Alkitab Mobile SABDA
[VER] : [GULLAH]     [PL]  [PB] 
 <<  2 Tesalonika 3 >> 

Pray fa We

1We Christian bredren, dis de las wod wa we da taak een dis letta. Pray fa we. Pray dat de wod ob de Lawd gwine spread all oba real fas an people gwine gii hona ta de Lawd an tell um tankya fa e wod, jes like happen wen oona yeh um.

2Pray, too, dat God gwine sabe we fom wickity an ebil people, cause ebrybody ain bleebe de wod ob de Lawd.

3Bot de Lawd, e faitful. E gwine mek oona mo scronga an keep oona safe fom de Evil One.

4We Lawd gii we trus een oona, so dat mek we know fa sho dat oona da do wa we chaage oona fa do an oona gwine keep on da do um.

5We pray dat de Lawd gwine show oona mo an mo how God da lob oona an how Christ done beah op onda suffrin fa do wa God wahn an how e da mek oona beah op too.

All People Mus Wok

6We Christian bredren, een de name ob we Lawd Jedus Christ, we chaage oona say, dat oona mus keep way fom all de Christian dem wa ain wahn fa do nottin an wa ain da do wa we done been laan um fa do.

7Oonasef know fa true dat oona oughta do jes like we beena do. We ain been lazy none tall wen we been dey wid oona.

8We beena pay fa all de food people gii we. We beena wok haad, fa true, day an night, fa wa we beena need, cause we ain been wahn fa mek none ob oona haffa pay fa hep we.

9Dat ain fa say dat we ain got no right fa tell oona fa gii we food an a place fa sleep. Bot we beena do all dat wok dey an ain aks oona fa nottin, cause we beena wahn fa show oona how oona kin do same like we done.

10Wen we been dey wid oona, we beena chaage oona say, “Mus dohn gii no food ta nobody dat ain wahn fa wok.”

11We yeh dat some people dey mongst oona ain wahn fa do no wok. Dey ain do nottin tall cep pit dey mout pon oda people bidness.

12We waan dem people dey, een de name ob we Lawd Jedus Christ. We chaage um say, dey mus lib de right way, da wok fa dey libin.

13Bot oona, we Christian bredren, oona mus dohn git weary da do good.

14Ef dey somebody dey wa ain do wa we tell oona een dis letta, oona mus memba um an mus dohn mix wid um, so dat e gwine be too shame.

15Stillyet, oona mus dohn tink like e oona enemy. Oona mus waan um same like oona waan oona broda.

Paul Las Wod een Dis Letta

16We pray dat de Lawd esef, wa da mek we hab peaceable haat, gii oona peace all de time een all ting. May de Lawd be dey wid oona all.

17Now wid me own han A write dis: A, Paul, da tell oona hey Een all me letta, dis de way A kin show dat fa true A write um. Dis de way A set um down.

18We pray dat we Lawd Jedus Christ bless all ob oona.


  Share Facebook  |  Share Twitter

 <<  2 Tesalonika 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran