Alkitab Mobile SABDA
[VER] : [GULLAH]     [PL]  [PB] 
 <<  Roma 4 >> 

Abraham Trus God

1Leh we study bout Abraham, we ole people leada. Wa e find out bout how God mek all ting right?

2Ef God done mek all ting right tween Abraham an esef cause ob dem ting wa Abraham do, Abraham been gwine hab sompin fa brag bout. Bot e cyahn brag ta God bout dat.

3Cause memba dat dey write een God Book say, “Abraham trus God, an cause e trus um, God tell um say, all ting right tween Abraham an God.”

4Now den, wen somebody wok fa money, e git pay fa de wok wa e do. Ain nobody gwine say dey jes gim de money. Cause dey know e been wok fa dat pay.

5Bot leh we study bout de one wa ain got no hope een de ting e da do fa please God. Steada dat, e da trus een God wa mek all ting right tween esef an wickity people. God gwine mek all ting right tween dat poson an esef, cause e trus een God, an e ain cause dat poson wok fa be right wid God.

6Dat wa David mean wen e write bout de one wa God cept, da say all ting right tween God an dat poson, eben dough dat poson ain da do nottin fa please God fa mek God cept um, bot e trus God. David say dat poson git blessin. David say:

7“De people dem wa God been paadon dey sin, dey bless fa true. God fagib dem people de ebil dey done, an e ain memba dey sin no mo.

8Dem people wa God look pon an say e ain count dey sin ginst um no mo, cause e done paadon um, dey bless fa true!”

9Dis blessin yah wa David taak bout, dat jes fa de people dem wa been circumcise fa sho dey blongst ta God? No, e de same way fa de people dem wa ain been circumcise. We beena say dat Abraham trus God, an cause ob dat, all ting scraight twix Abraham an God.

10Wen God do dat? E happen fo Abraham been circumcise, o atta e been circumcise? E ain happen atta e been circumcise. Fa sho, e happen fo Abraham been circumcise.

11Atta God done mek all ting right tween Abraham an esef, God chaage Abraham fa git circumcise. An wen e been circumcise, dat been a sign fa sho dat God done mek all ting right tween esef an Abraham, cause e been trus God wiles e ain been circumcise. So den, Abraham de fada fa all de people wa trus een God, dem wa God taak bout say, e done mek all ting right tween dem an God, wiles dey ain been circumcise.

12An Abraham de fada fa all Jew people, too, wa been circumcise an trus God, da waak een de way ob fait, jes like Abraham beena trus God an waak een de way ob fait fo e been circumcise.

Cause People Trus een God, Dey Gwine Git wa God Promise

13Abraham ain been able fa do all wa de Law say e oughta do, so e ain fa sake ob dat God promise um an e granchullun chullun, say e gwine gim de wol. God promise um dat cause Abraham hab fait een God, an dat wa mek all ting scraight twix God an Abraham.

14Ef dem ting wa God promise, dey jes fa de people dem wa da do wa de Law say, den fait ain mean nottin an God promise ta dem wa trus um ain wot nottin.

15Cause ob de Law, God gwine jedge people cause dey broke de law. Bot weh dey ain no Law, people ain gwine broke um, so God ain gwine jedge um coddin ta de law.

16So den, cause people trus een God, dey gwine git wa God been promise. Fa true de ting God promise fa gii ta all Abraham granchullun chullun, e free. An dat promise ain jes fa dem wa da do wa de Law say, bot e fa dem too wa trus een God like Abraham been trus een God. Abraham de speritual fada fa all we.

17Like dey write een God Book, weh God say, “A done mek ya fa be de fada ob a heapa nation.” Een God eye, Abraham we fada, an God de one Abraham trus. God de same God wa da mek people wa done dead git life gin. Wen e jes gii de wod, dem ting wa ain been dey een de wol, dey gwine be.

18Abraham trus an look fowaad ta wa God promise. E trus dat e gwine happen eben wen dey ain been nottin fa Abraham fa see. An cause ob dat, e come fa be “de fada ob a heapa nation.” Jes like dey write een God Book say, “Ya gwine hab heapa granchullun chullun, jes like de staa dem wa ya ain eben able fa count.”

19Abraham ain neba doubt dat God gwine do wa e been promise. Abraham been bout one hundud yeah ole an e know dat e too ole fa bon a chile. An e know dat e wife Sarah ain been able fa bon a chile.

20Stillyet, nottin ain mek Abraham doubt dat God gwine do wa e been promise um. E trus een God mo an mo, da praise God fa wa e been gwine fa do.

21Abraham been sho, fa true, dat God able fa do wa God been promise fa do fa um.

22Dat why dey write een God Book say, “Abraham trus God, an dat wa mek all ting scraight twix esef an God.”

23Dem wod weh dey write say, “all ting scraight twix Abraham an God,” dey ain been write jes fa sake ob Abraham.

24Dey been write fa we too. Ef we hab fait een God, wa mek we Lawd Jedus git op fom mongst de dead people an lib gin, all ting gwine be scraight twix we an God.

25God been leh Jedus dead fa pay fa we sin, an e mek Jedus git op fom mongst de dead people an lib gin so dat e kin mek all ting right tween we an God.


  Share Facebook  |  Share Twitter

 <<  Roma 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel