Alkitab Mobile SABDA
[VER] : [BERIK]     [PL]  [PB] 
 <<  Kisah Para Rasul 3 >> 

1Nunu daamfenna jeme jema ga nawer-ningna, Petrus Yohanesfar ga aa ge sofna Jena Uwa Sanbagirmanaiserem jebe, sembayanga gam ne gwebaf angtane nafsiserem jebar. Nunu jeber-jeber jema ga nawer-ningna, angtane sembayanga ga jem ne gwebabuwena.

2Jes jepserem angtane muli-mulni aasaje ga jep nwini. Jei muli-mulinmer surnu. Nunu jeber-jeber angtane nafsiserem jei ne girinfelwena mwa totiyele Jena Uwa Sanbagirmanaiserem jebe. Mwa totiyele jeiserem bosna ga aas, "Gerbang Waakensusu". Angtane aa jei gangge kabwitewenaram Jena Uwa Sanbagirmanaiserem jebe, jei doini jemniwer aa gam aber-aberwebaipmini.

3Angtane jeiserem Petrus ane Yohanes jame aa galap domsonaram jei aa ge kautenaram Jena Uwa Sanbagirmanaiserem jebe, jepga jei ga aberwemini doife.

4Jame aa galap ge damtanaram, Petrus ga bala, "Ams gaarami!"

5Angtane jeiserem ga gaaramini, ane jei enggam ga gunu jelem inibe, "Doini as namwer sege gulbana abe."

6Jengga Petrus enggam ga bala, "Ai doini fasfasus, jengga amnibe aaiserem, ai ga is jes as gulbana ibe. Yesus Kristus angtane tamna Nasaret Jem bosem, gase irwe, ga is wofena!"

7Jepga Petrus tafna jemna taasfolawer ga tainbene, ane ga batobana jam gaartefe. Jes jeberserem angtane jeiserem tof mese molele jemna ga aa ge kanausweibene.

8Jepga fostafna ga fina, ane ga wofena, enggam se gwil enggam se jal. Ane Petruso Yohanes jebaner seyafter ga aa ge kabwitena Jena Uwa Sanbagirmanaiserem jebe. Jes jepserem jei aa jep wofnaram, jei ga fostafe-fostafowena, ane jei Uwa Sanbagiri ga pujitene taterisi aaiserem jeme, "Uwa Sanbagiri Aamei waakena!"

9Angtane unggwanfersus jep aaiserem jei seyafter angtane jeiserem ga aane damtana jei jam wofena, ane Uwa Sanbagiriserem ga pujitenenne.

10Jei jam aane damtanaram, ga aa ge gubili enggame, "Ba bunaram angtane aaiserem jeiba doife aa jei aber-aberwoufaram, mwa totiyelebe bosna 'Gerbang Waakensusu' jep aa jei nwinwefaram Jena Uwa Sanbagirmana jebe!" Angtane seyafter uskambar ga aa ge bitbitwebili aa je etamwenaram angtane muli-mulni jeiserem jemnibe.

11Jepga jes jepserem angtane jeiserem jei Petruso Yohanes gemer taamisini jei nawer-ningginsamer jam aa galap ge forobityerem tampata bosna "Serambi Salomo" jebe, angtane seyafter gemerserem jewer jei tampata jeiserem ga aa ge nunggirbuwena, aam temawer jei seyafter gemerserem jam ge bitbitwebili.

12Petrus angtane unggwanfer jeiserem jame aa galap damtabilirim, jei ga balbabili, "Wa angtane Israelmana, jeje bafa bwembwema aaiserem ga ima bitbitwebili, ane jeje bafa aamei ai ga as ima gerebaabili? Aamei ilem inip ipsama gunurum enggame, angtane aaiserem aa jei wofenaram, jei am baabetem wofna. Ane aamei ipsama gunurum jei aa jewer wofonaram aam temawer ai Uwa Sanbagirfar waakenfer ai ge gwena. Wowo, gamyan.

13Uwa Sanbagiri nei seyafter neJesa pujitawenaram, Jei baabetabara. Jeiba Uwa Sanbagiri Abrahammanam, Isakmanam, Yakubmanam, ane asal-asal nemnaiserem jes mese jemnam. Uwa Sanbagiri Jei baabeta yo nafa Jemna Yesusf mesam gulbawena, Yesus Angtane awelna Uwa Sanbagirmana aa Jei gweyibenerem. Angtane jeiserem ga Yesus, aamei Jei imsa gaarminintim angtane sanbakf aa jei naawenaram jebe. Jepga aamei kapkaiserem ijesa nasbilint Pilatusem tarnabe Yesusem temawer, Pilatus jei Yesus safe jam aftannuf.

14Jei etam-etam kapka fas, ane ini Jemna tabalbalsusu, jengga aamei Pilatus enggam ima balant, 'Yesus sa daktanswena ti salibibe! Ane angtane afelnaiserem jei ga ap is aftamunnu, angtane jeiserem jei angtane nafsi mes munbono.'

15Jengga Yesus Jei nem Sanbaka. Jei waakenfer gwelaiserem jamer abak-abaksus nes Jei golmini. Aamei Jei imsa munbonont! Jengga Uwa Sanbagiri gamjon Jei mesam irtestenant angtane jam tereserem jemniwer. Ane ai aner ames ge domolant jeiserem.

16Baabeta Yesusmana angtane muli-mulni aaiserem ga jem waakensona. Aamei seyafter angtane aaiserem ga imsa damtana, ane aamei seyafter jei imsa damdamtaasini. Yesus angtane aaiserem mes waakentana im tarnabe, aam temawer ai Yesus ames ge tebana.

17Am afelen mesna, ai namwer ga enggam ai towaswena, aamei ane angtane sanbak imna, aamei ijesa eyeibenentem Yesusfe, aamei jeiserem fas ijama towaswebiyen ibasa eyebilint.

18Uwa Sanbagiri fwater mesam nasbil Mesiasem temawer. Mesias Jeiba Angtane Uwa Sanbagiri bunarsus aa Jes balam Jam baftanaf enggalfe angtane gam waakentababisif. Nabi-nabi aa jes ne nasbilim jeme, Uwa Sanbagiri enggam bil, 'Angtane jei Mesiasfe tamtamtala unggwandusaiserem sene gulbasa.' Am afelen mesna, aamei Yesus igalaba munbonontom, taterisi jeiserem Uwa Sanbagiri aa jes bilim ga mes tabanwenant.

19Ga jem temawer, gasa tikwe etam-etama kapkaiserem jewer, ane ga isa warauwa Uwa Sanbagirminibe, jega Jei ga etam-etama imna is gase wirtabaipmini.

20Ane Tuhan jam se fortyaram imnibe, ane Jei ini imna ga is gwebaipmini waakenfer is jam ge folbamife. Ane Uwa Sanbagiri Jei ga Yesus se bala imnip jem foryafe, aam temawer Uwa Sanbagiri Jei Yesus enggalf mesam destabal Yesus Jeiba Mesias nemnam, gwela waakena nep nes Jei golminirim jamer abak-abaksus.

21Jei taman waaken-girip se nwini jamere Uwa Sanbagiri Jei seyafter ibirmi se eyebaabili, gwanan aa gemer gulum nabi-nabiminiwer.

22Nabi Musa jei mesam gul, 'Uwa Sanbagiri Jeiba Tuhan imna. Jei angtane se baftana im tamnawer, ai as gam baftanaram. Aamei Jam isa sarbana, seyafter Jei ibe aa jes nasipminirim.

23Angtane taterisi nabimana jeiserem jam ne taabiyeneiserem, angtane jes galserem sene surbobili angtane Uwa Sanbagirmana jemniwer, ane ga sene tamtamtababili.'

24Ane nabi seyafter gemerserem, Samwel mese ane seyafter aa gemer naawelam jes galapserem, jei seyafter ga aaiserem jes ne nasbil, namwer aa je etamwenaram.

25Uwa Sanbagiri aa jes bilipmilim nabi-nabi aa jes ne nasbilim, jeiserem jeba ibam bilipmil. Ane taterisi Uwa Sanbagiri gwanan aa jes bilipmilim asal-asala imnaiserem jebe, taterisi jeiserem jeba imnam. Uwa Sanbagiri Abraham ga enggam bal, 'Anggwabura seyafter gemerserem ogiri aaiserem jebe, jei waakena Alamanaiserem ga sene domola, asal-asala imnaiserem jewer.'

26Jega jem temawer, Uwa Sanbagiri Jei Tane Jemna ga Jen destabal, Jei imnip gwanan Jei foryaf, jega Jei waakena Jelemanaiserem ibe is gase golmini. Aamei seyafter etam-etama kapkaiserem jewer ijewera tikwenaram, Uwa Sanbagiri waakena Jelemanaiserem is jem kitulmini ibe."


  Share Facebook  |  Share Twitter

 <<  Kisah Para Rasul 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel