Dual PanelOne Ooman an One Big Dragon
1Den op een de sky A see one great sign wa maze all de people. One ooman been dey, an de sun kiba um jes like a dress. An de moon been dey onda e foot. E been weah crown wa got tweb staa een um, pon e head.
2E been speckin, an e been lef jes leeleetle bit fa de chile fa bon. So de ooman pain been mek e da holla.
3Den A see noda mazin sign op een de sky. One real big red dragon been op dey. An e been got seben head an ten hon. An ebry one ob e seben head got one crown pon um.
4Dat dragon tek e tail an draw one outta ebry shree staa outta de sky. An e heabe um down pon de wol. Dat dragon go stanop fo de ooman. De ooman chile been fa bon, an de dragon stanop so dat e kin name de chile op, jes wen e bon.
5De ooman hab one boy chile, wa gwine rule oba all de people ob all de nation ob de wol. E gwine rule wid tority oba all dem wid iron staff. An de dragon ain neba name de chile op. God mek angel go grab hole ta de chile, tek um ta God wa da seddown pon e trone fa rule.
6De ooman ron way eenta de desat, ta place wa God done been mek fa um. Dey gwine tek cyah ob um dey fa one tousan, two hundud an sixty day.
7Now den, dey been waa sen heaben, Michael an e angel dem beena fight de dragon. An de dragon fight back wid e own angel dem.
8Bot Michael an e angel dem win out oba de dragon. So de dragon an e angel dem ain got no place een heaben no mo. Dey haffa lef dey.
9Michael an e angel dem heabe dat big dragon outta heaben. E dat ole saapent wa dey call de Debil o Satan. E beena mek all de people een de wol sin. Michael an e angel dem heabe um down eenta de wol, wid all e angel dem.
10Den A yeh loud boice da taak een heaben say, “De time wen God gwine sabe e people done come! God gwine show E powa an rule now an be King oba all de wol! An Christ de Messiah wa God sen gwine rule wid tority! Cause de one wa beena stanop fo God day taak day an night, da say we Christian broda dem do bad, dey done heabe dat one down outta heaben.
11We Christian broda dem win out oba um. Dey win wid de blood ob de Lamb an de true wod wa dey beena tell people bout God. An pontop dat, dey been ready fa dead fa God ef dey haffa.
12So den, oona mus rejaice dey een heaben! Oona mus rejaice, all oona wa lib dey! Bot e gwine be haad time fa dem wa lib een de wol an pon de sea! Cause de Debil come down ta oona! E bex real bad cause e know e got jes leeleetle bit ob time lef.”
13Wen de dragon see dat dey done heabe um down eenta de wol, e staat fa ron atta de ooman wa been bon de boy chile.
14Bot somebody gii de ooman two wing fom a big eagle so dat de ooman been able fa fly ta e place een de desat. An dey gwine tek cyah ob de ooman dey fa shree an haf yeah. An de dragon ain gwine be able fa do um bad.
15So de dragon shrow plenty wata outta e mout. Jes like a riba, de wata staat fa ron atta dat ooman fa cyaa um way.
16Bot de groun hep de ooman. E open op e mout an swalla de riba ob wata wa beena come outta de dragon mout.
17Cause ob dat, de dragon been bex real bad wid de ooman. So e gone fa fight e oda chullun an chullun chullun dem. Dey all dem wa da do wa God tell um fa do an wa bleebe de true ting wa Jedus show um an folla um.