Dual PanelHow God Mek All ting Right Tween We an Um
1Me Christian bredren, dis de las ting A wahn fa tell oona een dis letta. Oona oughta rejaice een de Lawd. Ain no trouble ta me fa write gin de same ting dem wa A been write ta oona fo. An e mo safe fa oona ef A do dat.
2Oona mus watch out fo dem people wa da do ebil. Dey jes like bad dog. Dey de people dat say all de man dem haffa git dey body cut.
3Bot we de people wa been circumcise fa true. Cause God Sperit da hep we woshup God op an we da rejaice een we life een Christ Jedus. An we ain pit no hope een nottin dat people do ta dey body fa try fa show dat dey God people.
4Now den, ef A beena wahn fa pit me hope een dem ting, A coulda do dat fa sho. Ef somebody got a right fa tink e oughta pit e hope een wa people do ta dey body fa try fa show dat e one ob God people, A got a right fa tink dat way eben mo den dat one.
5Cause eight day atta A bon, dey circumcise me. Me modda an me fada, dey Israel people. Dey blongst ta Benjamin fambly. An me ole people, dem all Hebrew people. A blongst ta de Pharisee group, so like dem, A beena do all dat de Jew Law say.
6A been wahn fa wok fa God so much dat A beena mek de people wa blongst ta de choch, suffa. So as faa as somebody kin go da keep de Jew Law dat mek all ting right tween um an God, A done um. Ain nobody kin pint finga at me bout dat.
7Bot all dem ting yah dat A been, an all dat A done do, all dat A nyuse fa say been walyable ta me, now A figga dey ain wot, cause ob Christ.
8Fa true, A figga dat ebryting yah een de wol ain mean nottin ta me, cause fa know Christ Jedus me Lawd, dat faa way mo walyable den all oda ting. Fa Christ sake, A done lef all ting. Dey ain no mo betta den gaabage ta me now, so dat A kin git dat wa walyable mo den all. A kin blongst ta Christ.
9A wahn fa be altogeda one wid Christ. Ain no mo wa A da do, da keep de Jew Law an da tink dat mek all ting right tween me an God. Now all ting right tween me an God cause A trus een Christ. God mek all ting right tween people an esef cause dem people trus een Christ, jes dat.
10Now A jes wahn fa know Christ an e powa een me life, de powa wa mek um git op fom mongst de dead an lib gin. A wahn fa hab a paat een wa e suffa, an A wahn fa come fa dead like um een de way e done dead.
11So A hab hope dat A, too, gwine git op fom mongst de dead an lib gin.
Fa Win de Prize
12A ain say A done do all wa God wahn me fa do, an A ain say A done come fa be all wa A oughta be een God eye. Bot A da try wid all me haat fa mek dat prize me own, cause Christ done mek me e own.
13Me Christian bredren, fa sho, A ain yet win dat prize. A ain all wa A oughta be een God eye. Bot one ting A da do. A da do all dat A able fa do fa git ta wa dey head ob me. A ain pay no mind ta nottin dat done pass.
14A keep on da try wid all me haat fa git fa weh de prize da, so dat A kin win dat prize, fa lib op yonda een heaben weh Jedus Christ da call me fa lib wid um.
15We all wa trus een Christ fa true an wa beena grow op een we waak wid um, we oughta pit we mind pon waak een dis way dat A da taak bout yah. Bot ef some ob oona ain gree fa waak dis way dat A taak bout yah, God gwine mek oona ondastan um fa true.
16An dis one ting A say, leh we keep on da go on, da waak pon de same road dat bring we yah.
17Me Christian bredren, oona oughta do all dat oona see A da do. We been show oona de right way fa go. Oona oughta pay mind ta dem wa waak een dat way.
18Cause like A beena tell oona plenty time bout some people, an now as A da tell oona gin, da cry wen A say, de life dat plenty people lib mek um enemy ta Christ det pon de cross.
19Dem people yah gwine be stroy een de end. Cause dey tek all wa dey wahn fa dey own body dem an ton dat eenta dey god. Dey proud bout dem ting wa oughta mek um too shame. An dey pay mind all de time ta jes dem ting dey yah een dis wol.
20Bot we blongst ta heaben. We look fowaad fa see we Sabior wa gwine come fom oba dey, de Lawd Jedus Christ.
21Jedus got powa wa da mek um able fa rule oba all ting. An wid dat powa, e gwine change dem lowly body wa we got now, an e gwine gim glory, like e own body.