Dual PanelAnanias an Sapphira
1Now den, one man been dey name Ananias an e wife name Sapphira. Dey sell some lan, too.
2Ananias keep some ob de money fa esef, an e wife know e done keep um. Den Ananias tek de oda res ob de money an go gim ta de postle dem.
3Peter aks Ananias say, “Ananias, hoccome ya gree fa leh Satan go eenside ya, an tek oba ya haat an mek ya lie ta de Holy Sperit? Ya done keep some ob de money wa dey pay ya fa de lan!
4Fo ya sell de lan, dat been ya own lan, ainty? An wen ya done sell um, ya done git de money fa do waeba ya wahn wid um, ainty? So den, wa mek ya tink een ya haat fa do susha ting? Ya ain lie jes ta people. Ya lie ta God!”
5Wen Ananias yeh wa Peter say, e faddown stiff dead. All dem wa yeh bout dat been too scaid.
6Den de nyoung man dem come an wrap de dead body op, an tek um out an bury um.
7Wen shree hour done pass atta dey bury um, Ananias wife Sapphira come eenta de room weh de postle dem been. Bot Sapphira ain know wa happen.
8Peter aks Sapphira say, “Tell me, dis all de money wa dey pay ya an Ananias fa de lan wa oona sell?” Sapphira ansa say, “Yeah, sah, dat all de money.”
9Peter tell um say, “Wa mek ya an ya husban gree fa test da Sperit ob de Lawd? Look yah! De man dem wa done bury ya husban, dey da come ta de door. Dey gwine tek ya out an bury ya too!”
10Jes den Sapphira faddown an done dead. De nyoung man dem come an see dat e stiff dead too, an dey tek um out an bury um close ta e husban.
11Wen all de people ob de choch yeh wa happen, dey been scaid fa true. An all de oda wa yeh bout um, dey been scaid too.
De Postle Dem Mek Plenty People Well
12De postle dem beena do a heapa miracle an sign dem mongst de people. All de people wa been bleebe pon Jedus nyuse fa geda togeda een de place dey call Solomon Porch.
13All de people wa ain bleebe pon Jedus been scaid fa geda dey wid um. Bot dey beena taak real good bout um.
14Stillyet, mo an mo people bleebe pon de Lawd, a crowd ob man dem an ooman dem, dey come ta de Lawd.
15Wen de people see dem miracle de postle dem beena do, dey tote de sick out eenta de screet, an dey lay down pon dey bed an mat dey, so dat wen Peter da pass by, eben wen jes e shada cross oba dem sick,dat could mek um well.
16A heapa people come togeda fom dem town close ta Jerusalem, too. Dey bring dey sick an dem wa de debil hab trol oba, an dey come ta de postle dem. An de postle dem mek um all well.
De Postle Dem
17Den de head man ob de Jew priest dem an all dem wa gone long wid um, dem ob de Sadducee paaty, dey jealous fa true ob de postle dem.
18So dey grab hole ta de postle dem an pit um een de public jailhouse.
19Bot one ob de Lawd angel come een de night an open de door ta dat jailhouse. Den de angel lead de postle dem outta de jailhouse, an e tell um say,
20“Oona mus go stan op een God House. Mus tell de people all bout dis nyew life oona hab.”
21De postle dem do wa de angel tell um fa do. Wen day clean, de postle dem gone ta God House an laan de people bout de nyew life. De head man ob de priest an dem wa gone long wid um, dey call a big meetin wid all de Jew leada dem een de Council. Dey sen ta de jailhouse fa hab um bring de postle dem fa come fo de Council.
22Bot wen de offisa dem ob da gyaad git ta de jailhouse, dey ain find de postle dem dey. So de offisa dem ton back an gone ta de Council an tell de leada dem say,
23“Wen we git ta de jailhouse, we find um lock op good an de gyaad dem da stan op fa gyaad de door. Bot wen we open de door an look eenside, we ain see nobody dey!”
24Wen de captain ob de man dem wa beena gyaad God House an de leada dem ob de priest yeh dat, dey been all bumfumble, an dey aks one noda say, “Wa gwine come fom all dis?”
25Jes den a man come een an tell um say, “Look yah! Dem man wa oona done pit een de jailhouse, dey da stan op oba dey een God House, da laan de people bout God!”
26So de captain an e gyaad dem gone an find de postle dem een God House. An dey bring um back ta de Council. Bot dey ain haam um wen dey mek um come, cause dey been scaid dat de people gwine stone um.
27Dey bring de postle dem een an mek um stan op fo de Council. An de head man quizzit um.
28E say, “We done chaage oona dat oona mus dohn laan nobody een de name ob dis man, ainty? Stillyet, oona done laan de people an mek all dem een Jerusalem yeh bout um, an oona wahn fa mek people blame we cause dey done kill um!”
29Peter an de oda postle dem ansa um say, “We haffa do wa God tell we fa do, steada wa people tell we fa do.
30Wen oona done hang Jedus pon a tree an kill um, dat God wa we ole people beena woship, e done mek Jedus lib gin an git op fom mongst de dead people.
31God gii Jedus tority an powa an mek um seddown ta e right han fa be we Leada an we Sabior. E done dat fa gii de people ob Israel de chance fa ton fom dey sin an change how dey lib. Den God kin paadon um fa dey sin.
32We postle done see an yeh dem ting yah, an we da mek people know de trute bout um. An de Holy Sperit mek um know de trute, too. An God gii de Holy Sperit ta dem people wa da do wa e tell um fa do.”
33Wen de Council man dem yeh wa de postle dem say, dey been so mad til dey wahn fa hab um kill de postle dem.
34Bot Gamaliel, a Pharisee wa beena laan people de Jew Law, e been one ob dem een dat Council, an all de people spec um fa true. E stan op een de Council, an e gii orda fa dem fa tek dem postle outside de meetin place fa a leetle bit.
35Den e tell de Council man dem say, “Me countryman ob Israel, mus tek cyah fa true bout wa oona gwine do ta dem man yah.
36Some time go, one man name Theudas done come an say e a big leada, an dey been bout fo hundud man wa jine op wid um fa hep um. Somebody kill um, an all de people wa beena folla um been scatta all roun. So Theudas wok ain mount ta nottin.
37Atta dat, one Judas wa come fom Galilee, been dey een dat time wen dey beena write all de people name down. E git some ob de people fa folla um. Somebody kill Judas too, an all dem people wa beena folla um been scatta roun.
38So den, all dis mek me waan oona now. Mus dohn haam dem man yah! Mus lef um lone! Cause ef God ain sen um, all dis dat dey plan an de wok dey da do ain wot nuttin. E ain gwine las.
39Bot ef dey da do wa God wahn, oona ain gwine be able fa stop de wok dey da do. Cause maybe oona gwine find out dat oona da fight eben ginst God!” De Council man dem tek Gamaliel wod.
40Dey hab dem postle come back een an mek de gyaad dem beat de postle. Dey chaage um say, “Mus dohn taak gin een Jedus name.” Den dey leh um go way.
41De postle dem come out fom de Council. An dey beena rejaice fa true, cause dey know God sho dat dey good nuff fa suffa an git punish fa Jedus sake.
42An ebry day dey gone ta God House an ta de people house. Dey beena keep on all de time da laan de people, da tell um de Good Nyews dat Jedus de Messiah.