Dual PanelWa De Ole People Teach
1Some Pharisee dem an some Jew Law teacha dem fom Jerusalem come geda roun Jedus.
2Dey see Jedus ciple dem da nyam widout wash dey han de right way. Dat mean say dey ain wash dem like how de ole people say dey haffa do fa mek um clean een God eye.
3(Cause de Pharisee dem an all de oda Jew people ain nyam cepin dey wash dey han dat special way wa dem ole people done beena laan dem own Jew people fa do.
4An wen dey buy ting een de maakut, dey neba nyam um cepin dey wash dey han dat special way. An dey beena do plenty oda ting wa dey ole people done beena laan dem own Jew people fa do, like fa wash cup an pot an coppa bowl dat special way.)
5De Pharisee dem an de Jew Law teacha dem aks Jedus say, “Hoccome ya ciple dem ain wash dey han fo dey nyam? Hoccome dey ain do like how we ole people been laan we?”
6Jedus ansa um say, “De prophet Isaiah done tell de trute bout oona wen e write say, ‘Dese people yah da hona me wid dey mout, bot dey haat ain dey wid me.
7Wen dey woshup me op, dat dohn mean nottin, cause dey da laan people fa do law wa people jes mek op. Dey say dat God Law, bot e ain so.’
8Jedus say, “Oona done stop do wa God tell people fa do, an oona da do jes wa people tell oona fa do.”
9E tell um say, “Oona tink oona hab good sense wen oona ain do wa God Law tell oona fa do. Oona do like dat jes fa do wa oona ole people tell oona fa do!
10God Law, wa Moses done write, tell we say, ‘Ya mus show hona an be manisable ta ya fada an modda.’ An Moses say, ‘De poson wa taak bad ginst e fada o e modda, oona mus kill um.’
11Bot oona say ef anybody hab sompin e able fa gii e fada o e modda wa gwine hep um, e ain haffa gim. E kin say, ‘Dis ting Corban’ (dat mean, A done promise fa gii God dis ting yah),
12an oona say dat poson ain haffa gii e fada o e modda de ting wa been gwine fa hep um.
13Dat show how oona ain do wa God say. Oona jes da do dem ting wa oona ole people laan oona fa do. An oona da laan oona chullun same ting. Oona da do plenty oda bad ting like dem yah.”
Ting wa Mek Poson Sinna een God Eye
14Jedus call de crowd back an tell um say, “Mus listen ta me good fashion, so dat oona ondastan.
15Ain nottin wa nobody nyam, ain nottin wa nobody drink wa mek um sinna een God eye. Bot wa da come outta de poson, wa e da study bout een e haat an wa e mout da taak, dat wa mek um sinna een God eye.
16[Listen yah, oona wa hab yea fa yeh. Oona oughta yeh an study good pon wa A say.]”
17Wen Jedus lef de crowd an gone eenside de house, e ciple dem aks um wa mean dat wa e done say.
18So Jedus tell um say, “Oona too ain ondastan wa A done tell oona, ainty? Dat wa a poson nyam an drink ain able fa mek e haat bad, mek um sinna een God eye.
19Cause dat food an drink ain gone eenta e haat. Dat food an drink gone eenta e belly an den come outta e body.” (Wen Jedus say dat, e laan we dat we kin nyam all kinda food.)
20An e say, “Wa a poson da taak, wa come out fom eenside e haat, dat wa mek de poson sinna een God eye.
21Cause eenside, een e haat, a poson da study fa do ebil ting, fa ramify roun fa do immoral ting, fa tief, fa kill.
22Een e haat, e da study fa sleep wid oda poson wife o husban, fa cyas eye pon oda poson propaty, fa do all kinda wickity ting, fa tell lie. E da study fa tell lie bout people, fa mek proud, an fa do foolish ting.
23All dem ebil ting come fom eenside poson haat an dey mek poson sinna een God eye.”
De Ooman Wa Bleebe Een Jedus
24Wen Jedus lef dey, e gone way ta de countryside close ta de city name Tyre an Sidon. An e gone eenta a house dey. E ain wahn nobody fa know e dey, bot de people done find out.
25One ooman beena lib dey wa hab daughta wid ebil sperit eenside um. Wen dat ooman yeh bout Jedus, e mek hace an gone an kneel down fo Jedus.
26De ooman ain been a Jew. E been bon een Phoenicia een Syria country. E beg Jedus fa dribe de ebil sperit outta e daughta.
27Jedus ansa de ooman, say, “Fus off leh we feed de chullun. E ain fittin fa tek way de chullun food an shrow dat food ta de dog dem.”
28De ooman ansa Jedus say, “Fa true, sah, bot eben de dog dem onda de table kin nyam de food lefoba wa da fall down wen de chullun nyam!”
29So den, Jedus tell dat ooman say, “Cause ya ansa so good, ya kin go back home now. Cause de ebil sperit done come out fom eenside ya daughta.”
30So de ooman gone home. An e find da chile de lay peaceable pon de bed. Sho nuff de ebil sperit done come out fom eenside um!
Jedus Heal One Deef Man Wa Hab Hebby Tongue
31Den Jedus lef de countryside close by Tyre. E gone shru Sidon an de arie wa dey call de Ten Town ta Lake Galilee.
32Some people come ta um dey, bring um one deef man wa hab hebby tongue. De people beg Jedus fa pit e han pon dat man head fa heal um.
33Jedus gone wid de man off by deysef, way fom de crowd. Jedus pit e finga eenside de man yea. E spit an tetch de man tongue wid e spit.
34Den Jedus look op ta heaben an leh out a big sigh. E say ta dat man, “Ephphatha,” wa mean, “Ya yea gwine open op!”
35Dat same time de man kin yeh. E tongue ain been hebby an e staat fa taak clean wid no trouble tall.
36Den oba an oba Jedus chaage de people say, “Mus dohn tell nobody wa A done ta de man.” Bot ebry time e tell um, mo an mo dey beena tell people wa Jedus done done.
37All de people beena stonish. Dey da say, “E da do ebryting good good! E eben da mek deef people yeh an e heal people wa hab hebby tongue so dey kin taak.”