Alkitab Mobile SABDA
[VER] : [BERIK]     [PL]  [PB] 
 <<  Yohanes 10 >> 

1Yesus Jei seisya taterisi aaiserem ga nasbili, "Ai taterisi bunarsusfer aaiserem isa Ajam nasipmini, angtane domba jenabe aa jei gam kautenaram pagara jam gam taramiswenirim, jei mwonawer jam kauteyan, angtane jeiserem jeiba komkom anggwasam.

2Jengga angtane mwonawer aa jei gam kautenaram, angtane jeiserem jei ga angtane dombana aa jei gam gerebaabisnennerem.

3Angtane mwona aa jei gam gerebaasnennerem, jei mwona ga gam tertebaasini jebe. Jei ga gam kautena, ane dombana jelemanaiserem ga gam jenbebili bosna jelemanaiserem daamfen-daamfenneme. Domba-dombana jeiserem jei ga gane sarbana, ga gane onsobana, ga gangge tobitintye domba jenawer.

4Angtane jeiserem domba-dombana jam gam tosobaabistenaram, jei ga gam danna. Domba-dombana jeiserem ga gane onsobana amnuwer, aam temawer jei fwater gane towaswebili taterisi gulu jemna.

5Dombana jei angtane nafsi jam ne onsobayan. Jengga enggam jei jemniwer jam gangge nunggirbene, aam temawer jei taterisi gulu angtane nafsi jemna jam ne towaswebiyen."

6Yesus Jei seisya taterisi jeiserem ga jes towas-towasulmini jebe, jengga jei jam ne sarbiyen Yesus Jei bas seisyawulmini.

7Yesus gamjon ga aa balbabili, "Ai taterisi bunarsusfer aaiserem isa Ajam nasipmini, Aiba domba jena mwa kautelaiserem jes galserem.

8Angtane seyafter gwanan aa jei ge forobityerem mwa kautelabe Ai nalef Ajam foroyan galabe, jei ga seyafter komkom anggwa. Ane domba-dombana jei taterisi gulu jemna jam ne saripmiyen.

9Aiba mwa kautela galserem. Angtane Am tarasamer aa jei gam kautenaram, jei ga jes gane waakentababisini. Jei gam kautena, gamjon gam totintye, ane jei tumilgala gane domola, ane afweraiserem jes mese.

10Komkom anggwa jei ga galfener gangge forobitye komkoma jep gane gwebif, ane gane munbobif, ane gane kabwaktababif. Jengga Ai ga enggalf Ai fortya, angtane gwela waakenferaiserem jewer gam ne domolf, enggame waakenfer gwelaiserem jamer abak-abaksus.

11Aiba gembalna waakenaiserem. Gembalna waakena ini jemna samfer gam folbana jam terf domba-dombana jelemanaiserem jem temawer.

12Angtane awelna gembalaf aa jei gam gweyibenerem nomkefener, jei gembalna waakenyan. Jengga jei dombana enggalfener gerebaabisnenne jega doini gam taabif, ane domba-dombana jeiserem jei jemanyan. Jei twen kakala jam gam damtanaram, jei domba-dombana ga gam mirtetefala, ane ga gam nunggiri jemniwer. Jepga twena kakala jeiserem jei dombana ga gam jerbene, ane afweraiserem ga gam irwalwena.

13Angtane awelna gembalaf aa jei gam gweyibenerem nomkefener, jei ga gam nunggiri, aam temawer jemna awelna doifener gam gwebili. Jei domba-dombana jeiserem jei jam nesiktababiyen.

14Aiba gembalna waakenaiserem. Uwa Amna Jei Ai As waakenfer damdamtaasini, ane Ai mese Uwa Sanbagiri waakenfer Agemer damdamtaasini. Ane jes gemerserem aaiserem jegme gemeram, Ai domba-dombana Amna Agam damdamtababisini, ane jeime Ai As mes ne damdamtaasini. Ini Amna samfer As gam folbana Ajam terf jem temawer.

15(10:14)

16Ane domba-dombana nensa afweraiserem jeime Amnateram. Jei domba jena aaiserem jep jam naaweyan. Domba-dombana jeiserem jeime As aftabifelse. Jeime taterisi gulu Amna Asene saribese, ane jei seyafter daamfennaber gase naawesa gembalna daamfenna jebar.

17Uwa Amna Jei Ams nesiktene, aam temawer Ai tifni seyafter Ana jewer geraram jam terfe, ane jepga gamjon ga Ai As irwefa.

18Angtane afa fas Ai As jam ne munboyon, afa Ai Aner As gunurum jam terfe. Ai Ana Alem imer ga As gera jam terfe. Ai baabetabara Ai Ana jam gerfe enggalfe Agam terf, ane Ai baabetabara enggalfe gwela jeiserem gamjon Ajam taabife. Uwa Alemanaiserem ga As Jei bala Ai seyafter jeiserem Ajes eyebife."

19Ane angtane Yahudimana jep aaiserem jei gamjon ga aa ge doksobana, aam temawer Yesus Jei game aa jewer gutenaram.

20Jepga angtane uskambar jei ga enggam ga aa ge gubili, "Jei bwata kapkaiserem ga jei kabwana. Jei Jam fafal-fafalwena. Jeje bafa aamei Jei ga ima sarbasini?"

21Jengga angtane afwer ga enggam ge gubili, "Angtane bwat kapka aa jei gam kabwatyaram jei game jam nasouyan. Bwat kapka jei ke angtane nwe kofaiserem jei ke gam waakentana jamer jei gamjon gam anggasini?"

22Ane jes galapserem ona ga wisimem fala, ane angtane kota Yerusalem je masara ga aane eyebili. Masara jeiserem enggalem temawer ne eyebili, jei Jena Uwa Sanbagirmanaiserem ga jes ne sarbistaabona jame aa galap ne waakenulsilim.

23Yesus Jei Jena Uwa Sanbagirmana ga jep wofena mwona bosna Salomo je.

24Angtane Yahudimana anesus aa galap ge betwebilirim Yesusem tarnabe, jei enggam ga aane tenebana, "Aamei am tarnabe waakenfer ga fonggalabara Is nasouna? Aamei bunarsusfer as jamer se towastababi, Aamke Mesias, Angtane Uwa Sanbagiri bunarsus aa Jes balam Jam baftanafe, afa fas?"

25Jepga Yesus ga aa tamawolbaabili, "Aiba ibe is Amesam bilipmini, jengga aamei jeiserem ijama taabiyen. Bwembwema Ai Ajes eyebuwenaram Uwa Amnaiserem baabeta Jemnaiserem jeme, jeiserem jei Alem temawer ba jesam destabili.

26Aamei domba-dombana Amanyan, jega jem temawer aamei Ai As ijama tebayan.

27Domba-dombana Amnaiserem jeiserem ga aas: Angtane Ai As jei ne tikwebaatinennerem, jei botona Amna Asene saribene. Ai jei As damdamtababisini, ane jei ga Asene tikwebaatini.

28Ai waakenfer gwelaiserem jamer abak-abaksus As golmini jebe, ane jei jam ge terbiyen jamer abak-abaksus, ane angtane nafsi Am tafnawer jam tamserenbiyen.

29Uwa Amnaiserem Abe As jei kitulbonorom. Jemna baabeta unggwandwasusu angtane seyafter gemerserem jemniwer, ane angtane nafsi Jem tafnawer jam tamserenbiyen.

30Ai ane Uwa Amnaiserem Ai Jebar daamfennaber Ai ge nwini."

31Ane jepga angtane Yahudimana tuna gamjon ga aane kitultena jei Yesus jem ne munbofe.

32Jengga Yesus Jei ga enggam balbabili, "Aamei bwembwema anesus Ai Ajes eyebaabuwenaram imesma domola. Ai bwembwema jeiserem Ai baabeta Uwa Sanbagirmanaiserem ga Ajam eyebaabuwena. Bwembwema seyafter jeiserem ga fwersa aamei As ijewera munbofe?"

33Angtane Yahudimana jeiserem jei ga aa ge tamawolbili, "Jeke enggam bwembwema Ijes eyebaabuwenaram toneme ga Isa jem temawer asa munbono, jengga enggalem temawer Aamei Uwa Sanbagiri Ijewer imei-imeitanaram. Aamei safe angtane tefner, jengga Aamei Ina enggam Im bala 'Aiba Uwa Sanbagirsam.' Aamei jes gemerserem Ijewer gunurum, Aamei Uwa Sanbagiri ga Ijes imei-imeitana."

34Jepga Yesus ga aa tamawola, "Taterisi Uwa Sanbagirmana jep ga enggam baatultel, Uwa Sanbagiri ga enggam gul, 'Aamei Uwa Sanbagiri galserem.'

35Nei nemsa towaswena enggame Taterisi Uwa Sanbagirmana jam se falaram jamer abak-abaksus. Ane angtane taterisi Uwa Sanbagirmana aa jei ne taayibenerem, Uwa Sanbagiri angtane jeiserem ga enggam balbabili, 'Aamei Uwa Sanbagiri galserem.'

36Ane Ai fomfoma, Uwa Amna Jei Ai As mes destabana, ane As baftana ogiri aaiserem jebe. Jeje bafa aamei ga As ima bala, 'Aamei Uwa Sanbagiri Ijes imei-imeitana, aam temawer Aamei enggam Im gunu Aamei Tane Uwa Sanbagirmanaiserem.'

37Afa Ai Uwa Amnaiserem awelna Jemna Ajam gwebiyeneye, gam jega aamei As ijama tebayan.

38Jengga afa Ai Uwa Amnaiserem awelna Jemna Ames gweibelebe, aamei samfer awelna Ai Ajes gwebilirim isa taabili. Safe aamei Ai As ijama tebayan, sa taabi bwembwema Ajes gwebuwenaram. Aamei bwembwema aaiserem isa taabilirim, jega aamei bunarsusfer jem ga isa towaswena enggame Uwa Jei Abar daamfennaber Ai ge nwini, ane Ai Uwafar daamfennaber Ai ge nwini."

39Jei gamjon Yesus safe jam ne temilf, jengga masef, jei jam ne temilyan.

40Yesus Jei gamjon fona Yordan jem jimwer ga aa warauwa, tamna Yohanes gwanan aa jep baptistenentem, ane Jei jep ga aa nwini.

41Angtane ga anesus Yesusminibe aa ge forobiwetyaram. Jei ga enggam ge gubili, "Yohanes jei bwembwema jei afa jam eyebiyen, jengga seyafter Yohanes aa jes bilirim Yesusem temawer ba bunaram."

42Ane angtane uskambar jepmanaiserem Yesus ga aane tebana.


  Share Facebook  |  Share Twitter

 <<  Yohanes 10 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran