Ame im gàhà bak neam bak. Meit Yesus Kristus bake tu vuzehi meedam labe Alat ame da laba neha, “Im vamdesu meedam dàt modem bak,” lahame ozahit deeli gagu vam bak. Neham bak. Im dam bakda ahebu faina meedam damat modem bak. Labi laha Alat Aba Aho ozoho bak lam, “Emti uloholi feà damalese,” laham bak laba im ahebu ba vou fum vabak. Labiha labe Alat ba, “Yahudi dam ame? Yahudi damat modem vab dam ame?” lahame ba dam faheme vadam vabak. Gi Yesus Kristus bake tu vuzehi meedam dam ahebu deeli gagu vadam bak.
23(3:22)
24Lahana iho faina meedàmu Alat iba beom bak lam Aho iba ozahit deeli im neà bak modi esuidam Alat modem labe Aho Gagu Fihasi Vimteme Oluhu Dat Boehàda abo Yesus iba olu Am vasea lam iba gohalehe labe ame bak lam fa faamome ab vei neàdeham bak. Labihasu meedam Alat modem labe iba ozome gagom di Aho gi neha, “Im im vamdesu meedam damat modem bak,” lahame ozahit deeli gagu vadam bak.
25Neham bak. Amu Yesusat eloho vab di iube damat lab faina meedam bak lam Alat di labe ame dam lam beodaha vabak. Am gi laha vou faodam Alat modem labe gi teohet aalahigeàmoho bak. Labiham labe damat ozo, “Alat ame dam lam beodào? Beodam vabao?” laham bak biem labe vedi, “Ahole modem vab Alat modem bak,” lahame git ozodam bak. Lahana Am abo ahole modem Alat modem bak lam tombalelo Aho ahit nehaha bak. Iho dam bakda faina meedàmu, “Alat iba faki beom bak lam fa gohali ot vai eloi vasea veàtoi neàdese,” lahame Alat Am Adat Yesus lam iba dam bakdate olu damat oteme Am vasea veàtoho bak. Labihàmu iho ame Da Yesus bake tu vuzehi meedameam làhà Alat iba ozahigeàmu vei neàdem bak am bak. Labi etei di nibe damat Yesus bake tu vuzehi meedàmu Alat ozahigeàmu vei neàdi ame dam laba neha, “Um im vamdesu meedam damat modem bak,” lahame ozahit deeli gagu vadam bak lam Am ba git modem vaba gi ahole meedam Alat modem bak. Ame bak lam tombalelo Yesus iba ahit olu ot vai Am eloi vasea veàtoho bak.
26(3:25)
27Labihàmu uho ozom, Alat etei iba neha, “Im im vamdesu meedam damat modem bak,” lahame lab ozahit deeli gagu vadam bak lam iho it ozome daetbadam neà? Vabà! Ba ihimo it ozome daetbadamna vabak. Neham labe labihadam biehe bak. Ba meit gi dat ahamda Musat lab toedume fi hasi vàmadi esuhu Im Feàna zi lam ulohodesu meedam labe Alat ame da laba neha, “Om im vamdesu meedam dàt modem bak,” lahame ozahit deeli gagu vadam vabak. Gi iho Kristus bake lab tu vuzehi meedam bak labet Aho iba ozahit deeli gagu vadam bak.
28Labihàmu eho uba ab gagoham bak. Alat iba neha, “Im im vamdesu meedam damat modem bak,” lahame ozahit deeli gagu vadam bak lam gi Kristus bake lab tu vuzehi meedam bak labet labihaha bak. Ba ame fi hasi vàmadi esuhu Im Feàna zi lam ulohodesu meedam bak labet Alat ba iba deeli gagu vadam vabak.
29Um Yahudi dam nehi ozodam damat modemo? Alat gi um Yahudi damta deeli gagu vada. Labi Yahudi damat modem vab dam lam ba Alat deeli gagu vadam vabak. Um gi labihasu ozodam damat modemo? Làhà, um git ozoho bak. Alat laha Yahudi damat modem vab dam lamti deeli gagu vadam Alat modem bak.
30Neham labe eho uba labi gagoho bak. Im Ala gi vàmtea bak. Ame Ala labe Aho Yahudi dam labe ibi iho Kristus bake tu vuzehemeam làhà Aho ame dam laba, “Um im vamdesu meedam damat modem bak,” lahame ozahit deeli gagu vadam bak. Labi laha Yahudi damat modem vab dam labe iho Kristus bake tu vuzehemeam làhà Aho laha ame dam laba deeli gagu vadam bak.
31Labihàmu eho etei neha, “Iho Kristus bake tu vuzehi meedam labe Alat iba deeli gagu vadam bak,” lahame lab gagoho bak lam uho git nehi ozoe moio? “Làhà, Alat Aho Musa bake lab vameadume aho toedume fi hasi vàmadi esuhu Im Feàna zi lam iho gi vanamai voomnat mode taia?” lahame uho labi ozoe moio? Vabà! Uho a labihasu ozomule. Ba gi vanamai voomnat modem vabak. Iho etei Kristus bake lab tu vuzehi Alat iba deeli gagu vadaha bak lam gi ame toedume fi hasi vàmadi esuhu Im Feàna zi laba tau, “Ahole modeho,” lahame gagodam bak.