Dual PanelSi ngepkep perpulungen
1Adi sekalak ersura-sura jadi peminpin perpulungen, ersura-sura kap ia nandangi dahin si mehuli. Kata enda tuhu me!
2Sekalak si ngepkep perpulungen arus la erpandangen. Ndeharana arus sada ngenca. Ia arus ersabar, terkuasaisa dirina janah ratur lagu langkahna. Arus meriah ukurna ngalo-ngalo kalak si kesilang ku rumahna aminna pe la itandaina. Ia arus ngasup ngajari.
3Ia la banci sekalak pemabuk, ntah pe sekalak perampang. Ia arus sekalak si lemah-lembut dingen ngena atena kedamen. Ia la banci mata duiten.
4Arus ietehna ngepkep jabuna alu mehuli janah ngasup erbahanca anak-anakna ngikutken katana dingen mehamat man bana.
5Sabap adi la ia ngasup ngepkep jabuna, labo ia ngasup ngepkep perpulungen Dibata.
6Si ngepkep perpulungen la banci kalak si mbaru jadi Kristen, sabap banci pagi meganjang ukurna jenari iukum Dibata ia bagi Iblis nai.
7Ia arus sekalak si ihamati jelma si nterem, gelah ula ia icekuraki kalak jenari kena siding Iblis.
Si nampati i bas perpulungen
8Si nampati i bas perpulungen pe arus kalak bujur tutus. La banci mbuesa minem minuman keras, ntah pe merangap.
9Arus tetap pusuh peratenna kerna pengajaren si nggo ibereken Dibata.
10Ia arus iuji lebe, jenari adi la lit ibahanna si man pandangen, banci ia erdahin.
11Ndeharana pe arus kalak si mehuli. Ndeharana e la banci ncekuraki kalak si deban. Ia arus ngasup ngkuasai dirina janah bujur i bas kai pe.
12Si nampati i bas perpulungen e arus sada ngenca ndeharana. Arus ngasup ia ngepkep anak-anakna ras jabuna alu mehuli.
13Kalak si ndahiken dahinna alu mehuli, reh hamatna kalak man bana, janah reh pangna ia ngerana man kalak kerna kinitekenna nandangi Kristus Jesus.
Rahasia si Mbelin
14Asum kubahan surat enda man bandu, ngarap aku maka la nai ndekah sa reh aku ndahi kam.
15Tapi adi ndekah denga maka aku reh, surat enda me mpebetehkenca man bandu kuga arusna perlangkahta i bas keluarga Dibata, perpulungen Dibata si nggeluh, binangun dingen palas ajaren si tuhu-tuhu.
16Ise pe la ngasup nimbaksa kerna belinna rahasia agamanta. "Jesus Kristus reh i bas rupa manusia, ipetangkas Kesah Dibata Ia la ersalah, janah teridah man malekat-malekat. Kerna Ia ipembar ku kerina bangsa-bangsa, kerina manusia i doni tek man BaNa, janah Ia nggo iangkat Dibata ku Surga."