Dual Panel1Puranana napatettong Arung Salomo iyaro Bolana PUWANGNGE, nataroni ri laleng sining gudanna bolaéro sininna péra’é, ulawengngé, sibawa barab-barang laing iya puraé nakkasuwiyangeng Daud ambo’na lao ri PUWANGNGE.
2Purairo nasuroni Arung Salomo sininna pamimping suku sibawa appang polé ri bangsa Israélié maddeppungeng ri Yérusalém untu’ palétté’i Petti Assijancinna PUWANGNGE polé ri Sion, Kota Daud lao ri Bolana PUWANGNGE.
3Na polé manenna mennang ri Esso Maraja Kalampang Daud-daungngé.
4Maddeppungeng manennana iyaro pamimpingngé, nakkani sining tau Léwié iyaro Petti Assijancingngé,
5nanatiwii ri Bolana PUWANGNGE. Kémana PUWANGNGE sibawa sininna passakke-sakke’na napalétté toni ri Bolana PUWANGNGE sining imangngé sibawa tau Léwié.
6Maddeppungennni Arung Salomo sibawa sininna ra’ya’é ri yolona Petti Assijancingngéro nainappa makkasuwiyang lao ri PUWANGNGE bimbala sibawa saping iya tenribilangngé égana.
7Purairo naputtama’ni sining imangngé iyaro Petti Assijancingngé ri laleng Bolana PUWANGNGE sibawa palénne’i ri yawana dato’-dato’ kérub-é ri laleng Bili’ Pommapaccingngé.
8Pannina iyaro dato’-dato’é mallebba’i tongkoi iyaro pettié sibawa aju-aju pabbuléna.
9Iyaro aju pabbuléna malampé senna, angkanna cappa-cappa’na paita polé ri yolona Bili’ Pommapaccingngé, iyakiya dé’ napaita polé ri saliweng. (Lettu essoéwé iyaro sining ajué engka mupi kuwaro.)
10Ri laleng Petti Assijancingngéro dé’gaga muwi séuwa sangadinna duwallétta batu. Iyaro batué naputtama’i Musa kuwaro ri Bulu Sinai, wettunna PUWANGNGE mébbu assijancing sibawa bangsa Israélié wettunna mennang ri laleng allalengengngé polé ri Maséré lao ri wanuwa Kanaan.
11Sininna imang iya engkaé kuwaro, polé ri sininna kalompo’é, purani napassadiya aléna untu’ upacaraéro. Sininna pakkélongngé sibawa pacculé musi’é ri laleng suku Léwi, iyanaritu Asaf, Héman, Yédutun sibawa sininna anggota appanna mennang, pakéi pakéyang polé ri kaing lénangngé. Iyaro sining tau Léwié tettongngi ri seddé alauna mézbaé sibawa makkatenning simbal nenniya kacapi. Nasibawang mennang engka 120 tau imang iya masseppung tarompé’é. Elonna sining pakkélongngé masséddiwi sibawa oni musi’ tarompé’é, simbal-é sibawa paréwa musi’ laingngé. Iyanaé ada-ada pappojiyang iya napuwélongngé mennang untu’ PUWANGNGE: "Pojiwi PUWANGNGE, saba’ makessingngi. Pammasé-Na mannennungengngi." Wettunna massu sining imangngé polé ri Bolana PUWANG-ngéro, tappa pennoni iyaro Bolaé sibawa cahaya ahadérékenna PUWANGNGE, angkanna mennang dé’ naulléi patterui upacara assompangngé.
12(5:11)
13(5:11)
14(5:11)