Alkitab Mobile SABDA
[VER] : [GULLAH]     [PL]  [PB] 
 <<  Kisah Para Rasul 9 >> 

Saul Bleebe pon Jedus

1Dat same time dey, Saul beena stillyet mek dem wa waak een de way ob de Lawd fa suffa. E keep on da say e gwine kill um. An e gone ta de head man ob de priest dem.

2E aks um fa gim letta wa show e hab tority fa go eenside all de Jew meetin house een Damascus. Den ef e meet somebody dey wa da waak een de Lawd Way, e could grab hole ta dat poson, man o ooman, an tek um back as prisona ta Jerusalem.

3Paul been gone long dey pon de Damascus road. Wen e git close ta de city, all ob a sudden a bright light come outta heaben an shine like lightnin roun um.

4E faddown pon de groun. An e yeh a boice da tell um say, “Saul, Saul, wa mek ya fight me?”

5Paul say, “Who ya da, Lawd?” An de boice say, “A Jedus. A de one ya da fight.

6Bot git op fom de groun an go eenta de city. Somebody gwine meet ya dey an tell ya wa ya haffa do.”

7De man den wa beena trabel long wid Saul, dey jes stan dey. Dey ain crack dey teet. Dey yeh de boice dat beena taak, bot dey ain see nobody.

8Saul git op fom de groun an open e eye, bot e ain able fa see nottin. So de man dem dat been dey wid um, dey tek hole ta e han an lead um eenta Damascus.

9An fa shree day dey, Saul eye bline, an e ain nyam an e ain drink nottin.

10One man been dey een Damascus wa bleebe pon de Lawd Jedus an waak een e way. E name Ananias. De Lawd show um a bision. E see de Lawd an e yeh um da call um say, “Ananias!” E ansa say, “Lawd. A dey yah.”

11De Lawd tell um say, “Git op an go ta de screet dey call Scraight Screet. Mus go ta Judas house an aks fa one man name Saul wa come outta Tarsus. Dat man Saul da pray dey.

12An een a bision A done show um a man name Ananias. Saul see um come eenta de house an lay e han pon Saul head an pray fa mek um able fa see gin.”

13Ananias ansa say, “Lawd, a heapa people done tell me bout dis man Saul an bout all de ebil ting e done do ta ya people een Jerusalem.

14Now e done come yah ta Damascus, an de leada dem ob de Jew priest dem gim tority fa grab hole ta all dem wa da pray ta ya an call pon ya name, fa tek um way.”

15De Lawd tell Ananias say, “Ya mus go. A done pick Saul fa wok fa me. E gwine tell bout me, an mek de people dat ain Jew, an king dem, an de people ob Israel, know me.

16A gwine show Saul de plenty ting e haffa suffa so dat oda people kin know me.”

17So Ananias gone. E gone eenta de house an lay e han pon Saul head. E pray fa um say, “Me broda Saul, de Lawd Jedus who ya done see wen ya been dey pon de road wen ya beena come yah, e sen me ta ya. E sen me fa pray fa ya so dat ya kin git full op wid de Holy Sperit.”

18Jes den, sompin like fish scale come off Saul eye. An Saul able fa see gin. E git op an dey bactize um.

19Atta e done nyam, e git e scrent back.

Saul Tell bout Jedus een Damascus

Saul stay a few day een Damascus wid dem wa bleebe pon Jedus an waak een e way.

20E gone right way ta dem Jew meetin house an tell ebrybody bout Jedus. E say, “Jedus, e God Son.”

21All de people dat yeh Saul been stonish an say, “Ain dis de man dat beena kill people wa pray an call pon Jedus name een Jerusalem? Ain e done come yah too, jes fa grab hole ta dem people yah who da pray an call pon Jedus name? Ain e come fa tek um back ta de leada dem ob de Jew priest?”

22Stillyet, Saul beena tell bout Jedus wid mo an mo powa. Wen e show fa true dat Jedus de Messiah, de Jew people een Damascus ain been able fa ansa um nottin.

23Atta plenty day pass, de Jew people hab a meetin an mek scheme fa kill Saul.

24Bot somebody tell Saul wa de Jew people plan fa do ta um. Day an night dem Jew people beena watch an wait by dem city gyate fa ketch um an kill um.

25Bot one night, de people wa bleebe wa Saul beena tell um bout Jedus, dey pit Saul een a basket an pass um oba de wall dat dey roun de city. An dey leddown de basket wid Saul eenside um, down ta de groun.

Saul een Jerusalem

26Saul gone ta Jerusalem fa try fa jine op wid dem dat waak een de Lawd way. Bot dey ain bleebe Saul beena waak een de way fa true, so dey all been scaid ob um.

27Bot Barnabas hep Saul. E tek um ta de postle dem. E tell um bout how Saul see de Lawd pon de road ta Damascus an how de Lawd taak ta Saul. Barnabas tell um too bout how Saul ain been scaid fa tell all de people een Damascus bout Jedus.

28So den, Saul stay dey wid de bleeba dem. An e gone roun all oba Jerusalem. E ain been scaid tall fa tell ebrybody bout de Lawd.

29Saul beena taak an spute wid de Jew people wa taak de Greek language, too. Bot dem people beena try fa kill um.

30De bredren wa bleebe pon Jedus yeh dat de Greek Jew people wahn fa kill Saul, so dey tek Saul down ta Caesarea an sen um way ta Tarsus.

31Jurin dat time, nobody ain mek de choch people all oba Judea, Galilee an Samaria suffa no mo. Dey come fa be mo scronga een de faith, an de Holy Sperit beena hep um, so dat mo an mo people bleebe pon Jedus. Dey beena do wa God wahn, da gii hona ta de Lawd.

Peter een Lydda an Joppa

32Peter beena gwine all oba de country. An one day e gone fa see God people een de town ob Lydda.

33Dey een Lydda, e meet one man name Aeneas who ain been able fa moob. E done been een e bed eight yeah.

34Peter tell um say, “Aeneas, Jedus Christ da mek ya well. Git op an mek op ya bed.” Same time, Aeneas git op.

35All de people dey een Lydda an pon de plain ob Sharon, dey see Aeneas done git well, so dey ton ta de Lawd.

36Now one ooman been dey een Joppa city name Tabitha. (De Greek people call um Dorcas, wa mean “deer.”) Tabitha been one ob dem wa waak een de Lawd way. All de time Tabitha beena do good an hep dem wa ain hab nottin.

37Een dat time wen Peter been een Lydda, Tabitha been sick an e done dead. Dey wash e body an lay um een a opstair room.

38Joppa been close ta Lydda. So een Joppa, wen dem wa waak een de way yeh say Peter dey een Lydda, dey sen two man ta Peter fa tell um say, “Please sah, come ta we real quick.”

39So Peter git op an gone wid um. Wen Peter reach Joppa, dey tek um ta de opstair room weh Tabitha body da lay pon de bed. All de wida ooman geda dey roun Peter. Dey da cry an show Peter de coat an oda cloes dem dat Dorcas done mek fo e done dead.

40Peter sen all ob um outta de room. Den e kneel down an pray. E ton ta de dead body an say, “Tabitha, git op!” Tabitha open e eye. Wen e see Peter, e sit op.

41Peter tek e han an hep um stan op. Den Peter call de people wa bleebe pon Jedus an de wida dem an show um dat Tabitha da lib gin.

42De nyews bout dis spread all oba Joppa. Cause ob dat, a heapa people bleebe pon de Lawd.

43Peter stay dey een Joppa some time. E stay wid a man wa da wok wid lezza, wa name Simon.


  Share Facebook  |  Share Twitter

 <<  Kisah Para Rasul 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel