Dual PanelMelchizedek de Priest
1Melchizedek, e de one wa been king ob de city name Salem, an God wa great mo den all, pick um fa be a priest. Wen Abraham beena come back fom de war, atta e an e aamy done win out oba de fo king dem an kill um, Melchizedek meet Abraham an e aks God fa bless Abraham dey.
2Abraham wide op all e tek een de war, eenta ten paat, an e gii Melchizedek one paat. Een de fus place, Melchizedek name mean, “King wa da do wa right.” An den dey call um “King wa da bring peace” cause Salem, de city weh e beena rule, mean “peace.”
3Dey ain nottin tall been write down bout Melchizedek modda o e fada, needa e fambly line. Dey ain nottin needa bout wen e bon o wen e dead. So e stan like God Son, cause e a priest faeba an eba.
4Leh we study den pon how great dis Melchizedek been. Eben Abraham, de fada ob all de Jew people, gim real good ting dem wa e done been tek een de war. Abraham gim one paat outta ten paat ob all e tek.
5Now de Law wa God gii Moses taak bout de granchullun-chullun ob Levi wa come fa be Jew priest dem. De Law say, de people ob Israel mus wide op wa dey git eenta ten paat an gii one paat ta de Jew priest dem. Dat mean fa say, dey own countryman dem beena gii dem Jew priest one paat outta ebry ten paat, eben dough dey all Abraham granchullun-chullun.
6Dis man Melchizedek ain come outta Levi fambly line, stillyet e got one paat outta ebry ten paat ob all wa Abraham tek een de war. An Melchizedek aks God fa bless Abraham, de man wa God been mek de promise ta.
7We know fa true dat de poson wa aks God fa bless somebody, e mo high op den de one wa git bless.
8Now de priest dem wa come outta Levi fambly line an wa git one paat outta ebry ten paat, dey jes people wa got fa dead. Bot Melchizedek, wa got one paat outta ebry ten paat too, God say e da lib.
9An we kin say dat wen Abraham pay one paat outta e ten paat, dat been jes like Levi too pay one paat ta Melchizedek. (An Levi granchullun-chullun git one paat outta ebry ten.)
10Wen Melchizedek meet Abraham, Levi ain been bon yet, bot we kin say dat so e stan, cause Levi been Abraham blood fambly.
11God gii de Law ta Moses fa gii ta de Israel people. An dat Law pend pon de Jew priest dem wa been fom Levi fambly. Now den, ef dem priest ob Levi fambly woulda been able fa do all wa dey spose fa do, dey ain oughta been no need fa noda kind ob priest fa come, one wa like Melchizedek, an wa ain like a priest fom Aaron fambly line, ainty?
12Wen God change de kind ob priest dem, de law too haffa change.
13We Lawd, de one wa dey da tell dem ting bout, een God Book, e come fom noda tribe. E ain come fom Levi tribe, an ain none ob e tribe neba done de wok ob a priest at de alta.
14Cause we all know dat we Lawd come fom de tribe ob Judah. An Moses ain say nottin bout de tribe ob Judah wen e tell bout de priest dem.
Noda Priest Like Melchizedek Done Come
15Now oona kin ondastan eben mo betta wa A da taak bout. Cause God sen noda fa be priest, an e like Melchizedek.
16E ain come fa be a priest cause ob de law dem bout wa fambly line e come fom. E a priest cause ob de powa ob e life wa ain neba gwine end.
17Cause dey write een God Book say, “Ya gwine be a priest faeba an eba, een de same way Melchizedek been a priest.”
18So den, de ole law done been pit way, cause e ain got nuff powa an ain been able fa do wa e spose fa do.
19Cause de Law wa God gii Moses ain mek nottin jes like e oughta be. Bot now, God gii we sompin mo betta fa look fowaad ta, an dat mek we come close ta God.
20Den too, God been tek a wow an promise say, Jedus gwine be a priest faeba an eba.
21Dey ain been no wow fo wen de oda man dem come fa be priest. Bot wen God mek Jedus fa be priest, e tek a wow, an promise wen e tell Jedus say, “A de Lawd tek a wow an promise say, ‘Ya gwine be a priest faeba an eba.’ Me wod ain neba gwine change.”
22Cause ob dis wow yah wa God promise, dat mek Jedus de one wa guarantee a nyew cobnant wa God mek wid we, an de nyew cobnant mo betta fa true den de ole cobnant.
23Onda de ole cobnant, dey been plenty priest wa come fom Levi tribe, cause dey done dead an lef dey priest wok. Den oda priest dem come fa do de wok wa dey beena do.
24Bot Jedus diffunt. E ain dead neba. E da lib faeba an eba. Cause ob dat, e a priest dat ain neba gwine leabe e wok fa noda priest fa do. E a priest faeba.
25So den, Jedus got powa fa sabe fa true, een all way, de people wa come ta God shru um. Cause e da lib faeba, fa go fa taak ta God fa sake ob dem people.
26Jedus de head man ob de priest dem, an e da gii we jes wa we need. Jedus good fa true een God eye. E ain neba do no sin. E ain got no fault een um. Een de wol, e ain lib like sinna dem. An now God done raise um op high een e place mo high den de mos high heaben.
27Jedus ain like dem oda head man ob de priest. Dey been need fa mek sacrifice ta God ebry day fa sake ob dey own sin, an den fa de oda people sin. Bot Jedus ain got no need fa mek no sacrifice no mo. E done been mek sacrifice fa de people sin jes one time an fa all time, wen e offa op e life pon de cross.
28Dem head man ob de priest wa Moses Law done pick, dey been man dem wa kin do ting wa ain right. Bot wen God tek a wow an mek de promise wa come atta Moses Law, God pick e Son, wa come fa be de one wa all dat e spose fa be faeba.