Alkitab Mobile SABDA
[VER] : [GULLAH]     [PL]  [PB] 
 <<  Yohanes 14 >> 

Jedus de Way ta de Fada

1Jedus tell e ciple dem say, “Mus dohn leh oona haat be hebby. Mus keep on da trus God, an mus trus een me too.

2Plenty room dey een me Fada house. A gwine dey fa mek de place ready fa oona. Ef e ain been so, A been fa tell oona.

3An atta A done mek de place ready fa oona, A gwine come back fa tek oona wid me an go ta dat place so dat oona too gwine be weh A da.

4Oona know de way fa git ta de place weh A da gwine.”

5Thomas aks Jedus say, “Lawd, we ain know weh ya da gwine, so how we kin know de way fa git dey?”

6Jedus ansa um say, “A de way, A de trute, an A de life. Nobody ain gwine come ta de Fada cep e go shru me.

7Ef oona beena know me fa true, oona gwine know me Fada too. An fom now on, oona da know um an oona da shim.”

8Philip aks Jedus say, “Lawd, show we de Fada. Dat all we need.”

9Jedus ansa Philip say, “A done lib mongst oona all dis long time. Stillyet ya ain know me, Philip? Ebrybody wa done see me done see me Fada. Hoccome ya say, ‘Show we de Fada’?

10Ain ya bleebe A lib eenside de Fada an de Fada lib eenside me?” Den Jedus say ta all e ciple dem, “E ain jes me wod wa A done tell oona, bot de Fada, wa da lib eenside me, e da do e own wok.

11Oona mus bleebe me wen A da tell oona say, de Fada lib eenside me an A lib eenside de Fada. Bot ef oona ain bleebe me wen A say dat, oona mus bleebe me wen oona memba dem miracle A beena do.

12A tell oona fa true, ebrybody wa bleebe pon me gwine do miracle same like A beena do. E gwine do ting wa eben mo greata den A beena do, cause A da gwine ta de Fada.

13Wasoneba oona aks fa een me name, A gwine do wa oona wahn, so dat A de Son gwine gii glory ta de Fada.

14Oona kin aks fa anyting een me name an A gwine do um.

Jedus Promise fa Sen God Sperit

15“Ef oona lob me, oona gwine do wa A tell oona fa do.

16A gwine pray ta de Fada fa gii oona noda one fa come long side oona fa hep, an God gwine sen dat hepa fa lib wid oona faeba.

17Dat de Holy Sperit wa da mek people know de trute. De people een de wol ain able fa leh dis Holy Sperit een dey life, cause dey ain shim an dey ain know um. Bot oona know um, cause e da lib wid oona an e gwine stay eenside oona.

18“Wen A gone, oona ain gwine be lef like chullun wa ain got nobody fa hep um. A gwine come back ta oona.

19Purty soon, de people een de wol ain gwine see me no mo, bot oona gwine see me. An cause A hab de true life, oona gwine hab de true life too.

20Wen dat day come, oona gwine know A da lib een me Fada an oona da lib een me, same like A da lib een oona.

21“Ebrybody wa know wa A done chaage um fa do an do um, dat de one wa lob me fa true. Me Fada gwine lob dat one wa da lob me, an A gwine lob um too. An A gwine mek dat one know me mo an mo.”

22Judas (not Judas Iscariot) aks um say, “Lawd, hoccome e jes we ya gwine mek know who ya da? Hoccome ya ain gwine mek all de people een de wol know who ya da?”

23Jedus ansa um say, “De one wa lob me gwine do wa A laan um fa do. Me Fada gwine lob dat one. An me an me Fada gwine come ta um an lib wid um.

24De one wa ain lob me ain gwine do wa A laan um fa do. Dem wod yah wa A da laan oona, dey ain me own wod. Dey de Fada wod wa e done sen me fa laan oona.

25“A done tell oona dem wod now wiles A still yah wid oona.

26Bot de One wa gwine long side oona fa hep, dat de Holy Sperit. De Fada gwine sen um ta oona een me name. De Holy Sperit gwine laan oona all ting an mek oona memba all A done tell oona.

27“Now dat A da gwine way fom yah, A da gii oona peace een oona haat. Me own peace A da gii oona. A ain da gii oona de kind ob peace dat de people an de ting een dis wol yah da gii. Oona mus dohn leh oona haat be hebby bout nottin. Mus dohn be scaid.

28Oona done yeh me tell oona say, ‘A da gwine way fom yah, bot A gwine come back ta oona.’ Ef oona beena lob me, oona gwine know fa true dat A da gwine ta de Fada. Cause de Fada mo greata den me.

29A done tell oona all dis fo e happen so dat wen e happen, oona gwine bleebe.

30A ain got much mo time fa taak ta oona now, cause de one wa da rule oba dis wol, e da come. Bot e ain got no powa oba me.

31Bot de people een de wol haffa know A lob de Fada, an cause ob dat, A do jes wa e chaage me fa do. “Oona come now, leh we gone fom yah.


  Share Facebook  |  Share Twitter

 <<  Yohanes 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran