Dual Panel1Kènè alè dengan si nikekellengen! Èn mo suratku pedua kaliken mendahi kènè lako mendungkul pusuh peratèen ndènè,
2asa ièngèt kènè karinana kata sienggo iruapken nabi-nabi Dèbata i sinderbi dekket perèntah Tuhan i Raja Sipaluahken kita si nipessoh taba kènè merkitè rasul-rasul.
3Èn mo siperluna naing bettohen ndènè; mayak ari perpodi roh mo kalak nggelluhna idomi cubellek dagingna sendiri, irèhèi mo kènè
4merkitè mendokken bagèen, "Roh kin mo nina Tuhan Jesus bagè sienggo niperbagah-bagahna i! I dikè mo lot roh Ia? Empungta i pè enggo mo matè. Tapi hot ngo karinana bagidi kessa nai ntembem dunia èn!"
5Ai laju ngo oda merdatè kalak i, hana pè langit dekket tanoh èn arnia, kata Dèbata ngo maing; ipas laè nai ngo ihanaken tanoh èn janah merkitè laè;
6janah merkitè laè ma ngo -- ipetumpat dunia siperlebbè i -- tikan masa laè mbuncar.
7Tapi ukum langit bak tanoh silot bagèndari, idi nola mo sinaing ipetumpat merkitè api segen, ijamotken kata Dèbata i ma ngo soh mi tikki i hukum Dèbata kalak siso percaya i soh tumpat.
8Tapi alè sinikekellengen, tangkas mo èngèt kènè èn, Dosken sedari ngo bai Tuhan i ukum seribu tahun bai jelma.
9Oda ngo ipedekkah-dekkah Dèbata bagah-bagahNa bagè si nidokken dèba kalak. Tapi ipehembun ngo ukurna midah kènè, ai oda lemmo atèna lot barang isè mago. Ipergeddo ukurna ngo asa karina kalak mertobat ipas dosa-dosna nai.
10Tapi dapet nè mo Ari pekiroh Tuhan i pedua kaliken codi bagè pekiroh penangko. Merdebbur mo langit i lako salpun janah melettup mo sagumanna silot i langit i; tanoh dekket sagumanna silot pengisina idi pè salpun mo.
11Enteng mula salpun ngo keppè karinana sagumanna silot i, kerna naidi bakunè ngo kita patut nggelluh? Kennah mbadia ngo nggelluh, menguèi Tuhan i mo kènè,
12sidekkah mèma-mèma janah mengketedohken Ari Tuhan i kènè lako menghukum karina jelma. Tupung Ari i mo kerri langit i melettup, janah kumarna nggarana gabè melala mo sagumanna silot i langit i.
13Tapi ukum kita dak sipèma-pèma ngo langit sirembaru, bekkas ketègerren i rembang mi bagah-bagahna.
14Kerna naidi alè sinikekellengen, sidekkah ipèma-pèma kènè Ari i, kerencetken kènè mo nggelluh oda merdosa nèngè janah ulang mertikas i hadeppen Dèbata. Peselloh kènè mo nggelluh ndènè taba Dèbata.
15Radumi kènè mo lambas ukur Dèbata i, mahan kesempaten iberrèken banta, asa maluah kita. Otang si Paulus dengan si ni kekelleng i pè bagi ma ngo isuratken bai ndènè? Kepantasen siroh bai Dèbata nai ngo bana asa isuratken i mendahi kènè.
16Ibas karina surat-suratna i dak idokken si Paulus ngo tersèngèt i. Tuhu lot ngo dèba mahal arusen kata suratna i, janah kalak siso ntegguh kepercayanna, janah oda mengarusi kadè sinidokken surat si Paulus i, gabè ibaling nola mo surat i i bas Bibèl idi nai pè, bagi ma ngo dèba ibaing kalak i. Karinana pemaing kalak idi i, kennah mengenna ngo mi dirina sendiri.
17Enteng kènè alè dengan kekellengen, enggo mo ibettoh kènè i. Kerna naidi dak mermanat mo kènè, asa ulang terabin kènè mi kelalingen kalak siso menandai perèntah Dèbata i, gabè ndabuh nola kènè luas i bekkas ndènè selloh idi nai.
18Dak makin iakapken kènè mo mendè basa Tuhan, Raja Sipaluahken kita i, imo Jesus Kristus, janah dakdak makin itandai kènè mo Ia. Bana mo kessangapen bagèndari nai soh mi amman sumendah. Amèn. Tabe nami, Petrus