Alkitab Mobile SABDA
[VER] : [GULLAH]     [PL]  [PB] 
 <<  Filipi 1 >> 

1We, Paul an Timothy, wa da saab Christ Jedus, da write ta all God people dem een Philippi wa come fa be one wid Christ Jedus, an ta de choch leada dem, an ta dem wa da hep een de choch wok.

2We aks Fada God an de Lawd Jedus Christ fa show oona mussy an gii oona peace een oona haat.

Paul Pray fa God People een Philippi

3Ebry time A da tink ob oona, A da say “Tankya” ta God fa oona.

4E mek me haat glad weneba A da bend me knee fa oona.

5E mek me haat glad cause ob de way oona hep me fa tell oda people de Good Nyews fom de fus day wen A staat dis wok een Philippi right op ta now.

6So den, A know fa sho dat God wa staat fa do dis good wok yah eenside oona haat, e gwine keep on da do um til e done finish all e plan, op ta dat Day ob Jedus Christ, wen e gwine come back.

7Oona een me haat all de time, an so e right fa me fa feel dis way bout oona. Cause all hab a paat wid me een God blessin ta we, wiles A dey yah een de jailhouse an wiles A been free fa go tell ebrybody de Good Nyews, da show um dat e true, an da mek um know fa true wa e say.

8God know hommuch A wahn fa see oona. A da lob oona wid all me haat jes like Christ Jedus da lob we.

9A da pray dat oona gwine keep on da lob God an all people mo an mo, an dat mo an mo, oona gwine know God trute an hab sense bout wa ting good an wa ting bad.

10A da pray dis so dat oona kin know fa do wa ting bes fa do. Den oona ain gwine do nottin bad een oona life an ain nottin dat oona gwine be blame fa een dat Day ob Christ, wen e come back.

11An oona gwine waak scraight an do all dem ting wa good, dem ting wa jes Jedus Christ able fa mek e people do. An dat gwine mek oda people gii glory an praise ta God.

Christ All Me Life

12Me bredren, A wahn oona fa know dat wa done happen ta me done hep fa spread de Good Nyews.

13All de sodja dem wa da gyaad de rula Caesar house an all de oda people yah, dey know dat people pit me een de jailhouse cause A da wok fa Christ.

14Fudamo, cause A dey yah een de jailhouse, mos ob de bredren hab mo courage een de Lawd, so dat mo an mo dey ain scaid fa tell people God wod, an dey ain warry bout wa people gwine do ta um.

15Fa sho, some tell de Good Nyews bout Christ cause dey jealous ob me an dey wahn fa show dat dey da wok mo den me. Bot oda da tell bout Christ cause dey wahn fa do de right ting.

16Dem people wa wahn fa do de right ting, dey da tell bout Christ cause dey lob me. Cause dey know dat God pit me yah fa tell people de Good Nyews an show um dat e true.

17De oda people wa jealous, dey tell de Good Nyews bout Christ, bot dey ain do dat wid clean haat. Dey jes wahn fa git head ob oda people. Dey mean fa mek me suffa mo yah een de jailhouse wen dey do dat.

18Wa dey da do fa mek trouble fa me ain matta ta me tall. Wa matta mos, dat dey da tell people bout Christ. Ef dey da tell bout um fa Christ sake o ef dey da tell bout um fa dey own sake, A heppy fa true cause dey da tell bout Christ, an A gwine be too heppy cause ob dat.

19A know fa sho dat cause ob oona pray an de hep wa come fom de Sperit ob Jedus Christ, all dat wa done happen ta me gwine ton out fa set me free.

20A da hope wid all me haat an A spect dat A ain neba gwine be shame cause A ain do wa A spose fa do. An A da hope an spect dat all de time, A gwine be scrong ef A dead o ef A ain dead, so dat ebryting A da do gwine mek people praise Christ.

21Fa me own paat, Christ da all me life, an ef A dead, A gwine git life wa mo betta den dis life yah.

22Bot ef A keep on da lib, A kin do mo good wok fa Christ. So den, A ain know ef A wahn fa lib o fa dead.

23Dey time A wahn fa lib an dey time A wahn fa dead. Bot A wahn fa true fa stop da lib yah een dis ol wol an go fa lib wid Christ. Dat gwine be faa way mo betta fa me.

24Bot e gwine be betta fa oona ef A keep on da lib yah een dis wol, so dat A kin hep oona.

25Cause ob dat, A know dat A gwine stay yah. A ain gwine dead yet. A gwine keep on da lib an da hep all ob oona fa trus een Jedus Christ mo an mo an fa hep oona git mo joy een oona fait.

26A gwine do dis so dat wen A come fa see oona gin, oona gwine hab mo cause fa praise Jedus Christ, cause ob me hep ta oona.

27So den, wa matta de mores, e dat oona lib de way dat de Good Nyews bout Christ say oona oughta lib. Den ef A come an see oona o ef A jes yeh bout oona, A gwine know dat oona gwine stan op scrong fa Jedus. A gwine know dat oona all gree togeda fa fight fa de fait dat we wa bleebe de Good Nyews hab.

28Mus dohn be scaid ob oona enemy dem. An dat gwine show um dat God gwine sabe oona, bot dey gwine git stroy.

29Cause God gii oona dis chance fa saab Christ, wen oona da trus een um, bot wen oona da suffa fa e sake too.

30Now oona da jine me een de fight fa de Good Nyews, jes like oona see me do wen A beena fight, an like A keep on da fight, jes like oona yeh.


  Share Facebook  |  Share Twitter

 <<  Filipi 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel