Dual Panel1Jei enggam ga balbabili, "Aamei seyafter, aya mese ane uwa mese, ai as imsa sarbasi! Ai aamei isa ajam balbabili enggame, ai aaf ajes eyebilirim jeiserem kabwakyan."
2Angtane unggwanfer jeiserem Paulus jame aa galap ne sarbanaram Ibrani olem jama nasowenaram, jei ga aa ge tikwebili jam ge nasbawelawer. Paulus enggam ga balbabili,
3"Ai angtane Yahudimanam, kota Tarsus je ai surnunt, ona Kilikya je. Jengga kotana Yerusalem aaiserem ai ajep unggwan-girswenant, ane guru Gamaliyel ai ga as jei towas-towastanant Hukumu Nabi Musa gwanan aa jes tulistababilim jem temawer. Ai an ana aner amsam gerant Uwa Sanbagirfe, aamei seyafter namwer aas igemera gwenaram in ina ima tetent Uwa Sanbagirminibe aime gemer.
4Ane ai kapkaiserem ai eyebilint jamer angtane ga aa ge terbilint, angtane Nele Tuhanmana aa jei ne tikwebaatinintim. Ai wi anggwa mese ai tebabilint, ane ga ai katabuntenant bwiyibe.
5Imam sanbagirsususerem ane Safna Angtane Yahudimana Sanbak-sanbaka Seyafter Gemerserem jei aamei is jei sene towastababili enggame, 'Angtane aaiserem bosna Paulus, jei bunarsusferam nasouna.' Angtane seyafter jeiserem surat-surta ap ne kitulbonont, surta aa jes ne tulistabaipminintim jelem afelen mesenfe kota Damsik je aa jei ge nwinbenennerem. Jep ga angtane taterisi Yesusem temawer aa jei ne tikwebaatinintim, ai angtane jeiserem safe ajam tebabif enggalfe kota Yerusalemwer gam aftabuwef, jewer gam tamtamtababif."
6Paulus gamjon ga balbabili, "Kota Damsikwer agalap gwinantam, ai kotana jeiserem jam ai gwetmansonantam gwere bolap, nafa aafer-aafer ga iretyant winsiwer, jam bwere-bwerewena am tarnabe.
7Jepga ai jenant onabe, ane taterisi ga ai sarbilint enggam aa je gutenaram, 'Saulus, Saulus, aamei kapka Ap As ibaf eyeibene?'
8Ai ga ai tenebanant, 'Aamei nansa, Tuhan?' Jei ai ga as tamawolbanant enggame, 'Aiba Yesusam, angtane Nasaretmana, kapka ijep eyeibenerem.'
9Am afelen mesna ai ajebara jelaram, jei nafa jeiserem mes ne domolant, jengga taterisi Jei aa jes bilirim jei jam ne sarbiyen.
10Ai ga ai tenebanant, 'Tuhan, ai bas as eyebili?' Tuhan ga as tamawolbanant enggame, 'Se irwe, ga is gwina kota Damsikwer! Jep ga Ai aamei jewer ga isAs towastatna seyafter Uwa Sanbagiri aa jes bilirim aamei ijes eyebife.'
11Jes jepserem ai ajam anggayan, nwena amna as jam ne matnebanant, aam temawer nafa uskambarsus. Am afelen mesna ai ajebara wofenantam, tafnawer ga asene tebasfele, ga asene aftawenant jamer kota Damsiko.
12Damsik je angtane aasaje bosna Ananiyas ga jep nwini. Jei Uwa Sanbagiri bunarsusfer tikwebaatini, ane jei Hukumu Nabi Musa aa jes tulistababilim ga waakenfer sarbili. Ane angtane Yahudimana Damsik je aa jei ge nwinbenerem jei enggam ne bala jei angtane waakena.
13Ananiyas jei amnip ga jelant, jei am gwetmanaber ga fyatetyant, ga as balant, 'Saulus am afelna, nwes fersonnu, ga is anggasini!' Ane jes jeberserem ai gamjon ga ai anggasini, ga ai Ananiyas ga ai gerebanant.
14Jei ai ga as balant, 'Uwa Sanbagiri asal-asal nemnaiserem aa Jes ne pujitawenaram, Jei aamei is mesam destabana enggalfe, aamei igam towaswebif Uwa Sanbagiri Jei aa jes bilirim. Ane enggalfe aamei Yesus igam damtaf, ane taterisi Jei Jener aa jes bilirim igam sarbif.
15Aamei taterisi jeiserem jam is sarbili, jega aamei gam is nasbili angtane seyafter jemnibe, taterisi Yesusem temawer seyafter ijes damtabilirim, ane ijes sarbabisinirim.
16Aamei baf fya? Tatarmer se irwe, is gane baptiste, ane etam-etama kapka imnaiserem ga jam is wirulu, sembayangam ijep gwebanaram Tuhanem boseme.'"
17Paulus gamjon ga balbabili, "Ai kota Yerusalemwer ai warautnantam, ane ai sembayanga agalap gwebanantam Jena Uwa Sanbagirmanaiserem jebe, jes galapserem ai eserem jam damtala gemerserem gam ga ai domolant.
18Ai Tuhan ga ai damtanant, ane Jei ga ase enggam balant, 'Tatarsus, aamei kota Yerusalem is mirsona, aam temawer angtane aafmana jei taterisi imna Am temawer is jam ne taabiyen.'
19Ai ga ai tamawolant, 'Tuhan, jei mes ge towaswebili enggame, ai gwanan amsam wofowenant jena angtane Yahudimana aa jep ge betwebuwefaram aa gemer denennerem, ane angtane Aamei Is jei ne tebanaram ga ai tebabinennent, ga ai bokolntenant bwiyibe, ane jep ga ai safsaftababuwenant.
20Angtane bosna Estefanus jeimba taterisi Imna jeyam nasibenenne jei aa galap ne munbonontom, ai mese aiba ajebam finant. Ane ai mese ai gununt, sya jei sa munbo. Ane angtane Estefanus aa jei ne munbonontom, fene jemna ga am tarnap ge falipminint, ane fena jeiserem ga ai gerebaipmisnennent.'
21Jengga Tuhan Jei enggam gununt, 'Se sofwe, Ai ims bala, se sofwa angtane Yahudimanyan bijaususup aaiserem jemnip.'"
22Angtane unggwanfer jeiserem jei taterisi Paulusmana ga aane sarbasini jamere ula umwef aa jei biltenaram jamer taban. Jengga jepga angtane jeiserem ga aa ge tetenbili enggame, "Angtane aaiserem jei sa munbo, aam temawer jei ogiri aaiserem jewer jam ge gwisi, jei waakenfer jam gweyan!"
23Jepga jei aa ge tetenbili, bajunu jelemanaiserem ga aane fasawolnanna, ane sona bolap ga aane fasawolsowena, aam temawer jei jam ge kakalswebili.
24Jega jem temawer ginanggwam sanbaka ga aa balbabili Paulus jam ne aftawef markasabe enggalfe, Paulus jewer gane tenebaf kakalmer, ginanggwa sanbaka jeiserem gam towaswef jeje bafa angtane unggwanfer baf ge tetenbuwena Paulusem temawer.
25Jengga Paulus jame aa galap ne tafernaram, ane naawa utuboroserem jem gane safsaftaf, Paulus angtane sanbaka 100 ginanggwamana jep aa jei finaram ga bala, "Aaf ke enggam fala angtane Romamana nalefe jam ne tenebayan jei waakena gam eyebili afa kapka, jengga gwanan ke jam gane safsaftana?"
26Angtane sanbaka 100 ginanggwamana jeiserem jame aa galap sararam enggame Paulus jeiba angtane Romamanam, jei ga aa gwina jelem sanbakminibe, ga aa tenebana enggame, "Aamei Paulusfe bas is eyeibene? Jeiba angtane Romamanam."
27Ginanggwa sanbaka jeiserem ga gwina Paulusminibe, ane ga tenebana enggame, "Aamke bunarsusfer angtane Romamana?" Paulus ga tamawola, "Bunar. Aiba angtane Romamanam."
28Ginanggwa sanbaka jeiserem ga enggam gunu, "Ai doini unggwanfer pemerinta Romamanaiserem jep amsam gaarmini enggalfe ai agam gwef warga Romafe." Jengga Paulus ga gunu, "Wargana jeiserem aiba jewermanam, aam temawer aiba angtane Romamanaiserem agalfam surnunt."
29Jes jepserem ginanggwana Paulus safe jei ne tenebafe, ga aa ge gubisini jemniwer. Ane ginanggwa sanbaka jeiserem jegme aa erne, aam temawer jei enggam towaswena, "Paulus nei nejesa tafernaram, jeiba angtane Romamanam."
30Ginanggwam sanbaka jeiserem enggam gunu, "Ai ajam towaswef angtane Yahudimana bas ne kakalswebili Paulusem temawer." Jega jem temawer, ona jama nafwenaram, jei ga balbabili Paulus sa gaasaarste bwiyiwer. Ane jei gamjon ga gunu, "Angtane imam-imam sanbakaiserem ane Safna Angtane Yahudimana Sanbak-sanbaka Seyafter Gemerserem, angtane jeiserem seyafter gemerserem jam sege betwebili." Jepga jei Paulus ga aa aftawena jemnibe, ane Paulus jem tarnap ga fina.