Dual PanelGod Mek All Ting Scraight Twix We an Esef
1We God done mek all ting scraight twix we an um, cause we trus een wa Christ done. So den, we at peace wid God, cause ob wa we Lawd Jedus Christ done do fa we sake.
2Cause ob wa Christ done, an cause we trus um, e mek we know how God da keep on da do good ta we. An now we da lib, fa know God blessin pon we fa true. So we full op wid joy, cause we know fa sho dat God gwine gii we we paat een e glory an mek we be like um.
3Fudamo, we rejaice too, cause eben wen we da suffa cause we trus een Christ, we know dat we da suffa fa mek we git mind fa beah waeba come ta we.
4An wen we git mind fa beah waeba come, God sattify wid we. An wen we know dat God sattify wid we, we know fa sho dat God gwine gii we we paat een e glory.
5An cause we know dat God gwine do um, we know dat e ain gwine disappoint we. Cause God beena show we hommuch e lob we by de Holy Sperit wa God gii we, wa mek we know God lob een we haat.
6Wiles we stillyet been sinna an ain been able fa hep wesef, Christ done dead fa we sake, we wa ain beena do wa God wahn. E done dead at jes de right time wa God pick.
7Ain haadly eba happen dat somebody gwine dead fa sake ob noda poson, eben wen dat poson da do all wa de Law say e oughta do. Stillyet, fa sake ob noda poson wa good an kind, a poson might eben hab courage nuff fa dead.
8Bot God show we hommuch e lob we, cause eben wiles we been still sinna, Christ dead fa we sake.
9Now den, cause Christ dead fa we, e done mek all ting scraight twix we an God. So we eben mo sho dat cause ob Christ, God ain gwine be bex wid we pon dat day wen e gwine jedge all people.
10We been God enemy bot e done bring we back ta esef an mek we e fren, wen e Son dead fa we. Now dat we done come back ta God, we eben mo sho dat cause Christ done git op fom mongst de dead people an e da lib gin, God ain gwine neba punish we!
11An dat ain all. We da rejaice cause ob wa God done fa we cause ob we Lawd Jedus Christ, wa done dead so dat God kin bring we back ta esef.
How Adam an Christ Diffunt
12Sin fus come eenta de wol wen one man sin, an dat man sin mek um dead. An sin spread out ta all people an dey all sin, an cause ob dat, all people gwine dead.
13People een de wol beena sin fo God gii Moses de Law. Bot wen de law ain dey, God ain say people guilty fa dey sin.
14Bot fom de time wen Adam lib til de time ob Moses, all people beena sin an so dey haffa dead. Dey all gwine dead, eben dem wa ain been sin een jes de same way dat Adam sin wen e ain do wa God chaage um fa do. Now den, how Adam stan show we a leetle bit bout how Christ, de one wa been fa come, been gwine stan.
15Bot dem two ain de same, cause de sin wa Adam sin, dat diffunt fom wa God gii e people fa free. Fa true, cause dat one man Adam sin, plenty people dead. Bot fa sho, de blessin wa God gii e people, dat a whole heap mo betta! An God free gif, wa people ain got fa pay fa, dat fa a whole heapa people wa sin. God bless all dem people cause ob dat one man, Jedus Christ.
16Wa God been gii people fa free, dat diffunt fom wa happen wen de one man sin. Wen de one man sin, God jedge um, an God say e guilty an e haffa git punish. Bot now wen people sin, God ain mek dem dead fa dey sin, like dey been jue fa dead. E tell um say, dey ain guilty, an e mek all ting scraight twix dem an esef.
17Fa true, cause one man sin, fom dat time dey, all people been haffa dead cause ob wa dat one man Adam do. Bot wa happen cause ob wa de one man Jedus Christ do, dat a whole heap mo betta! All de people wa cept God blessin, eben dough dey ain fit fa git um, an dey cept dat God mek all ting scraight tween esef an dem, an dat dey ain got fa pay fa dat, dey all gwine git dey paat fa rule een life shru de one man Jedus Christ.
18So den, God condemn all people cause ob one man sin. Same way so, God done mek all people free an gii nyew life cause ob dat right ting wa one man, Jedus Christ, done.
19An wen de one man Adam sin, dat mek all people sinna. Same way so, cause de one man Jedus Christ do wa God tell um fa do, God mek all ting right tween esef an plenty people.
20God sen de Law fa mek people ondastan mo bout how dey sin fa true. Bot wen people keep on da sin mo, God keep on da show e blessin ta we mo an mo.
21God keep on da show we e blessin so dat jes like sin been git powa fa mek all people dead. Same way so, God blessin pon we got powa fa mek we git life wa ain neba gwine end, now dat God done mek all ting scraight twix esef an people cause ob wa we Lawd Jedus Christ done fa um.