Dual PanelPaul Taak Fo King Agrippa
1Den King Agrippa tell Paul say, “Ya kin taak fa yasef now.” So Paul pit e han op an staat fa ansa bout wa done happen. E say:
2“King Agrippa, A heppy fa dis chance dat A hab fa stan op fo ya taday an ansa fa all de bad ting dat de Jew people say A done.
3A heppy dat ya know fa true all bout how de Jew people lib an de ting dey kin spute bout wid one noda. So den, A beg ya fa tek time fa listen ta all A da tell ya now.
4“All de Jew people know how A beena lib fom wen A small. Dey know fom de fus ob me life, how A been dey wid me own people an een Jerusalem.
5Dey beena know me fa a long time. An ef dey wahn fa taak true, dey kin tell oona. A beena lib right, a good memba ob dem Pharisee, de group dat mo den all oda group keep on da folla dem rule bout de way we woshup God.
6Now A da stan op yah an dey da jedge me cause fa true, A da look fa de promise dat God gii we ole people.
7Dis de same promise dat de tweb tribe ob we Jew people hope gwine come true fa dem wiles dey da woshup God day an night. King Agrippa, cause A da look fa dis same promise fa come true, de Jew dem da taak bad ginst me!
8Hoccome oona Jew ain able fa bleebe dat God da mek de people dat done dead lib gin?
9“A too done beena tink dat fa sho, A oughta do all dat A kin do ginst de name ob Jedus dat come outta Nazareth.
10A done jes dat een Jerusalem. De leada dem ob de priest, dey gii me de tority, an A done chunk heapa God people een de jailhouse. An wen dey condemn um fa dead, A done cyas me vote ginst um too.
11Lotsa time A gone ta all de Jew meetin house fa hab um punish God people dey, an A try fa mek um say dey ain bleebe pon Jedus Christ no mo. A been so mad down ginst um dat A eben nyuse fa go ta city dem faa off een oda country fa mek dem people ob God suffa.
Paul Tell How Jedus Appeah ta Um
12“Dat hoccome A beena trabel ta Damascus. De leada dem ob de Jew priest done been sen me dey wid letta dat show dey gii me de tority fa grab hole ta God people dey.
13King Agrippa, A beena trabel pon de road ta Damascus een de middle ob de day, wen A see a bright light fom heaben come shine pon me an de man dem dat beena trabel long wid me. Dis light yah been real bright, mo bright den de sun.
14We all faddown ta de groun. An A yeh one boice da taak ta me een de Hebrew language say, ‘Saul, Saul, hoccome ya da fight me? Ya da haam yasef wen ya fight me, same like a ox wen e da kick ginst de sick ob e owna.’
15A aks, ‘Who ya da, Lawd?’ De Lawd ansa me say, ‘A Jedus dat ya da fight.
16Now git op, stan pon ya foot. A done appeah ta ya fa tell ya dat A done pick ya fa wok fa me. Ya gwine tell oda people wa ya done see ob me taday an wa A gwine show ya.
17A gwine sabe ya fom ya own Jew people an A gwine sabe ya fom de people dat ain Jew, dem dat A gwine sen ya ta.
18Ya gwine open dey eye. Ya gwine ton um way fom de daak an bring um eenta de light. Ya gwine ton um way fom onda Satan powa an bring um ta God so dat dey gwine bleebe pon me. An cause dey bleebe pon me, God gwine paadon dey sin an dey gwine hab dey place mongst de people dat God done pick fa e own.’
Paul Tell bout E Wok
19“So den, King Agrippa, A beena do dem ting dat de boice dat come outta heaben een dat bision, tell me fa do.
20Fus A gone, an tell de people een Damascus, den een Jerusalem, an den all oba Judea. An A tell de people dat ain Jew too. A tell um all dat dey oughta stop fa sin an change dey way, an come ta God. Dey oughta do dem ting dat show dey done come ta God.
21Cause ob dat, dem Jew grab hole ta me wen A been dey een God House, an dey try fa kill me.
22Bot God beena hep me all de time an eben taday. So den, A da stan op yah an tell all ob oona. A da tell de leetle one dem an de big leada dem. A da tell oona de trute bout God, da say jes de same ting, an no mo, dat de prophet dem an Moses done beena say gwine happen.
23Dey done been say dat de Messiah haffa suffa an dead. Dey say dat e gwine be de fus one dat gwine lib gin an git op fom mongst de dead people fa tell e own Jew people an de people dat ain Jew bout de light ob God sabation.”
24Wen Paul ansa um say dat, Festus holla say, “Paul, ya crazy! Ya done study an laan so much til dat da mek ya crazy!”
25Paul ansa say, “Mos gran Festus, A ain crazy! De wod A da say, dey mek sense an dey de trute.
26King Agrippa, ya know bout dem ting yah. A know dat dey ain been hide fom ya cause dey ain been done een a cona weh nobody kin shim. So A ain scaid fa tell ya all bout um.
27King Agrippa, ya bleebe wa de prophet dem tell we, ainty? A know ya bleebe um.”
28King Agrippa tell Paul say, “Ya tink dat een sush a leetle wile, ya gwine mek me come fa be a Christian?”
29Paul ansa say, “Ef e jes a leetle wile o ef e tek a long time, A da pray ya gwine come ta Christ. A da pray ta God fa ya an all de oda res dat da listen ta me taday, dat all ob oona gwine come fa be like me, cep fa dem chain yah dat A weah.”
30Den de king an de gobna an Bernice, an all de oda people dat been seddown dey, dey git op.
31Wen dey gone out, dey tell one noda say, “Dis man yah ain do nottin fa mek um kill um o mek um chunk um een de jailhouse.”
32King Agrippa tell Festus say, “Ya coulda set dis man free ef e ain done been say e wahn fa hab Caesar jedge e case.”