Dual Panel1Ujung geluhku nggo ndeher, nandangi mutus me kesahku, kuburen nari ngenca kerajangku.
2Aku ikeleweti kalak si nguru-nguru, matangku ngidah uga gombangna ia bangku.
3Bujur nge aku; o Dibata, teklah Kam bangku, tapi ise nggit njamini aku?
4Nggo ItutupNdu ukurna maka la iertina, emaka ula pelepas aku italukenna.
5Nina kuan-kuan, ise ngaduken temanna lako muat untung, anak-anakna pagi ndatken balasna.
6Genduari alu kuan-kuan e aku isaling-saling, temanku reh ayongku icidurina.
7Matangku meriben perban ateku ceda, kerina ringringku bagi awih kertangna.
8Kalak si ngaku dirina bujur, tersengget ngidah si enda, janah kerina ia ngatakenca maka la aku mbiar man Dibata.
9Kalak si ngaku dirina bujur, reh tetapna ukurna, maka cara resgeluhna ngena ate Dibata.
10Tapi bicara kerina ia reh, tedis i lebe-lebengku, sekalak pe i bas ia labo lit si pentar tuhu-tuhu.
11Wari-waringku nggo mentas, si kusuraken la seh, pengarapenku melengas.
12Tapi nina teman-temanku, "berngi e kap suari, nandangi terang me." Tapi kueteh maka aku tetap i bas gelap.
13Doni kematen nari ngenca kuarapken, jadi inganku medem i bas kegelapen.
14Kuburen kubahan jadi bapangku; gaya ras kobe si mangani dagingku e kubahan jadi nandengku ras turangku.
15Dage, ma lanai lit si banci kuarapken? Ise nari banci nuduhken bangku?
16Tupung aku nusur ku doni kematen, pengarapenku la banci berkat ras aku.