Dual Panel1Mabbicarai PUWANGNGE lao ri iyya, adan-Na,
2"Eh tolino dé’é namannennungeng, sadiyanoga madélékiwi kota iya pennoé sibawa pabbunoro. Appaitanni lao ri aléna sininna pangkaukenna iya mappakaciddi-ciddi’é."
3PUWANG Iya Pommatanré suroka palettu’i pasengngéwé lao ri Yérusalém, "Salako nasaba purai muwuno maéga polé ri pabbanuwamu muto, sibawa pura panajisi’i alému sibawa sompai barahala-barahala ébbumu muto. Rimakkuwannanaro macawé’ni wettu angadélékemmu sibawa curitamu dé’na namaitta naccappa. Uleppessakko mancaji akkéllé-kéllékeng sibawa addicawang untu’ bangsa-bangsaé sibawa sininna wanuwaé.
4(22:3)
5Riyéllé-kéllé’ko ri wanuwa-wanuwa iya mabélaé sibawa macawé’é nasaba matteru-teruko majjalékkaiwi hukkungngé sibawa peraturangngé.
6Sininna pamimpinna Israélié nattuwangngi awatangeng aléna sibawa pogau’i abbunowang.
7Dé’ muwi séddi pabbanuwamu pakalebbii tomatowanna. Mubengnguwangngi tau laingngé sibawa mala saro polé ri asussanna jandaé sibawa ana’ béué.
8Mucarépaiwi onrong-ngonrong assompangngé lao ri Iyya sibawa dé’ mubati-batiwi esso Saba’é.
9Ri yelle’na pabbanuwamu engka tau mappakiri-kiri iya pojiyéngngi pétenna’i tau laingngé kuwammengngi narihukkung maté. Engkato pojiwi manréi juku iya riyakkarobangengngé lao ri barahalaé. Engkato pojiwi mappangaddi.
10Engka godai sibawa siléwureng poroindo’na, makkunrai iya maddaraé,
11bainéna tau laingngé iyaré’ga manéttunna iyaré’ga anrinna polé ri laing indo’.
12Engkato mancaji pabbuno riwaja, pappabunga dowi sibawa para’i sining tau sibangsana. Nallupai manek-Ka mennang. Iyya PUWANG Iya Pommatanré pura mabbicara.
13Iyakiya makkekkuwangngé maélo-Ka hantangngi sining parampo’mu sibawa pabbunomu.
14Barani mupoga iyaré’ga mawatang mupoga untu’ makkai limammu pura-Kuna hukkukko? Iyya, PUWANG Iya Pommatanré pura mabbicara sibawa Upogau’i matu aga pura Upowada.
15Upassara-sarangngi matu pabbanuwamu lao ri sininna wanuwaé sibawa bangsaé, sibawa Upappajai matu pangkaukemmu iya majaéro.
16Ripakatunako matu ri bangsa-bangsa laingngé, namuwissengngi matu makkedaé Iyya ritu PUWANG."
17Makkedai PUWANGNGE lao ri iyya,
18"Eh tolino dé’é namannennungeng, iyaro sining tau Israélié dé’ nakkéguna lao ri Iyya. Padai mennang tai bessi campurangngé, padaénna tembagaé, tumeraé, bessié sibawa tumera lotongngé iya nasésaé puranana ripatuléng péra’é ri laleng apié.
19Na makkekkuwangngé Iyya, PUWANG Iya Pommatanré, powadai lao ri mennang makkedaé padai mennang bessié iya dé’é nakkégunaro. Pékkugiwi péra’é, gessaé, bessié, tumera lotongngé sibawa tumera puté riputtama ri laleng apié untu’ ripatuléng, makkuwatoniro mennang Upaddeppungeng matu sibawa Utiwi lao ri Yérusalém. Cai-Ku iya maseroé paccolo’i matu mennang pada-pada apié paccolo’i bessié.
20(22:19)
21Ya, Upaddeppungengngi matu mennang ri Yérusalém, Upasangngi matu api cai-Ku ri yawana mennang, angkanna ancuru siseng.
22Pada-pada péra’é ripaccolo ri laleng apié, makkuwatoro mennang ripaccolo’i matu ri Yérusalém. Nanaissenni mennang makkedaé Iyya, PUWANG, pura leppessangngi cai-Ku ri yasé’na mennang."
23Mabbicarasi PUWANGNGE lao ri iyya, adan-Na,
24"Eh tolino dé’é namannennungeng, powadai lao ri tau Israélié makkedaé najisi’i tanana mennang, narimakkuwannanaro Umacai sibawa hukkungngi.
25Sining pamimpinna pada-padai singa iya mangngaungngé puranana natikkeng anréna. Naunoi mennang ra’ya’é, narampasa manengngi sininna waramparangngé sibawa asugireng iya naruntu’é mennang sibawa nassabariwi namaéga makkunrai mancaji janda.
26Sining imanna Israélié najjalékkaiwi hukkung-hukkuk-Ku sibawa carépaiwi barab-barang iya ripallaingngé untu’ alé-Ku. Dé’ napasilaingengngi mennang kéga hallala’ sibawa kéga harang. Makkuwatoro mennang dé’ napaggurui ra’ya’é untu’ pasilaingengngi kéga mapaccing sibawa kéga najisi’ situru peraturanna agamaé. Dé’ mennang nabati-batiwi esso Saba’é. Nanallalengiwi ripakatuna-Ka ri bangsa Israélié.
27Pajaba-pajaba pamaréntana pada-padai serigala iya sapé-sapé’éngngi anréna. Mabbunoi mennang banna untu’ sappa asarong.
28Sining nabié nasubbui iyaro dosa-dosaé; pada-padai mennang tau iya puwaléiyéngngi témbo’ iya marota’é. Belléi sining pakkitanna mennang, makkuwatoro sining botona mennang. Mangakui mennang makkedaé paseng iya napalettu’é mennang iyanaritu natarimai mennang polé ri PUWANG Iya Pommatanré, padahal dé’ sises-siseng Umabbicara lao ri mennang.
29Sining tau sugié pabengnguwangngi sibawa marrampo. Nagaukengngi mennang tau kasiyasié sibawa siyélo-élona nenniya malai asarong polé ri tau laingngé.
30Ri yelle’na tau Israéliéro, sappa-Ka tau iya mullééngngi patettong témbo’, iyaré’ga tettong ri onrong-ngonrong iya maruttungngé témbo’na untu’ mattahangengngi iyaro wanuwaé narékko maélo-Ka mancuru’i ri laleng allumpana cai-Ku; iyakiya dé’ muwi séddi tau uruntu.
31Rimakkuwannanaro Uleppessangngi cai-Ku makkekkuwangngé lao ri mennang, na pada-pada apié Upaccappui matu mennang nasaba sininna pangkaukenna. Iyya PUWANG Iya Pommatanré pura mabbicara."