Alkitab Mobile SABDA
[VER] : [KARO]     [PL]  [PB] 
 <<  1 Raja-raja 21 >> 

Peken anggur Nabot

1Deherken istana Raja Ahap i Jesreel lit sada peken anggur, Nabot empuna.

2I bas sada wari nina Ahap man Nabot, "Man bangkulah peken anggurndu e Nabot, sabap ndeher kal ras istanangku. Ateku nuani gule-gulen i je. Kubereken man bandu peken anggur si terulin jadi gantina. Ntah pe, adi bage atendu kugalari man bandu asa erga si patut."

3Tapi ngaloi Nabot nina, "Erkiteken gelar TUHAN, pantang kal kubereken e man bandu, sabap taneh e pusaka nini-niningku kap."

4Megi kata Nabot e, ndele dingen nembeh kal ate Ahap. Mulihken ia ku rumah, iamparkenna bana i bas ingan medem, isedingkenna ayona ku dingding, janah la ia nggit man.

5Jenari reh ndeharana Isebel ndahi ia nina, "Ngkai maka ndele kal atendu? Ngkai maka kam la nggit man?"

6Ngaloi ia nina, "Erdandanken cakap Nabot man bangku. Kutukur ateku peken anggurna, tah pe adi bage atena, kusambari alu si deban, tapi la ia nggit."

7"Ma kam kin raja Israel?" nina Isebel erjabap. "Kekeken, ula atendu ndele, mankenlah. Aku muatca peken anggur Nabot e man bandu!"

8Kenca bage ibahan Isebel piga-piga surat, itekenna i bas gelar Ahap, isetempelna alu cap raja, jenari ikiremkenna man peminpin-peminpin ras man kalak si iergaken kalak i Jesreel.

9Bagenda me kata surat ndai, "Momokenlah sada wari puasa man rayat, janah suruh ia pulung kerina. I bas perpulungen e pekundul Nabot i bas ingan si mehaga.

10Suruh pe dua kalak jahat kundul petala-tala ras Nabot guna ngaduken ia maka nggo isumpahina Dibata ras raja. Kenca bage baba ia ku darat kota, benteri alu batu seh mate."

11Perentah Isebel ndai minter ilakoken peminpin-peminpin ras kalak si iergaken kalak Jesreel.

12Imomoken kalak ndai sada wari puasa man rayat, isuruhna pulung, jenari i bas perpulungen e ipekundulna Nabot i bas ingan si mehaga.

13Dua kalak jahat kundul petala-tala ras Nabot, jenari ibahanna pengadun palsu kerna ia Nina "Nabot nggo numpahi Dibata ras raja." Emaka ibaba kalak ndai Nabot ku darat kota, ibenterina alu batu seh mate.

14Kenca bage ikiremken kalak ndai berita man Isebel Nina "Nabot nggo mate ibenteri alu batu."

15Kenca ialoken Isebel berita e, minter ikatakenna man Ahap, "Kekeken! To buat man bandu peken anggur Nabot si la nggit ndayakenca bandu e, sabap Nabot nggo mate."

16Emaka keke minter Ahap, lawes ia ku peken anggur e, ibahanna jadi sikerajangenna.

17Kenca bage nina TUHAN man Elia, nabi i Tisbe nari,

18"To jumpai Ahap, raja Israel i Samaria nari, idapetindu ia i bas peken anggur Nabot muat peken e jadi sikerajangenna.

19Turiken man bana maka Aku, TUHAN ngataken man bana, 'Kenca ibunuhndu jelmana, irampasndu ka kin atendu ertana?' Kataken man bana katangKu enda, 'I ja mbarenda biang ndilati dareh Nabot, i bas ingan e pe darehndu idilatina!'"

20Kenca Ahap ngidah Elia nina Ahap, "Nggo itundukndu aku, o musuhku?" "Nggo," nina Elia erjabap. "Perban nggo idayakenndu bandu guna ngelakoken si jahat i lebe-lebe TUHAN,

21bagenda nina TUHAN man bandu, 'Kudabuhken mara kelesa man bandu. Kumasapken kam, janah Kukeriken kerina dilaki i bas keluargandu nguda ntah metua.

22PerbahanenKu man keluargandu bali ras perbahanenKu nandangi keluarga Raja Jerobeam anak Nabot ras keluarga Raja Baasa anak Ahia, erkiteken nggo ipekekendu rawangKu alu mabai Israel erdosa.'

23Janah kerna Isebel, bagenda nina TUHAN, 'Ipangani biang pagi maitna i bas Kota Jesreel.'

24Keluargandu si mate i kota, ipangani biang, janah si mate i mbalmbal ipangani perik-perik."

25(La pernah lit seri kalak bagi Ahap tutusna ngelakoken si jahat i bas adep-adepen TUHAN. Kerina kejahaten e ilakokenna bekas penjemba-jemba ndeharana Isebel.

26Ibahanna dosa si man kemelanken tuhu-tuhu arah ersembah man berhala-berhala bali ras perbahanen kalak Amori si nggo ipelawes TUHAN asum kalak Israel nciati tanehna.)

27Kenca dung Elia ngerana, icaingken Ahap uisna, itangtangina, jenari ipakena uis guni tandana erkadiola, janah erpuasa ia. Tupung medem pe ruis guni ia, janah adi erdalan serbut ayona.

28Nina TUHAN man nabi Elia,

29"Nggo nge idahndu uga Ahap peteruk bana i lebe-lebengKu? Erkiteken si e, la Kudabuhken mara kelesa man bana kidekah ia nggeluh denga. I bas paksa pemerentahen anakna me pagi maka kudabuhken mara kelesa e."


  Share Facebook  |  Share Twitter

 <<  1 Raja-raja 21 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran