Alkitab Mobile SABDA
[VER] : [GULLAH]     [PL]  [PB] 
 <<  2 Korintus 7 >> 

1Me deah Christian fren, God mek all dem promise yah fa we. So den, leh we mek we life clean fa true fom sin. Mus dohn hab nottin fa do wid no ebil ting dat gwine mek we body o we sperit dorty een God eye. Leh we lib jes fa God, wa we blongst ta, an show we da spec um fa true.

Paul Full Op wid Joy

2Open op oona haat fa we. We ain do nobody nottin bad. We ain stroy nobody fait. We ain tek no adwantage ob nobody.

3A ain say dem ting yah fa condemn oona. Cause, like A tell oona fo, oona een we haat all de time. We lob oona sommuch dat nottin kin keep we fom oona. We togeda wid oona all de time, weda we lib o we dead.

4A sho dat oona ain gwine disappoint we. Oona da mek me real heppy. Eben dough we got lotsa trouble, stillyet A got plenty courage, A full op wid jaiy.

5Eben wen we come ta Macedonia, we body ain got no chance fa res. We been flicted dey pon all side. People beena aagy wid we an we been scaid.

6Bot God, wa da courage dem wa got hebby haat, e courage we wen Titus come.

7An we ain been courage jes cause e come. We been courage, too, wen e tell we how oona courage um dey. E tell we dat oona wahn fa see me real bad. An oona saary fa true fa wa happen. An e say, too, dat oona all de time ready fa tek op fa me. So A da rejaice now eben mo den fo.

8Eben ef de letta A done write mek oona saary, A ain saary dat A write um. A been saary fo wen A see dat de letta mek oona saary fa true fa a wile.

9Bot A heppy now. A ain heppy dat A done mek oona saary. A heppy cause oona been so saary til dat done mek oona change oona way. Oona change cause oona been feel saary like God wahn. So, we ain do oona no haam.

10Wen God mek somebody saary, dat gwine mek e haat change an e gwine ton fom e sin. An cause ob dat, e gwine be sabe. So dat ain nottin ta regret. Bot ef somebody feel saary jes cause ob sompin wa dey een dis wol, dat kind ob saary dey gwine mek um dead an loss faeba.

11Look wa God done fa oona wen e mek oona saary. Fa sho, e mek oona serious fa do wa oona oughta do an fa show fa true dat oona ain done nottin wrong. Oona been bex bad an oona been scaid. Wen God mek oona saary, dat mek oona wahn fa see me real bad, an oona been ready fa true fa punish de one wa done bad. Oona done all wa oona been able fa do fa mek all ting scraight. All dat done show dat dey ain nottin fa blame oona fa een dat trouble.

12So eben wen A write dat letta, A ain write um fa sake ob de one wa done bad, an A ain write um needa fa sake ob de one wa suffa fa um. A write um fa show oona dat God know dat oona cyah fa we fa true.

13An all dat courage we. An pontop ob de courage dat oona gii we, Titus mek we eben mo heppy cause oona mek um heppy fa true by de way oona all beena hep um so dat e ain warry no mo.

14A been tell Titus dat A real heppy bout oona, an oona ain leh me down. We taak true ta oona all de time. Same way so, oona show dat wa we tell Titus bout oona, e true.

15So den, Titus da lob oona mo an mo, wen e da memba how oona all been ready fa do wa e tell oona fa do, an how wen oona welcome um, oona been so scaid an ain wahn fa do nottin fa mek um feel bad.

16A heppy fa true, cause A know A kin trus oona fa sho, een all ting.


  Share Facebook  |  Share Twitter

 <<  2 Korintus 7 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel