Alkitab Mobile SABDA
[VER] : [BERIK]     [PL]  [PB] 
 <<  Yohanes 21 >> 

1Jes jepserem taban, Yesus gamjon Fobogana Tiberyas je, Jei Jena jep ga aa ge sana amnibe, ai angtane Jei ajeya tikwebaatinennerem. Jeiserem ga enggam etamwena:

2Ai angtane Yesus Jei ajeya tikwebaatinennerem ga aya betwena, angtane aaiserem ga aa ge betwebili: Simon Petrus, Tomas enggam aa jes ne jenbewenaram "Nawer Bateneme", Natanyel jei tamna Kana ona Galileyaminiwer jela, ai ane aya amna tane Sebedeusmana, ane angtane naura nensaiserem Yesus aa jei ge tikwebaatinennerem jes mese.

3Jepga Simon Petrus ga as balbabili, "Ai ajam sofwa jigalf." Jei ga aya bala, "Ai is agma onsoba." Ane ai seyafter ga aya sofwa jamer atdusabo aya juswena. Jengga gwini jeiserem jamer onanaf, ai jigala afa ajama fatabiyen somanabe.

4Ona safe aa gemer nafwenaram, Yesus ga dwisip fina, jengga ai angtane Jei ajeya tikwebaatinennerem ai ajama towasweyan enggame Jeiba Yesusam.

5Jepga Yesus Jei enggam ga as jenbebuwili, "Am afelen mesna, jigala afa ke imsa damtabili?" Ai ga aya tamawolbana, "Fas, ai jigala afa ajama damtabiyen."

6Yesus Jei ga as balbabili, "Somana taasfolawer isa firulnu atdusa jewerserem, jes jewerserem aamei jigala ga isa damtabili." Jepga ai somana jeiserem jewer ga aya tobolsini, jengga ai somana jeiserem masef ga aya unggwasbili gamjon ajama dekoltefe, aam temawer jigala jame anesus ga aa ge tarbitinirim somanabe.

7Jepga ai angtane Yesus aa jes nesiktenerem, ai Petrus ga ai bala, "Jeiserem Jeiba Tuhansam!" Jepga Simon Petrus jei jame as galap sarbanaram enggame Jeiba Tuhansam, jei ga bajunu ga aa kamwini, bajunu gwanan aa jes soksosinirim, ane jener ga janton fonabe.

8Ane ai angtane Jei ajeya tikwebaatinennerem afwer ga amnuwer aya onsobatna atdusame, somana jigalabaner jem atdusa jebar samem-samem ga aya dekola jamer dwisibo. Ai dwisiwer ajama bijausweyan, jemna bijauwer enggammer afa 100 meter.

9Ai dwisip jame agalaba batonaram, ai tokwana uma ga aya domsona, ane jigala ga jem sagap ge falbuntena, ane roti mese.

10Yesus Jei ga as balbabili, "Jigala aamei namwer ijesa towanbilirim, afwer imsa erbiyel aafe."

11Simon Petrus atdusabe ga aa tauna, ane jepga somana ga aane dekolwili jamer tufabo. Somana jeiserem jigala unggwan-gwanserem jeme jamer erge-ergesus, ane jigala jeiserem unggwanfer ga enggammer 153. Ane jigala unggwanfer safe gam, somana jeiserem jei jam bitfarweyan.

12Yesus jepga as balbabili, "Au, nei ganma twen!" Ai angtane Jei ajeya tikwebaatinennerem ai seyafter ajama erebene Jam tenebafe enggame, "Aam jei nansa?", aam temawer ai amsa towaswena enggame Jeiba Tuhansam.

13Jepga Yesus ga aa gwina, Jei rotini ga aa kitultena, ane ap ga as kitulmini. Ane jigal mese jegme gemer eyebili.

14Ane aaiserem ga nawer-ningnabaraiserem Yesus Jei ai angtane Jei ajeya tikwebaatinennerem amnibe Jena Jam saafe, Jei terewer safe aa gemer irwenantam.

15Jes jepserem ai jame aa ge tabanswebilirim ajama dwenabe, Yesus Simon Petrus ga aa tenebana, "Simon tane Yonammana, aamei Ai ke Ase bunarsusfer im nesiktene, angtane aaiserem jemniwer jei As gane nesiktenerem?" Petrus jei ga aa tamawolbana, "Bunar Tuhan, Aamei Imes towaswena ai Ims nesiktene." Yesus Jei Petrus ga aa bala, "Domba tane Amnaiserem ga waakenfer is gerebaabisnenne."

16Yesus Jei Petrus gamjon ga aa tenebana, "Simon tane Yonammana, aamei Ai ke Ase bunarsusfer As im nesiktene?" Petrus jei ga aa tamawolbana, "Bunar Tuhan, Aamei Imes towaswena ai Ims nesiktene." Yesus Jei Petrus ga aa bala, "Dombana Amna ga waakenfer is gerebaabisnenne."

17Yesus Jei Petrus nawer-ningnabarfer ga aa tenebana, "Simon tane Yonammana, aamei Ai ke Ase im nesiktene?" Petrus jep ga ini ga aa jenbana, aam temawer Yesus Jei Jam tenebalabe jamer nawer-ningnabarfer, "Aamei Ai ke Ase im nesiktene?" Petrus gamjon ga aa tamawolbana, "Tuhan, Aamei seyafter gemerserem Imes towaswebabili. Aamei Imes towaswena ai Ims nesiktene." Jepga Yesus Jei Petrus ga aa bala, "Dombana Amna ga waakenfer is gerebaabisnenne.

18Ai aamei isa bunarsusfer bala, aamei tanismer gwanan igalap gwenantam, aamei bana iner igam gwelawili, ane aamei ga igam sofwa ina jewer igam gunurum jam sofwefe. Jengga aamei jam ijep bakswenaram, aamei tafna ilemana ga jam is tetefa, ane angtane nafsi jei tafna imna ga isene faarebafa, ane aamei ga isene aftafala tampata aamei baife ijes gwebilirim jewer jam gwife."

19(Yesus taterisi jeiserem gam aa jewer nasbilirim, taterisi jeiserem Yesus Petrus ga jem ge saasini jei fomfom se tere. Jei se tere angtane sene munbono. Ane tere jeiserem jeme, jei ga bosna Uwa Sanbagirmana jem gase gulbatena.) Jeiserem jamer taban, Yesus Jei Petrus ga aa bala, "Au, Amse tikwebaati!"

20Jepga Petrus jame aa galap irfwenaram jelem duruwer, jei jep ga ai Yohanes ga as damtana. Aiba angtane Yesus aJei tikwebaatinirim nafsiserem Yesus aa jes nesiktenerem. (Ai Yesusem gwetmanap ai nwinint gwanan agalaba twenantam, ane ai Yesus enggam aJei tenebasantam, "Tuhan, Aamei Is nane se gera ginanggwaminibe?")

21Petrus ai jame aa galap damtanaram, jei Yesus ga aa tenebana am temawer. Jei enggam tenebana, "Tuhan, jemnibe bai se etamwena?"

22Yesus ga aa tamawolbana, "Afa Ai enggam jam As gunurum, Yohanes gemer se gwena jamere Ai gamjon As fortya, aamei taterisi jeiserem jebe ijam taawiyen. Jengga aamei Amse tikwebaati."

23Jega jem temawer taterisi jeiserem angtane Yesus aa jei ne tikwebaatinennerem jei jener ga aane nasbinenne enggame, "Yohanes jei jam teryen." Jengga Yesus Jei enggam Jam guyon ai as tere, afa ajam teryen. Jengga Jei jafner gunu, "Afa Ai enggam jam As gunurum Yohanes gemer se gwena jamere Ai gamjon As fortya, aamei taterisi aaiserem jebe ijam taawiyen."

24Ai Yohanes, aiba ai amsam gunu taterisi aaiserem jeba bunaram, ane ai taterisi aaiserem ga ai tulistaabili. Ai ga aya towaswena enggame, Jei aa jes bilirim jeba bunaram.

25Yesus aa jes eyebaabilirim nafis-nafsiserem jei ane-anesus. Afa seyafter jeiserem angtane daamfen-daamfenneme jam gane tulistababilirim, ai enggam ai gunu, bukunu jeiserem ogiri aaiserem jep jam ne egantababisiyen, aam temawer bukunu jeiserem unggwanfersus.


  Share Facebook  |  Share Twitter

 <<  Yohanes 21 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran