Dual Panel1Ga ip, Gayus, ai bunarsus ims nesiktene. Ai Angtane sanbak jemata ajei tebabilirim, surta aaiserem ga is ai tulisulbono ibe.
2Am afelna ai is ajes nesiktenerem, ai tousa uwu imnaiserem is waakenfer folbana. Ai sembayang as gwebabana Uwa Sanbagirfe, jega waakena seyafter gemerserem imnip is ga sege etamwebana jeber-jeber, ane aamei waakenfer ga is gwena bwerna is jam folbayan, uwu ilemana is gemer folbanaram.
3Ini amna ase saaser-saaserfer folbana, nem afelen mesna afwer jei jam aa galap ge forobityerem amnibe. Jei ai ga asene towastana enggame, "Gayus bunarsusfer Uwa Sanbagiri mes nesiktene. Ane jeime taterisi bunarsusfer aaiserem Uwa Sanbagirmana jeber-jeber jeter onsobuwena."
4Ini amna ase saaser-saasersusfer se folbana, afa ai enggam jam agam sararam, angtane ai ajes towas-towastababilirim enggalfe jei Yesus gam ne tebaf, jei seyafter ga enggam gam naawena, jei taterisi bunarsusfer aaiserem Uwa Sanbagirmana jetefener ne onsobuwena jeber-jeber.
5Am afelna ai is ajes nesiktenerem, awelna Uwa Sanbagiri ip aa jes gulbanaram, aamei awelna jeiserem ga waakenfer is gwebili. Aamei nem afelen mesna imnip aa jei ge forobuwetyaram, aamei imes batobaabili, aamei safe angtane jeiserem teisyena.
6Jei jemata enggam mes ne towastababili im temawer, "Gayus jei nems nesiktababili." Jei jam aa galap ge forobuwetyaram, aamei jei im batobaabuwena enggalfe, ini Uwa Sanbagirmana saaser-saasersusfer gam folbaf. Galgala seyafter jei aa jes ne balbabilirim, aamei jeiserem igam kitulmini jega jei waakenfer ga gangge sofobili.
7Jei tamna jelemana mes ne mirtetefala enggalfe, taterisi Yesusem temawer jeiserem jewer gane nasbinennef, ane angtane Yesus jam tebayanaiserem angtane jeiserem jam ne batobaabiyen.
8Jega jem temawer nei angtane Yesus nejeya tebanaram, nei ga nem afelna jes galserem ga jam nesa batobaabili. Afa nei angtane jeiserem jam nesa batobaabilirim, gam jega nei awelna seyafter nesa gwebili jebar taterisi bunarsusfer aaiserem Uwa Sanbagirmana jes nasbinennefe.
9Ai surta amsam tulisulmini jemata Yesusmanaiserem jebe, ane surta jeiserem jebe ga enggam ai balbabili, "Aamei nem afelna imnip forolaiserem ga jam isa tebabili waakenfer." Jengga Diyotrefes jei bai jam sarbife. Diyotrefes jei jena jam gaartef angtane sanbaka galserem. Jei ai as balfe jam sarbayan.
10Ai jam ajep fornaram, kapkaiserem jei aa jes eyebilirim ga as nasibene. Kapka jei aa jes eyebilirim ga enggam: Jei taterisi afaf-afafaiserem jes nasbili nem temawer. Ane jetefeneryan, jei nem afelen mesna aa jei ge forobuwetyaram, jei jam tebabiyen jelem jenabe. Ane angtane nelem afelen mesna aa jei ge forobuwetyaram aa jei ne tebabuwenaram, Diyotrefes jei enggam balbabili, "Safnant, angtane jeiserem ijama tebabiyen!" Ane angtane nelem afelen mesna aa jei ge forobuwetyaram aa jei ne tebabuwenaram, Diyotrefes jei jemata Yesusmanaiserem jewer jam gam surbobili.
11Am afelna ai is ajes nesiktenerem, angtane kapka aa jei ne eyebilirim, aamei angtane jes galserem ijam onsobaabiyen, jengga aamei waakenaiserem ga jeter is onsobili. Angtane waakena aa jes ne eyebilirim, angtane jes galserem jeiba Uwa Sanbagirmanam. Angtane kapkaiserem aa jes ne eyebilirim, angtane jes galserem jei Uwa Sanbagiri jam ne towaswebayan.
12Aamei Demetrius se teba waakenfer, ane ga is batobana. Angtane seyafter jei Demetriusem temawer enggam ne bala, "Jei waakena." Gwela jemna waakena jeiserem nei ga nes jem towastababili enggame, jeiba angtane waakenam. Ai mese aime angtane enggammer aya balbabili, "Demetrius jei angtane waakena." Ane aamei enggam ims towaswena taterisi ajesa nasbilirim jeba bunaram.
13Taterisi amniwer anesus ai safe ibe is ajes towasulbofe, jengga ai surta aaiserem jebe seyafter ajam tulistababiyen. Ai enggam ai gunu suratem je safnant,
14aam temawer abakefyan nei ga nesa dorwena, ane jepga waakenfer ga nesa nasowena. (1-15) Ai enggam ai gunu ini imna is samfer se folbana. Im afelen mesna aaf seyafter gemerserem jei enggam is ne bala, "Kelek, waakenfer se nwin!" Aamei am afelen mesna taterisi amnaiserem daamfen-daamfennemer ga jes is bilipmini enggame, "Kelek, waakenfer sa gwe!"