Dual Panel1Rubén iyanaritu ana’ macowana Yakub. Iyakiya nasaba purai Rubén nakédo salai sala séddinna gundi’na ambo’na, ha’na selaku ana’ macowa ribébbui nariyabbéréyang lao ri Yusuf. Namuni makkuwaro iya kaminang mawatangngé polé ri yelle’na wija-wijanna Yakub tenniya suku Yusuf sangadinna suku Yéhuda. Mala iya bunge-bunge’é mancaji arunna sininna umma Israélié iyanaritu polé ri suku Yéhudaro.
2(5:1)
3Rubén ana’ macowana Yakub, mappunnai eppa ana’ worowané: Hénokh, Palu, Hézron sibawa Karmi.
4Iyanaé atturu-turusenna wija-wijanna Yoél: Sémaya, Gog, Siméi, Mikha, Réaya, Baal sibawa Bééra. Bééra iyanaritu pamimpinna suku Rubén wettunna ritikkeng ri Tiglat-Piléser arung Asyur, sibawa ritiwi ri appalirengngé.
5(5:4)
6(5:4)
7Ri laleng assossorengngé taroki towi kapala-kapala appang iya mangoloéwé ri laleng suku Rubén: Yéiél, Zakharia,
8sibawa Béla ana’ Azas, eppona Séma polé ri appang Yoél. Suku Rubén monroi ri Aroér sibawa ri daéra iya mappammulaé polé ri Aroér lao ri manorang lettu ri Nébo sibawa Baal-Méon.
9Mappunnaiwi mennang maéga senna olokolo ri daéra Giléad. Rimakkuwannanaro, naonroiwi mennang daéra seddé alauna lettu ri padang kessi iya mallebba’é sibbéla Salo Efrat.
10Wettunna Arung Saul, nagasai suku Rubén sibawa nacaui tau Hagrié ri seddé alauna Giléad, nainappa natudangi wanuwaéro.
11Ri seddé manoranna daérana suku Rubén monroi suku Gad ri tana Basan lettu sibbéla Salkha ri seddé alau.
12Polé ri suku Gad-éro Yoél iyanaritu toriyolona appang iya mariyoloé, na Safam iyanaritu toriyolona appang nomoro duwaé. Yaénai sibawa Safat iyanaritu toriyolona appang-ngappang laingngé ri Basan.
13Sining tau laingngé ri laleng suku Gad muttama’i ri laleng pitu appang iya mangoloéwé: Mikhaél, Mésulam, Syéba, Yorai, Yakan, Ziya sibawa Eber.
14Mennang wija-wijanna Abihail ana’ Huri. Atturuseng assossorenna mennang polé ri yawa liyasé iyanaritu makkuwaiyé: Abihail, Huri, Yaroah, Giléad, Mikhaél, Yésisai, Yahdo, Bus.
15Kapalana iyaro appang-ngappangngé iyanaritu Ahi ana’ Abdiél, eppona Guni.
16Monroi mennang ri daéra Basan sibawa Giléad, sibawa kota-kota ri daéraéro enrengngé ri sininna padangngé ri Saron.
17Iyaé assossorengngé riyébbui ri wettunna Yotam arung Yéhuda, sibawa Yérobéam arung Israélié.
18Ri laleng suku Rubén, Gad sibawa suku Manasyé ri seddé alauna Yordan engka 44.760 prajuri’na iya tallatié sibawa mappangalamangngé ri laleng makkégunang kaliyawo, peddang sibawa pana.
19Mammusui mennang méwai suku Yétur, Nafis sibawa Nodab, iyanaritu suku-suku ri laleng bangsa Hagri.
20Iyaro prajuri-prajuri’é mateppe’i ri Allataala sibawa méllau tulung ri Aléna, naritarimana paréllaunna mennang ri Allataala sibawa mpéréngngi mennang apakalang lao risining tau Hagriéro sibawa naéwaé sikongkolo mennang.
21Nasaba iyaro musué kajajiyangngi nasaba élona Allataala, namaéga bali iya naunoé mennang. Natawang towi mennang 100.000 tau, sibawa rampasa 50.000 unta, 250.000 bimbala sibawa 2.000 kaleddé. Purairo mattette’ni mennang ri daéraéro lettu ri wettunna bangsa Israélié ri tawang sibawa ritiwi ri appalirengngé.
22(5:21)
23Sibagiyang suku Manasyé monroi ri daéra Basan lettu ri manorang sibbéla Baal-Hérmon, Senir sibawa Bulu Hérmon. Pédé maitta mennang pédé maéga.
24Iyanaé kapala-kapala appanna mennang: Héfer, Yiséi, Eliél, Azriél, Yérémia, Hodawya sibawa Yahdiél. Iya manenna mennang iyanaritu prajuri-prajuri iya poré.
25Dé’ namatinulu tau Israélié lao ri Allataala iya nasompaé toriyolona. Nasalaiwi mennang nanassompa lao ri déwata-déwatana bangsa iya puraé napaddésu Allataala polé ri wanuwa Kanaan.
26Rimakkuwannanaro Allataala pakédoi atinna Pul arung Asyur, nanalaona gasai wanuwaéro. Riisseng towi Pul selaku Tiglat-Piléser. Nainappa suku Rubén, Gad sibawa suku Manasyé ri seddé alauna Yordan natiwii selaku tawangeng sibawa ripali lao ri Halah, Habor, Hara sibawa séddié onrong iya macawé’é ri Salo Gozan. Kuwaniro mennang monro sibawa mattette lettu essoéwé.