1 Samuel 31 (KARO)

Kematen Saul ras anak-anakna (1Taw 10:1-12)

1Bangsa Pilisti erperang ngelawan bangsa Israel i Deleng Gilboa. Nterem bangsa Israel mate i je, janah si debanna subuk Raja Saul ras anak-anakna nggo lompat.

2Tapi itunduk kalak Pilisti jenari ibunuh kalak ndai telu kalak anak Saul: Jonatan, Abinadap, ras Milkisua.

3Pertempuren e seh kal sangatna isekelewet Saul, jenari ia jine kena panah musuh janah mekelek lukana.

4Ikatakenna man anak perana si maba senjatana nina, "Sentapken pedangndu, jenari bunuh aku, gelah ula pagi iguro-guroken bangsa Pilisti si la erdibata enda aku jenari ibunuhna." Tapi la nggit anak perana ndai erbahan si e, mbiar ia. Emaka ibuat Saul pedangna e jenari ibulakkenna bana ku ujung pedang e.

5Iidah anak perana ndai maka nggo mate, emaka ibulakkenna ka man bana ku ujung pedangna jenari mate ia ras Saul.

6Bage me dalanna Saul, anakna si telu kalak, ras anak perana ndai mate; kerina kalak si ras Saul mate i bas wari e.

7Kenca nggo ieteh bangsa Israel si arah lepar Baluren Jesreel ras si arah Timur Lau Jordan maka tentera bangsa Israel nggo kiam janah Saul ras anak-anakna nggo mate, itadingkenna kerina kutana jenari lompat ia. Kenca bage reh kalak Pilisti nciatisa.

8Pepagina kenca perang e, irampasi bangsa Pilisti barang-barang kalak si mate e, janah idahna mait Saul ras anakna si telu ampar i Deleng Gilboa.

9Ibuatna takal Saul, itangtangina paken perangna, jenari isuruhna persuruhen mabasa ku kerina taneh Pilisti nuriken berita si mehuli man sembah-sembahen ras man rayatna kerina.

10Kenca bage itamakenna senjata Saul i bas rumah pertoton man Dewi Astarte, janah maitna ipakukenna i bas tembok kota Bet-San.

11Kenca anak kota Jabes i Gileat megi kai si nggo ibahan bangsa Pilisti man Saul,

12minter berkat piga-piga kalak si merawa janah erdalan ia gedang-gedang berngi ku Bet-San. Ibuatna mait Saul ras anak-anakna i bas tembok e nari, ibabana mulih ku Jabes, jenari itutungna.

13Kenca bage ibuatna tulan-tulanna janah ikuburkenna i teruh batang tamariska i bas kuta e, jenari erpuasa ia pitu wari dekahna.

<< 1 Samuel 31 >>