Alkitab Mobile SABDA
[VER] : [BERIK]     [PL]  [PB] 
 <<  Markus 14 >> 

1Nunu gamjon ga naura angtane masar Paskana ga jem sene eyebili. Masara jeiserem jeba masara bosna ga enggam, "Roti Tanyanaiserem jem Tombaabif". Angtane imam-imam sanbakaiserem ane guru-guru Hukumu Nabi Musamana aa jei ne towas-towastababuwenaram, jei nele ga aane terelbene Yesus basyamer jewer ne tebafe, gane munbof.

2Jengga jei enggam ge gubili, "Nei Yesus nejama tebayan masar aaiserem aa jep falaram jebe, aam temawer afa nei Yesus namwer jam nesa tebanaram jam munbofe, angtane seyafter galap sege kakalswebili, ga sege erebili."

3Yesus aa galap nwinirim tamna Betanyam je, Jei Simonem jenap nwini. Simon jei mes waakensona tifin bwerna unggwandusa aa jei folbanaram jewer. Yesus Simonem jenap aa galap twenaram, wini aasaje ga jela Yesusminibe. Jei botola tuna pualam eyebiliserem ga jes gwirni. Botola jeiserem minyak wanginibere, minyak wangini jeiserem jemna ninsini waakensusu, jemna hargana unggwanfer. Yesus jam aa galap nwintenaram jam twenfe, wini jeiserem botola gwora ga terewulbaastena, Yesus dukap ga sukutono minyakeme.

4Angtane afwer jep aaiserem jei ga aa ge uskamswebili, ane jei jena ga aane gitminenne enggame, "Jeje bafa wini aaiserem minyaka jeiserem ga suwulsnenne?

5Minyaka jeiserem hargana unggwanfer ga enggam doini angtane aa jes gam orobanaram tahunu daamfenneme. Waakenfer ga enggam, jei minyaka jeiserem jam se jualtana, ane doini jeiserem angtane galgalyenaiserem jep gase kitulmini." Jepga wini jeiserem ga aane nasbili kakal oleme.

6Jepga Yesus angtane jeiserem ga balbabili, "Safnant! Aamei wini aaiserem jem temawer kapkaiserem ijama nasbiyen. Jemna awelna jeiserem jei samfer eyebili Amnibe.

7Angtane galgalyenaiserem jei jeber-jeber ibar ima nwinwena, aamei jeber-jeber enggam ima eyebuwena ini imna is jam gangge folbaminirim jes batobaabife, aamei jei igama batobaabili. Jengga Ai ibar abakef seyafter nejama nwinweyan.

8Wini aaiserem jei Ap As mes eyeibene, jei aa jes bilirim jam eyebife. Jei minyaka mes suwulntena tifini seyafter Amnaiserem jebe enggalfe, jei Ai As jam menetaasini Ai kuburup Ajebar falinonf.

9Ai bunarsus aamei is Ajam towastababili, Taterisi Waakenaiserem ogirip aa jep ne nasbinennerem, wini aaiserem jei Ap aa jes eyeibenerem, taterisi jeiserem angtane sene nasbinense enggalfe wini aaiserem gane sarbistaabonf."

10Yudas Iskaryot, angtane daamfenna dua belas jemniwer Yesus aa jei ne tikwebaatinennerem, jei ga sofwa angtane imam-imam sanbakaiserem jemnibe enggalfe Yesus jep gam gaarmif jei ne tebafe.

11Angtane imam-imam sanbaka jeiserem jei taterisi jeiserem jam aa galap ne sarbilirim, ini jemna saaser-saasersusfer ge falipmini. Jepga jei Yudas ga aane bala, "Ai doini ip is asa gerbana." Jepga Yudas ga towaiwena dwona ga aa terelbene Yesus jep jam gaarmife.

12Nunu nabal-nabalsusu jemserem masara Roti Tanyana jem Tombaabif aa jem falaram, nunu jes jemserem angtane Yahudimana dombana bastantouya ga jem ne tegila, masar Paskanap jes ne tombafe. Nunu jes jemserem angtane Yesus aa jei ne tikwebaatinenewenaram jei Yesus ga aane tenebana, "Jena ga fwera Aamei Ijep gunurum, ai tumilgal Paskana Ibe Is ajeba menetabaibaasife Aamei Ijes tombaabife?"

13Jep ga Yesus angtane naura ga bafsona, enggam ga gitmini, "Im ge sofwe aaure kotanap, ane aamei angtane fona aa jei disultenaram jebar ga isa dorwena. Angtane jeiserem ga jes is ge onsobana,

14jamere jena jei aa jep kawetanaram jebo. Angtane jena jam jemanserem ga is ge bala, 'Guru ims tenebaf, mwona Amna ga fwersa tumilgala Paskamana Ajeba tombaabife, angtane Amna Ai As jei ne tikwebaatinennerem jebar?'

15Jepga angtane jeiserem jei mwona unggwandusa bolap jeiserem ga is destaipmini ibe. Tikar, meja, ane kursi mes menetababisini mwona jeiserem jebe. Tumilgala Paskamana nei nejesa tombaabiliserem, aamei ga jep is ge menetulsini."

16Angtane nawana jeiserem ga aa ge sofwa kotana jeiserem jewer. Ane jep ga seyafter ga aa ge damtabili Yesus aa gemer nasmisiwenaram. Jena jeiserem jei tumilgala Paskana jep ga aa ge menetulsini.

17Ona aa gwinswelam, Yesus mese ga aa ge forobiyel angtane dua belas Jei aa jei ne tikwebaatinenewenaram jebar.

18Ane Jei jame aa ge nwinbetenaram jam dwenfe, Yesus ga balbabili, "Ai bunarsusfer aamei isa Ajam towastababili, aamei aas ijeya nwinirim, angtane daamfenna imniwer jei Ai As jei se gera ginanggwaminibe. Angtane jeiserem ga Abar aa jei ge twenanaram."

19Angtane Jei aa jei ne tikwebaatinennerem jes gamserem gam jam aa ge sarbilirim, ini jemna seyafter ga aa ge jenbamini, ane jepga Yesus daamfen-daamfennem ga aane tenebawena, "Angtane Ijes balaram, bunarsusfer nansa, ke ai?"

20Yesus ga aa gutena, "Angtane daamfenna aamei dua belas imniwer, angtane rotini Ajebar ge ustababitowenaram pirni daamfennaiserem jebe, angtane jeiserem jei Ai ga Ase jei se gera.

21Ai Tane Angtanemana, As tere aa gemer tulisulum Taterisi Uwa Sanbagirmanaiserem jebe. Jengga galap kapka unggwandusa se etamwefa angtane Ai aa jei geraram jemnibe. Afa angtane jeiserem jam suruyonaiserem, jei samfer."

22Jei jame aa galap dwenaram, Yesus rotini ga goltena, ane Uwa Sanbagiri ga bala, "Ase samfer gulbana." Jepga rotini jeiserem ga bitabaabisini, angtane Jei aa jei ne tikwebaatinennerem jep ga kitulmini. Yesus ga balbabili, "Gasa tebabi! Rotini aaiserem jeba tifni seyafter Amnaiserem."

23Jeiserem taban, Yesus ga gamjon mangkona fo angguruboro ga goltena, ane Uwa Sanbagiri ga bala, "Ase samfer gulbana." Ane angtane Jei aa jei ne tikwebaatinennerem jep ga golmini. Ane jei seyafter gemerserem fo anggur jeiserem ga aane telbili.

24Ane Yesus ga balbabili jei, "Fo anggur aaiserem jeba aawisi Amnaiserem As jei tenbenteyalaiserem Amniwer angtane unggwanfer gamserem jem temawer. Ane jega jem temawer Uwa Sanbagiri Jei taterisi ibirmi aaiserem angtanef ga jes bilipmini enggame, Jei etam-etama kapkaiserem angtanemana gam wirtabaipmini, ane Jei angtanes eyebaabili enggame angtane Jelemanfe gam ge etamwebif."

25Yesus jepga gunu, "Ai bunarsusfer ims towastababili, Ai gamjon fo anggur Ajam telbiyen, jamere gamjon ibirmiter As telbili, nunu Uwa Sanbagiri aa jep gwesaram anggwabura seyafter gemerserem jem Sanbakfe jeme."

26Jepga jei simala ga aane twolbabili taban, jei ga ge sofobili taarentumu bosna Saitun jewer.

27Jepga Yesus angtane Jei aa jei ne tikwebaatinennerem ga balbabili, "Aamei seyafter isa nunggiri Amniwer, Ai As isa mirtetefala, aam temawer Taterisi Uwa Sanbagirmanaiserem jep ga enggam baatultel: 'Ai Angtane dombana aa jei gerebaabisnennerem, Angtane jeiserem As munbono, ane dombana ga sege syensyanwebisi.'

28Jengga Ai gamjon Ajep irwenaram terewer, Ai aamei ga isAs danabaabili ona Galileyaminibe."

29Petrus jei ga gutena, "Angtane seyafter saf sege nunggirbene Imniwer, ai ajam nunggiryen."

30Jepga Yesus Petrus ga bala, "Ai bunarsus ims towastana, gwini aaiserem nalef ayanga giriserem nawerfer jei jam guteyan, aamei Ai ga Asis baanbaanwebana nawer-ningginfer."

31Jengga Petrus Jei Yesus ititmer tamawolbana, "Safe gam ai Ibaner as ge tere, ai enggam ajam guyon, ai teisyena Aamei." Ane angtane Jei aa jei ne tikwebaatinennerem seyafter jeime jes gemerserem gemer ge gubitena.

32Yesus ane angtane Jei aa jei ne tikwebaatinennerem seyafter ga aa ge sofobili tamna bosna Getsemani jewer. Ane Yesus ga balbabili, "Aamei seyafter aaf sa nwinte! Ai gwanan Uwa Sanbagirfe sembayanga Age gwebaba."

33Afwer jeber ge nwinbene, Yesus ga Petrus, Yakobus ane Yohanes jei ga balbabili jes aftabifelfe. Jepga Yesus Jena ga entene ini ga towaiwebana ini jam jenbafe uskambar.

34Yesus ga aa balbabili, "Ini Amna Ase uskambar jenbana, Ai Ana enggam Ai entene Ajam tere gamserem. Aamei aaf isa nwini, ane ga isa gerasnenne."

35Jepga Yesus ga gwisini bastantowaifer, Jei Jener ga jena onabe. Ane Jei ga Uwa Sanbagirfe sembayanga ga enggam gwebana, "Uwa, Uwa Amna, afa samfer etam-etama aaiserem Ai bai Ajam gwirinfe. Uwa, Aamei seyafter samfer Igam eyebili. Tamtamtala uskambar aaiserem Amniwer se golsteya. Jengga Aamei Ipsam eyebilirim Ai Ajes bilirim, jengga Aamei Igemer gunurum, ga jeter Is eyebili."

36(14:35)

37Jepga Yesus gamjon ga warautna angtane nawer-ningna jeiserem jemnibe, Jei angtane nawer-ningna jeiserem ga damtabili jei nus ge tabana. Yesus Petrus ga aa bala, "Simon, aamke nustana? Aamke imasef unggwasa ijam gerebaasnenefe jema daamfenna?"

38Yesus gamjon ga balbabili, "Aamei jam isa gaarasnenewena, ane sembayanga ga jam isa gwebabuwena, jega etam-etama kapkaiserem bawasa is jes bilipminirim ibe, etam-etama jeiserem ijam eyebiyen. Aamei ga waakena tefner gam isa eyebili, jengga tifini seyafter imna werna."

39Yesus gamjon naurabaraiserem ga sofna, sembayanga Uwa Sanbagirfe Jam gwebabafe gwanan gemerserem.

40Yesus gamjon Jame aa galap warautnaram, Jei gamjon ga damtabili angtane nawer-ningna jeiserem nus ge tabana. Jei nwena masef ne unggwasbabana, nwena jemna daran-darna jam ge gaarabisife. Jei teisyena Yesusfe bas ne bilibefe.

41Abakferyan Yesus gamjon ga aa warautnaram nawer-ningnabarfe, Jei ga aa balbabili, "Aamke nunu ke igemera tana? Maa! Jema ga mes nulayal: Ai Tane Angtanemana, Asene gera angtane etam-etamabara jem tafnabe.

42Jasa irwe! Au, nei ganma gwi! Angtane Ai aa jei geraiserem, jei aare mes foryal aafe."

43Yesus ga gemer nasowena, angtane dua belas Jei aa jei ne tikwebaatinennerem, angtane daamfenna jemniwer bosna ga Yudas jei ga fortya. Angtane unggwanfer jebar aa jei ge forobityerem, jei nombeya bwalna gane erbili, ane jeime tini bwalna unggwan-gwansus jes ne erbili. Angtane imam-imam sanbakaiserem, ane guru-guru Hukumu Nabi Musamana aa jei ne towas-towastababuwenaram, ane angtane sanbaka Yahudimana, angtane unggwanfer jeiserem ga jei ne baftabili Yesus jam ne tebafe.

44Yudas, angtane Yesus aa jei geraram, jei angtane unggwanfer jeiserem fwater balbabili enggame, "Angtane ai ajes aalumbonorom, Angtane jeiserem aamei ga jes isa tebana. Ane Jei ga isa aftafala ginanggwana ga jamer sene gerebaasnenne."

45Yudas jam aa galap fortyaram, jei tatarfer Yesusminip ga gwina, ane ga bala, "Guru." Jepga jei ga aalumbono olbumube.

46Jepga Yesus ga aane tebana, ginggitfer ga aane tebasnenne.

47Jengga angtane daamfenna Jem gwetmanap aa jei finaram, jei nombeya ga fotoltena, angtane awelna imam sanbagirsususerem jemnip aa jei gwebilirim ga aa ge aafwebana jam tegilfe, jengga imwana tefner targabaasini jamer te.

48Yesus jepga aa balbabili, "Aike angtane komkoma, aamei ga nombeya bwalna ane tini bwalna unggwan-gwana, aamei Ai jem ga As ima forobatya jam tebafe?

49Ai nunu jeber-jeber Ai im tarnabe towas-towastababuwefa Jena Uwa Sanbagirmanaiserem jebe, jengga aamei Ai jep Ase ijama tebayan. Taterisi Uwa Sanbagirmana jebe, nabi enggam ne tulistaabil seyafter aaiserem ga jamer se etamwena."

50Jepga angtane seyafter Yesus aa jei ne tikwebaatinennerem, jei Yesus ga aane mirtetefala, ga aa ge nunggirbene.

51Jepga angtane daamfenna Yesus ga jei tikwebaatini, jei ga kain tefner egwaitana tifni jena jemfener matasini. Angtane jei jam ne tebaf,

52jewer ga jei kaina jeiserem soktasini, ane ilyak-ilyaksamer ga nunggiri.

53Angtane Yesus aa jei ne tebanaram, jei Yesus ga aane aftafala imam sanbagirsususerem jem jenabe. Angtane imam-imam sanbakaiserem seyafter gemerserem, ane angtane sanbaka Yahudimana, ane guru-guru Hukumu Nabi Musamana aa jei ne towas-towastababuwenaram, jei seyafter mes ge betwebili.

54Petrus jei Yesus amunuwer onsobananna. Jei bijautowaifer wofna, jamere imam sanbagirsususerem jem ja sitabo. Petrus jei polisini Jena Uwa Sanbagirmana aa jei ne gaarabisnenewenaram jebar ge nwinbene. Jei ga nwintena tokwa eyebe, tafna jam sarsarsofe.

55Angtane imam-imam sanbakaiserem ane Safna Angtane Yahudimana Sanbak-sanbaka Seyafter Gemerserem, jei angtane enggalaiserem jes ne terelbaabili, angtane taterisi nimnafer nasowelaiserem Yesusem temawer. Jei Yesus jam ne munbof. Jengga Jemna kapkaiserem daamfenna afa jam ne damtabiyen.

56Angtane unggwanfer taterisi ol kabwak aa jei ne balbabiwenaram nenes-nenesmer, ane daamfennaber jam falyan.

57Jepga angtane afwer ga aa ge irwebili, ol kapka syefer ga aane nasbabili Yesusem temawer. Jei enggam ge nasbawena,

58"Ai amsa sarbana Jei enggam gunu, 'Ai Jena Uwa Sanbagirmana angtane unggwanfer aa jes ne gwitiririm, As wirulsini. Ane nunu nawer-ningginfenna gamjon ga jem As gwitiri ibirmiter, angtane jam ne gwitiryen gala.'"

59Taterisi angtane jeiserem jei aa jei ne nasbabilirim jes mese, taterisi jeiserem daamfennaber jam ne nasbiyen.

60Ane imam sanbagirsususerem jei angtanem nenennap ga irwena, ane Yesus ga tenebana, "Aamke taterisi aaiserem ke Ijam tamawolbiyen? Aamei Ibas nasbifi taterisi syefer aaiserem jem temawer?"

61Jengga Yesus Jei ula daamfenna afa Jam bilteyan; Jei Jam tamawolbayan. Imam sanbagirsususerem gamjon ga tenebana, "Aamke Mesias, Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif? Aamke Tane Uwa Sanbagirmana, Uwa Sanbagiri aa jes ne pujitenerem?"

62Yesus ga tamawola, "Aiba Jesam. Ane aamei seyafter Ai As isa damtasa, Ai Tane Angtanemana, Ai Uwa Sanbagirem taasfolawer Ase nwinsi, Uwa Sanbagiri Jei baabetsusu. Ane Ai As iresanya winis sinsinibaner taman waaken-giriwer!"

63Jepga imam sanbagirsususerem jei Yesusmana taterisi jeiserem jam aa galap saribenerem, jei ga kakalswena, fene jemna ga aa taayimbetena, ane ga bitaimbaasini. Ane jei ga gutena, "Tabana ga aaf! Jei Uwa Sanbagiri mes imei-imeitana! Ai gamjon angtane nafsi ajam sarbayan.

64Aamei iner imsama sarbana Angtane aaiserem enggam gunu, 'Ai Uwa Sanbagirfar As ge nwini Sanbakfe.' Jeiserem kapka angtane gam aa jei gunurum! Aamei ifomfoma gunu?" Jepga angtane seyafter jes gemerserem ga aane bala, "Yesus Jei taterisi kabwaksusu gam biltena, Jei jasa munbo, jamer futu!"

65Jepga angtane afweraiserem jei ga aa ge towaiwebili Yesus makem aane gwebana miribe. Ane jei nwena Jemna fenbiteme ga aane faarebana jamer mat, ane ga aane safsaftana, ane jei enggam ga aane bala, "Sya, Aamei ai asIm towastababi Aamei Is nane safsaftana!" Ane angtane Jei aa jei ne gerebaasnennerem, jei mese jeime Jes ne safsaftana.

66Petrus nomkef jep aa jep finaram sitawer. Ane yafonsiwiri imam sanbagirsususerem awelna jemnip aa jei gwebilirim, jei Petrusminip ga jela.

67Ane wini jeiserem jei Petrus ga damdamtana, Petrus jei tokwa eyep aa jep nwinirim. Ane wini jeiserem ga bala, "Petrus, aameiba Yesus Angtane tamna Nasaretmanaiserem, aameima tikwebaatinenewena."

68Jengga Petrus jei ga jam baanbaanwena. Jei ga gunu, "Ai Angtane aaiserem ai teisyena. Ane ajam towasweyan aamei ibas bili." Jewer Petrus pagar mwa tarnap ga gwina. (Jes jepserem jepga abakefyan ayanga giri ga gutena.)

69Wini jeiserem Petrus gamjon jama damdamtana, jei angtane aa jei ge fibilirim jem gwetmanabe ga balbabili, "Angtane aaiserem jeiba Yesusfar jeyam ge wofobuwena."

70Petrus gamjon ga baanbaanwena. Jepga abakefyan angtane jewer aa jei ge fibilirim, Petrus ga aane bala, "Petrus, aamei bunar-bunarsus Yesusfar ba aameima wofowena, aam temawer aamei mese aamei angtane ona Galileyamana."

71Jes jepserem Petrus jei jena ga enggam gaarstenanna Uwa Sanbagirem tarnabe, "Angtane aamei ijesa nasbanaram, ai bunarsusfer Angtane jeiserem ai teisyena. Afa ai syefer as nasouna, Uwa Sanbagiri Jei ai ga as babapsobana!"

72Ane jes jeberserem ayanga giriserem ga gutena nawerfer. Jepga Petrus taterisi ga sarbistaabona taterisi Yesus gwanan aa jes nasibenentem jebe. Jei taterisi jeiserem ga saribaastabona enggame, "Nalef ayanga giriserem nawerfer jam guteyan, aamei Ai ga Asis baanbaanwebana nawer-ningginfer." Ane jepga Petrus ini jemna ga jenbana, ane uskambarsus ga syena.


  Share Facebook  |  Share Twitter

 <<  Markus 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel