Alkitab Mobile SABDA
[VER] : [GULLAH]     [PL]  [PB] 
 <<  Yohanes 5 >> 

Jedus Mek a Sick Man Well

1Atta dat, Jedus gone ta Jerusalem fa a Jew holiday feas.

2Een Jerusalem, a pool ob wata been dey by de place dey call “Sheep Gyate.” De Jew people call dat pool Bethesda. An dey been fibe poch close by dat wata.

3A whole heapa sick people been gone leddown pon dem fibe poch. Some dem been bline, some been cripple op, an some been paralyze. [All dem beena wait fa de waata fa moob.

4Fom time ta time one angel ob de Lawd come down fa stir op de wata. Wen de wata moob, de fus one wa git een de wata gwine be heal ob waeba ailment e hab.]

5One man been dey wa been sick tirty-eight yeah.

6Wen Jedus come, e see de man leddown dey. E know dat man been sick a long time, so e aks um say, “Ya wahn fa git well?”

7De sick man ansa say, “Sah, A ain got nobody fa pit me een de wata wen e moob. Ebry time A da try fa git een, somebody beat me ta de wata.”

8Den Jedus tell de man say, “Git op fom dey. Pick op ya mat an waak!”

9All ob a sudden de man been well. E pick op e mat an waak. Now den, dis ting happen pon de Jew Woshup Day.

10So de Jew leada dem see de man wa been sick an done git well, da tote e mat. Dey tell um say, “Dis yah we Woshup Day, an e ginst we Law fa ya fa tote ya mat pon we Woshup Day.”

11Dat man ansa say, “De man wa mek me well done tell me fa pick op me mat an waak.”

12Den de Jew leada dem aks um say, “Wa man tell ya fa do dat?”

13De man wa Jedus done mek well ain know who dat been, cause dey been a heapa people dey, an Jedus done slip way.

14Jedus find dat man eenside God House. E tell um say, “Look yah, ya well now. Mus dohn sin no mo. Cause ef ya keep on da sin, sompin mo wossa gwine happen ta ya.”

15Den de man lef Jedus an gone tell de Jew leada dem say, dat man wa mek um well, e name Jedus.

16So den de Jew leada dem staat fa do Jedus bad cause e mek de man well pon de Woshup Day.

17Jedus tell um say, “Me Fada da wok all de time eben ta now. An A da wok too.”

18Wen Jedus say dat, de Jew leada dem cide fa all de mo fa kill um fa sho. Dey wahn fa kill um cause e broke de Jew Law pon de Woshup Day. An den too, e eben say dat God e own Fada, so e mek esef same like God.

God Gii e Son Tority

19Jedus ton ta de Jew leada dem an e say, “A da tell oona fa true. De Son cyahn do nottin by esef. E do jes wa e see e Fada da do. De Son cyahn do no mo den dat. Waeba de Fada do, dat wa de Son do too.

20Cause de Fada lob e Son an e da show um all wa e da do. E gwine show de Son mo ting wa e fa do wa a whole heap mo betta den dis ting yah. Dem gwine mek oona stonish bout um fa true.

21Jes like how de Fada da mek people wa done dead git op, come out fom dey grabe an mek um lib gin, same fashion de Son da gii life ta dem dat e wahn fa gim.

22Fodamo, de Fada esef ain jedge nobody. E done gii e son all tority fa jedge people.

23E do dat so dat all people gwine gii hona ta de Son same like how dey gii hona ta de Fada. Dem wa ain gii hona ta de Son, dey ain gii hona ta de Fada wa sen de Son eenta de wol.

24“A da tell oona fa true, de poson wa yeh me wod an bleebe pon de one wa sen me eenta de wol, dat poson done got de true life wa ain neba end, an God ain gwine condemn um. E done dead, bot now e cross oba ta de true life.

25Fa true, de time da come an e done come now, wen de people wa done dead gwine yeh wa God Son da say. An all de people wa yeh de Son gwine lib.

26Cause de Fada, e de one weh life come fom, an e got powa fa gii life. Same fashion, e mek life come fom de Son esef an e got powa fa gii life.

27An de Fada been gii de Son de tority fa jedge all people, cause de Son, e de Man wa Come fom God.

28Oona mus dohn be stonish bout dat. De time da come wen all de people wa done dead, all dem een dey grabe gwine yeh wa de Son say.

29An dey gwine git op outta dey grabe. Dem wa beena do good gwine git op outta dey grabe an git life wa las faeba. Bot dem wa beena do bad, dey gwine git op outta dey grabe an A gwine condemn um.

Dem wa Tell bout Jedus

30“A ain got de tority fa do nottin by mesef. A jedge people same like how A yeh God tell me fa jedge um. So den A jedge people de right way cause A ain try fa do wa A wahn. A da do wa me Fada wa sen me wahn, an no mo.

31“Ef A say great ting bout mesef, e ain gwine mount ta much cause nobody ain gwine bleebe wa A say.

32Bot dey a noda poson wa tell bout me, an A know dat wa e say bout me, dat de trute.

33Oona done sen messenja fa aks John bout me. An wa John tell um, dat de trute.

34Dat ain fa say dat A pend pon wa people say bout me. A tell oona dat wa John say bout me de trute, so dat God kin sabe oona.

35John been same like a lamp wa beena bun an de light shine bright fa mek all people see. Oona done gree fa leh de light shine pon oona fa a leetle wile an mek oona haat glad.

36Bot wa A da do show wa A da fa true, mo den wa John done say bout me. A da do all wa me Fada tell me fa do, jes dat. Dem wok yah wa A da do da mek people know who A da. Dey show dat me Fada sen me fa come eenta de wol.

37An de Fada wa sen me, e too been say who A da. Oona ain neba yeh e boice. Oona ain neba see wa e look like.

38An oona ain keep e wod een oona haat cause oona ain bleebe pon de one wa e sen fa come eenta de wol.

39Oona da study God wod haad cause oona tink oona got true life wa las faeba wen oona study dem wod. An dem wod da tell bout me!

40Stillyet oona ain wahn fa come ta me so dat oona kin hab true life.

41“A ain da look fa people fa praise me.

42Bot A know oona. A know oona ain lob God een oona haat.

43A done come een me Fada name. E sen me wid e tority, bot oona ain pay me no mind. Ef noda poson come een e own name an ain nobody sen um, oona gwine pay mind ta um.

44Oona lob fa git praise fom one noda. Bot oona ain try fa git praise fom de one an only God. So den how oona gwine bleebe wa A say?

45Bot oona mus dohn tink dat A gwine cuse oona ta de Fada. No, Moses de one wa gwine cuse oona ta de Fada. Dat de same Moses wa oona beena look fa sabe oona.

46Ef oona bleebe wa Moses say fa true, oona gwine bleebe wa A say, cause Moses done write bout me.

47Bot oona ain bleebe wa e write bout me. So den fa sho oona ain gwine bleebe wa A da say, ainty?”


  Share Facebook  |  Share Twitter

 <<  Yohanes 5 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran