Alkitab Mobile SABDA
[VER] : [KARO]     [PL]  [PB] 
 <<  Amos 7 >> 

Pengenehenen kerna labang

1Lit kuidah pengenehenen i bas TUHAN si Erdolat nari. I bas pengenehenen e kuidah TUHAN njadiken sada bala labang si melala. Labang e ijadiken kenca gagaten bagin asuh-asuhen raja isabi janah dukut mulai ka turah mulihi.

2I bas pengenehenen e kuidah labang ndai mangani kasa kai si meratah-ratah si lit i bas negeri e. Emaka ningku, "O TUHAN si Erdolat, alemilah bangsandu. Kutera banci ia pulah i bas kiniseran e nari adi ia sada bangsa si kitik dingen la ergegeh?"

3Erkusur ukur TUHAN, janah nina, "Kai si iidahndu e labo pagi jadi."

Pengenehenen kerna api

4Kuidah ka pengenehenen si deban i bas TUHAN si Erdolat nari. I bas pengenehenen e kuidah TUHAN ersikap-sikap ngukum BangsaNa alu api. Lawit si i teruh doni nggo keri ipan api e, janah negeri e pe nggo mulai panna.

5Kenca bage, ningku, "Pengadi min o TUHAN Dibata! Kutera banci BangsaNdu pulah i bas kiniseran e nari adi ia sada bangsa si kitik dingen la ergegeh?"

6Erkusur ukur TUHAN, janah nina, "Kai si iidahndu e labo pagi jadi."

Pengenehenen kerna benang arang

7Kuidah ka pengenehenen si deban i bas TUHAN nari. I bas pengenehenen e kuidah Ia tedis deherken sada tembok si ipajekken rikutken sada benang arang. Ia sangana njemak sada benang arang.

8IsungkunNa aku nina, "O Amos, kai idahndu?" "Benang arang," ningku ngaloisa. Kenca bage nina, "Benang arang e Kupake lako encidahken maka bangsangKu desken sada tembok si la ngikutken benang arang. Ukurku lanai erkusur lako ngukum bangsa e.

9Kerina ingan-ingan i ja kesusuren Isak ersembah arus ikernepken. Ingan-ingan si badia nu Israel iradasken me. Kerajan Raja Jerobeam Kupeltepken alu pedang."

Nabi Amos ras Amasia

10Kenca bage, Amasia, eme imam i Betel, ngirimken sada berita man Jerobeam, raja Israel nina, "Amos sangana erbahan pertakin ngelawan kam i tengah-tengah bangsa e. Kerina pengeranana encedai negeri enda.

11Bagenda kap nina: Jerobeam la banci lang mate denggo i bas perang, janah bangsa Israel ibaba i bas negerina nari ku pembuangen?"

12Emaka nina Amasia man Amos, "To lawes o nabi! Mulih kam ku Juda janah i jahlah kam ernubuat. I jahlah kam ndarami nakan arah nubuatndu.

13Ulanai kam ernubuat i Betel enda. Ingan enda ingan sembah-sembahen raja kap, ingan ersembah guna kerina kerajan."

14Ngaloi Amos nina, "Aku labo nabi biasa si ernubuat guna ndatken upah. Aku sekalak si ngasuhi lembu dingen miara batang ara.

15Tapi ibuat TUHAN aku i bas dahinku nari selaku permakan jenari IperentahkenNa aku lawes lako ernubuat man BangsaNa Israel.

16Dage genduari begikenlah kai si ikataken TUHAN. Isuruhndu aku ngadi ernubuat, janah ilarangndu aku ngerana man bangsa Israel.

17Erdandanken si e, o Amasia, ikataken TUHAN man bandu, Ndeharandu jadi perlua-lua me pagi i pasar-pasar, janah anak-anakndu mate i bas perang. Tanehndu ibagi-bagiken man kalak si deban, janah kam jine mate i bas taneh kalak perbegu. Janah kalak Israel la banci lang ibaba me i negerina nari ku taneh pembuangen."


  Share Facebook  |  Share Twitter

 <<  Amos 7 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel