Dual Panel1Hukumu Nabi Musa aa jes tulistababilim jeba uwufennam Taterisi Waakena aa jei jelam. Jeiserem ga jafner destabana nele Kristusmana ibirmiserem. Hukumu Nabi Musa aa jes tulistababilim, je ga sapi tane ane domba tane aawisi ga nes jem temawer towastababili. Aawisi jeiserem ga Uwa Sanbagirf ne kitulbono, jengga aawisi jeiserem jei angtane jam batobaabiyen. Angtane jeiserem jei ga aawisi gane kitulbono Uwa Sanbagirfe tahunu anesus, jengga jei Uwa Sanbagirem nwenabe masef, jei angtane waakenfe jam ge etamwebiyen. Aawisi jeiserem etam-etama kapka jemna jam wirtabaipmiyen.
2Ane afa enggam, angtane Uwa Sanbagiri Jei aa jei ne pujitenerem, afa jei bunarsusfer aawisem fwater ne wirtabaabili etam-etamawer, jei gamjon etam-etamem temawer ini kapka gamjon jam ne entebiyen. Ane gamjon Uwa Sanbagirfe jei aawisi jam ne kitulboyon.
3Jengga enggam, aawisi jeiserem jam gane kitulbonorom tahunu jeber-jeber gemerserem, jei ga etam-etama kapka jemna jam wirtabaipmiyen. Ane gam gane eyebilirim, jei etam-etama kapka jam ne dirinswebiyen, jei jeber-jeber gane sarbistaabonwena.
4Ga enggam, sapini giri ane kambing aawisi je fasfasus etam-etama kapka jam wirtabaabiyen.
5Jega jem temawer, Kristus Jei ogiri aaiserem jebe Jame aa galap fortyantam, Jei ga Uwa Sanbagiri ga aa balant: "Aamei sapini yo kambing aawisi baif Im gwebabili, ane apgal jigala afweraiserem, jes mese Ibe Is jes ne kitulbofe. Jengga Aamei tifni seyafter Amnaiserem Ap As Imes gulbana enggalfe, Ina Ijes bilirim jeiserem Ai Agam eyebif.
6Aamei ini Imna saaser-saaserfer Is jam folbayan domba tane aa jes ne giranbaabisinirim jeme, afa kambing aawis mese, enggalfe etam-etama kapka angtanemana jem wirtabaabife.
7Jepga Ai Kristus Ai ga gutena, 'Ai aaf Ai nwini enggalfe, Ai Aamei Ijes bilirim jeiserem Ai Agam eyebif. O Uwa Sanbagiri, taterisi jeiserem ba mesam tulisul Am temawer Taterisi Imnaiserem jebe.'"
8Gwanan Kristus Jei Uwa Sanbagiri enggam balant, "Aamei sapini yo kambing aawisi baif Im gwebabili, ane apgal jigala afweraiserem jes mese aa jes ne kitulbonorom enggalfe etam-etama kapka jem gane wirtabaabife. Safe apgal jigala jeiserem ga jep gane tulistaabil Hukumu Nabi Musamanaiserem jep aa jes ne tulistababilim jebe, ini Uwa Sanbagirmanaiserem jigal-jigala jeiserem jeme jam saaser-saaserwebayan."
9Kristus jepga Uwa Sanbagiri aa balant, "Sya, Ai aaf Ai nwini enggalfe, Ai Aamei Ijes bilirim jeiserem Agam eyebif." Gam jega Kristus Jei nele fwatermanaiserem jepga borola, ane nele ibirmiserem jem ga aa fwayenulu.
10Yesus Kristus Jei mes eyebili Uwa Sanbagiri aa jes bilirim, ane jega jem temawer nei etam-etama kapkaiserem jewer ga nes mes ne wirtabaabili. Jei tifni seyafter Jelemanaiserem Jena mes gera daamfenfener jamer abak-abaksus enggalfe etam-etama angtane seyafter gemerserem jemna gam wirtabaipmif.
11Nunu jeber-jeber imama seyafter jeiserem jei awelna jelemanaiserem ga gane eyebili enggalfe, apgal jigala Uwa Sanbagirfe gam kitulbofe. Jengga apgal jigala seyafter jeiserem Uwa Sanbagirfe aa jes gane kitulbowenaram, jei jeme etam-etama kapka angtanemana jam wirtabaipmiyen.
12Jengga Kristus Jei Jen Jena daamfenfener gerant enggalfe etam-etama kapka jem wirtabaabisife. Jei Jen Jena aa jewer gerantam Jei ga etam-etama kapka seyafter ga jem wirtabaabisinint jamer abak-abaksus. Jepga Jei Uwa Sanbagirem taasfolawer ga aa sofwant, ane Jei jep ga aa nwintena.
13Kristus Jei jeber nwini jamere Uwa Sanbagiri Jei ginanggwana Kristusmanaiserem se gwebabili, jamer jei sege kabuwili Jelem tof gwonabe, ane jep ga sege jubobili.
14Jei Jena Jam aa galap gerantam daamfenfener, Jei ga jeme etam-etama angtanemana ga mes wirtabaipmisini. Jei ga jeiserem ga aa eyebili, jega angtane waakenfer ga sege etamwebili Uwa Sanbagirem nwenabe jamer abak-abaksus.
15Ane Mafnana Uwa Sanbagirmanaiserem Jeime nes balbabili jeiserem jem temawer. Jei gwanan ga enggam gunu:
16"Tuhan Jei ga enggam gunu: 'Nunu galap aa je fortyaram, Ai taterisi ibirmi ga As bilipmini jebe enggalfe, Ai angtane jeiserem Agam gwebabif jega jei hukumu Amnaiserem jem temawer waakenfer ga sene sarbili, ane jei jelem iniber ga sene eganulsini.'"
17Ane Jei gamjon ga gutena: "Ai etam-etama jemna seyafter gamjon Ai Ajam sarbabistaabonyan."
18Ane afa Uwa Sanbagiri Jei etam-etama jam se wirtabaabisinirim, gam jega apgal jigala fasfasus gamjon jam ne kitulboyon Uwa Sanbagirfe enggalfe etam-etama kapka jem wirtabaabife.
19Ga jem temawer am afelen mesna, namwer nei nejama ereyen jam kawetefe Mwona Waakensususerem Uwa Sanbagirmana jebe, aam temawer Yesus Jei mes tere nem temawer.
20Gwanan Jei aa galap terentem, kaina unggwan-giri Jena Uwa Sanbagirmana jep ga aane bitnetini, ane nele ibirmi Uwa Sanbagirminip ga aa sartabana. Nele ibirmi jeiserem gwela angtanef ga je golmini.
21Ane Kristus Jeiba Imam Sanbagirsususerem nemnam. Jei angtane seyafter Uwa Sanbagirmanaiserem jem Sanbakef nwini.
22Jega jem temawer, au, nei Uwa Sanbagiri ganma gwetmantaasi, bunar aaiserem nesa waakenulsini nelem inibe, ane nei nejama ereyensus. Nei gam nesa eyebili, aam temawer nei bunarsusfer nemsa towaswena enggame Kristus Jei mes tere etam-etama nemna nes jam wirulmife, ane ini nemna ga nesege waakensweipmini. Ane Jei neime nes mes wirtabaabili fona waakenaiserem jeme.
23Nei gwanba nemsama gunu enggame nei Uwa Sanbagiri nei mesma tebana. Nei ga gemer nesa fibili Uwa Sanbagiri ginggitfer negama tebana, aam temawer Uwa Sanbagiri Jei bunar-bunarsus se eyebili Jena aa gam gunurum.
24Nei nena ganma gaaramisnenne nei nena fomfom nesa batominenne enggalfe, nena negama nesiksonanafe ane waakenaiserem ga nesa eyebili.
25Nei nejama tikweyan daamfennaber betwefe, angtane afwer galserem jei aa gam ge tikwebilirim. Nei nemsa towaswena enggame Nunu unggwandusa Kristusmono je mes gwetmanswetya. Jega jem temawer, au nei bunarsusfer ini nelemana nen nena ganma kanausonanna.
26Afa nei taterisi Kristusmana bunarsusferaiserem jam negama sarbilirim, ane ga negama taabili, jengga nei bai nejama tikwefe nunu jeber-jeber etam-etama kapka jam eyebiliwer, gam jega gamjon nele ga fas etam-etama kapka nemna gamjon nes jem wirulmife.
27Jepga nei ga erelmer nesa nwini nunu jem temawer, nunu umwef jemserem Uwa Sanbagiri angtane aa jem waksosisirim, angtane waakenfer eyebiliserem ane kabwakfer eyebiliserem. Ane nei nesa eremini tokwagiri ginanggwana Uwa Sanbagirmanaiserem aa jei giranbaabisinirim.
28Afa angtane jei Hukumu Nabi Musa aa jes tulistababilim jeber-jeber jam gam ayebilirim, jepga angtane ga gane jenbebili, naura afa nawer-ningna. Jei ga gane balbabili enggame, angtane gwanan jeiserem jei bunar hukumu jeiserem mes ayebili afa fas. Afa bunar, waakenaiserem jep jam ne gulbayan. Jei ga gane safsaftana jamere gam tere.
29Bai se etamwesa angtane enggam aa jei gam eyebilirim: Jei gwanan Tane Uwa Sanbagirmana Jes gam onsobana, jengga jei gamjon galap enggam gam gunu, "Aiba Tane Uwa Sanbagirmanaiserem Jem ginanggwasam." Ane gamjon gam gunu, "Aawisi Yesusmana etam-etama kapka amna as jei wirulbonorom, Uwa Sanbagiri ai as gemer balaram, aawisi jeiserem ga aawis teten, jemna baabeta fas." Ane fomfoma afa angtane jeiserem nimnafer gam nasowena Mafnana Uwa Sanbagirmanaiserem jem temawer, Mafnana jeiserem Jei nes waakena aa gam golminirim Uwa Sanbagirminiwer. Gamjon bai se etamwesa angtane jeiserem jemnibe? Jei gam domola jem fwaina kabwaksususerem.
30Nei nemsa towaswena ba Tuhansam enggam aa Jei gunurum, "Ai Aner As gulbana fwaina kapkaiserem angtane kapkaiserem jebe." Ane Jeime aa gunu, "Ai As balbabili angtane Amnaiserem, afa kapka aa jei ne eyebilirim, jemna fwaina kapka ga As golmini."
31Aamei bunarsusfer erelmer isa nwini, afa Uwa Sanbagiri aa Jei nwinirim jam is nasbabilirim, ane fwaina kapka ga is golmini.
32Sa sarbistaabon nunu gwananmanaiserem aamei nafa Uwa Sanbagirmana igalaba domolbanantam, ane Kristus gwanan igalaba tebanantam. Jes galapserem angtane nafsi jei ga kabwaksususerem ip ne eyeipminint, jengga aamei kanaufera finant.
33Angtane jei uskambar ge nasbawenant nimnafer im temawer. Jei jeiserem ga angtane uskambar jem nwenap ne eyebilint. Ane jei kapkaiserem ip ne eyeipminint. Ane nunu nafsiserem, aamei jegme imsa batobaabilint angtane tamtamtala gala aa jei ne domolaram.
34Aamei ima nesiktababilint, ane ima batobaabilint angtane Yesus aa jei ne tebanaram, ane ga aane katabuntenant bwiyibe. Angtane nafis galgala imna is galap ne tamserenbaipminintim aam temawer aamei Yesus ijewera tebanaram, jengga ini imna ise saaser-saasermer ge folbaminint. Ini imna ise saaser-saasermer sege folbamini, aam temawer aamei imsa towaswena enggame apgal jigala waakensususerem is mes ne menetabaipmisini, ane apgal jigala jeiserem ga jesege falbili abak-abaksusfer.
35Ga jem temawer, aamei ijama ereyen, jengga kanaufer isa fina Yesus ga jamer igalaba tebasinirim. Jepga aamei ga fwaina isa domola waakensususerem.
36Kanaufer gasa fya baabeta Jemnaiserem jemfener, ane ga isa eyebili Uwa Sanbagiri aa jes bilirim jam eyebife. Jewer ga aamei fwaina waakena ga isa taabili, fwaina Uwa Sanbagiri is jes bilipminintim jam golmife.
37Taterisi Uwa Sanbagirmana jep ga enggam baatultel: "Abakferyan, nunu unggwanferyan, Angtane aa jei foryalaiserem, Jei gase fortya.
38Angtane aa jei ne eyebilirim Ai Ajes bilipminirim, jei gase naawena Am tefner sene tebasini. Jengga jei afa angtane daamfenna jemniwer jam se irfwenaram Ams onsobalawer, ini Amna gamjon saaser-saaserfer As jam folbayan angtane jeiserem jem temawer."
39Jengga nei enggalyan angtane aa jei gangge irfwebilirim Uwa Sanbagiri Jam onsobalawer, jei galserem nei galyan. Angtane jeiserem jei ga tamtamtala kabwaksusu gane domola. Jengga nei Uwa Sanbagiri nemsa tebana, ane Jei nes mes waakentababisini.