Alkitab Mobile SABDA
[VER] : [BERIK]     [PL]  [PB] 
 <<  Yohanes 9 >> 

1Yesus Jei jame aa galap wofenaram, Jei angtane nwe kofaiserem ga damtana. Jei galmer surnunt.

2Ai angtane Yesus ajeya tikwebaatinennerem ai Yesus ga aya tenebana, "Guru, jeje bafa angtane aaiserem nwe kofa ga aane gernant? Etam-etama kapkaiserem ke jei eyebilint, afa ene jeta ke jei ge eyebilint?"

3Yesus ga as tamawolbaabili, "Jemna nwena kofa jeke enggam jei etam-etamabara, afa etam-etama ene jetamana. Nwena jemna kofa, jega angtane ga sene domolbana baabeta Uwa Sanbagirmana awelna aa jep gwebilirim angtane aaiserem jemnibe.

4Uwa Sanbagiri Ai As Jei baftannuntum, nei awelna Jemna nafamer nesa eyeibene, onafa gemer aa galap falaram. Abakferyan ona gase gigitswena, ane angtane awelnabe afa jam naaweyan.

5Nunu abakfer Ai ogiri aaiserem jep Ajebar nwinirim, Ai angtane ogiri aaiserem jep aa jei ge nwinbenerem Ai jei Ai As naftabili, aam temawer Aiba ogiri aaiserem jem nafsam."

6Yesus game aa gutenaram, Jei maka onnap ga aa sirstena, ane maka jeiserem ona jebaner ga aa sigwalisulu. Jepga angtane nwe kofa jeiserem nwena jem ga aa gweyimbene,

7ane Jei ga aa bala, "Se gwi, fo mwona Siloam nwena jep ga is wirsotna." (Bosna Siloam igi ga enggam, mesam baftana.) Ane angtane jeiserem ga aa gwina, nwena ga aa wirsona, ane ga aa warauwa jelem jenap waakenfer ga anggasini.

8Angtane jeiserem jelem afelen mesna, ane angtane gwanan aa jei ne damtanaram jafner nwiniserem, ane doif ga gam aber-aberwena, jei jena ga aane tenaaminenne, "Aake jes, angtane jamfener aa jeye nwinwefaram, ane ga gam aber-aberwena?"

9Afweraiserem jei ga aa ge gubili, "Jeiba jesam." Jengga afwer ga enggam ge gubili, "Jesyan, jengga jemna mirmasena galserem." Jengga angtane jeiserem jener ga aa gutena, "Aiba jeisam."

10Angtane afweraiserem jei ga aane tenebana, "Aam je ifomfom etamwena jamer ga imasef anggasini?"

11Angtane jeiserem ga aa tamawola, "Angtane bosna Yesus ona makabaner ga Jei sigwalisulu, ane beteka jeiserem jem ga nwena ga as gweyimbene. Jepga as bala, 'Gase gwi fo mwona Siloam nwena jep ga is wirsotna!' Ane ai jewer ga ai sofna, ane nwena fonabe jam agalap wirsotnaram, ai waakenfer ga ai anggasini."

12Jepga jei ga aane tenebana, "Angtane jeiserem ga fwera?" Jei ga aa tamawola, "Ai ke tousa."

13Nunu jeiserem nunu ga Sabat, Yesus Jei ona makabar ga jem sigwalisulu, ane angtane nwe kofaiserem jem ga waakentana. Jepga jei angtane gwanan nwe kofaiserem jei aane aftawena angtane Farisiminibe.

14(9:13)

15Jepga angtane safna Farisimana jeime angtane jeiserem ga aane tenebana, jei fomfom anggasini jem temawer. Jei ga aa tamawola, "Jei ona makabaraiserem nwena amna ga ase jem gweyimbene, ane ai nwena aner ga ai wirsona, jepga ai anggasini."

16Angtane safna Farisimana afweraiserem ga aa ge gubili, "Angtane nwena aa Jei gweyimbenerem Jei Uwa Sanbagirminiwer Jam jelyan, aam temawer Jei nunu Sabat awelna nei nejema gwebiyeneiserem, Jei awelna jeiserem ga jem eyebili." Jengga angtane afweraiserem enggam ga aa ge gubili, "Jeje fomfoma angtane etam-etamabaraiserem bwembwema enggalaiserem ga gam eyebili?" Jepga angtane ga aa ge wagwagwebili, ane jenjen ga aa ge doksobana.

17Angtane safna Farisimana jei ga angtane gwanan nwena kofa jeiserem gamjon ga aane tenebana, "Aamei ifom gunu ilem inibe Angtane jeiserem jem temawer, Jei nwena imna is Jei waakensobanaram?" Angtane gwanan nwena kofa jeiserem enggam ga tamawola, "Jeiba nabisam."

18Jengga angtane sanbaka Yahudimana jeiserem jei taterisi jeiserem jam ne taabiyen enggame, angtane jeiserem jei gwanan nwe kofam, ane namwer aas jepserem jei ga mes anggasini. Jega jem temawer jemna ene yo jeta ga jewer ne jenmini.

19Jepga jei ene yo jeta ga aane taanaamini, "Tane aaiserem bunarsusfer ke imna, nwe kofmer aa jei surnuntum? Jei namwer fomfoma anggasini?"

20Ene yo jeta ga aa ge tamawolbaabili, "Ai enggame ai ge towaswena tane aaiserem jeiba amnam, ane bunar jei nwe kofmer surnunt.

21Jengga ai ajam ge towasweyan jei namwer fomfom anggasini, ane ai ajam ge towasweyan nwena jemna nane waakensobana. Jenater sa teneba; jei mesam sanbagirswena. Waakenfer jener ge nasbi!"

22Ene jeta angtane jeiserem jei gam aa jewer ge balbabilirim, jei aam temawer ga balbabili angtane sanbaka Yahudimanaiserem ga jes ge erebaabili. Angtane sanbaka Yahudimana jei ula aasaje fwater ne mwangbisini enggame, angtane aa jei gam nasbinennerem angtane nafsife, "Yesus Jeiba Mesiasam, Angtane Uwa Sanbagiri Jei bunarsusfer aa Jes balam Jam baftanafe.", angtane jeiserem jei jamer gan surbono jena angtane Yahudimana aa jep ge betwebuwefaram jewer.

23Jega jem temawer angtane jeiserem jem ene yo jeta enggam ga jewer ge gunu, "Jei mesam sanbagirswena; jenater sa teneba!"

24Ane jei ga angtane gwanan nwe kofaiserem jei ga gamjon ga aane jenbene, ane ga aane bala, "Aamei bosna Uwa Sanbagirmana tefner is pujiwulbono. Angtane ijes balaram Jemna bosna ijam pujiwulboyon, aam temawer ai enggam aya towaswena, Angtane jeiserem jei etam-etamabara."

25Angtane gwanan nwe kofa jeiserem ga tamawola, "Angtane jeiserem Jei ke angtane etam-etamabara afa fas, ai ke tousa. Jengga ai enggam ai towaswena, ai gwanan ai nwe kofa, jengga aas jepserem ai ames anggasini!"

26Jepga jei gamjon ga aane tenebana, "Jei ibe is bas eyeibene? Jei is fom gwebana, jega aamei ga im anggasini?"

27Jei ga aa tamawola, "Aiba ibe isa mesam nasipmini, jengga aamei ijama sarbiyen. Jeje bafa aamei gamjon ijama sarbife? Gam ke aamei mese Jei igama tikwebaatif?"

28Ane jepga angtane gwanan nwe kofa jeiserem jei ga aane nasbana, ane ga aane bala, "Aamei Angtane jeiserem ijes tikwebaatini! Jengga ai Nabi Musa ajesa tikwebaatini.

29Ai enggame ai amsama towaswena Uwa Sanbagiri Jei Musafar mes ge nasowel. Jengga Angtane jeiserem ai ajama towaswebayan Jei fwer jela."

30Angtane gwanan nwe kofa jeiserem jei ga aa gutena, "Jeje fomfoma, aamei Angtane jeiserem ijama towaswebayan Jei fwer jela, ane Jei safe as mes waakentana jamer ai anggasini.

31Nei enggam nemsama towaswena Uwa Sanbagiri Jei angtane etam-etamabara Jei Jam batobaabiyen, jengga Jei angtane enggalaiserem ga jes gam batobaabili, angtane Uwa Sanbagiri aa jei gane sembatanaram, ane aa jei gane eyebilirim Uwa Sanbagiri aa jes gam bilipminirim.

32Ogiri aa gemer etamwelam, nejama saryan enggame, angtane aasaje angtane nwe kofmer suruluserem ga jes waakentana, ane jei ga aa anggasini.

33Afa Angtane aaiserem Jei Uwa Sanbagirminiwer Jam jelyanaye, Jei bwembwema aas galserem afa jam eyebiyen."

34Jei ga aa ge tamawolbili, "Aamei etam-etamabaner igalap surnuntum, aamke i ams towas-towastababif?" Jepga jei angtane gwanan nwe kof jeiserem ga aane surbono jena angtane Yahudimana aa jep ge betwebuwefaram jewer.

35Yesus Jei jame aa galap sararam enggame, angtane gwanan nwe kofaiserem jei jena angtane Yahudimana aa jep betwebuwefaram jewer mes ne surbono, Yesus Jei ga angtane jeiserem ga aa terelbene, ane ga aa bala, "Aamke Tane Angtanemana ke imes tebana?"

36Angtane jeiserem jei Yesus ga aa tamawolbana, "Uwa, gwanan ams towasta Jei nansa, jega ai Jei gam as tebana!"

37Yesus angtane jeiserem ga aa tamawolbana, "Aamei Jei imesam damtana. Aiba Jesam, namwer aamei iJebar ge nasowenaram."

38Jepga angtane jeiserem ga aa gutena, "Tuhan, ai Ims tebana!" Ane jei Yesus ga sembatana.

39Yesus ga aa gutena, "Ai ogiri aaiserem jebe enggalf Ai fortyant angtane Agam syentabaabif, jega angtane nwe kofaiserem jep gam ge anggabisif, ane angtane jam anggasiliserem jemna nwena jep gam ge kofwebaamif."

40Ane angtane safna Farisimana afwer jep aaiserem jei jame aa galap ge sarbilirim Yesus game aa gutenaram, jepga Yesus ga aane tenebana, "Aamke enggam Im gunu, nwena aman mesna ke kofa?"

41Yesus ga aa tamawolbaabili, "Afa aamei bunarsusfer seyafter aaiserem ijama towaswebiyeneye, aameiba angtane nwe kofa jes gamserem, ane gam jega aamei tamtamtalaiserem ijama domolyan. Jengga aamei enggam ima gunu, 'Ai ajama anggasini.' Jega jem temawer aamei tamtamtalaiserem igemera domola."


  Share Facebook  |  Share Twitter

 <<  Yohanes 9 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran