Alkitab Mobile SABDA
[VER] : [KARO]     [PL]  [PB] 
 <<  Ayub 41 >> 

1Ngasup kam nangkap buaya Lewiatan salu kawil, tah ngiket dilahna salu tinali?

2Ngasup kam nustusken tinali arah igungna tah nebak isangna salu kawit-kawit besi?

3Nggit kin ia mindo alu meseksek gelah ipulahi, tah mindo perkuah atendu alu cakap mehuli?

4Nggit kin ia erpadan man bandu, maka asa lalap ia jadi suruh-suruhenndu?

5Banci kin ia itambat bagi perik piaranndu, jadi guro-guro suruh-suruhenndu si diberu?

6Banci kin ia ijajaken kalak penjala, janah ibagi-bagiken man kalak perbinaga?

7Ngasup kam mantemken lembing ku bas kulitna, tah nebakken tombak ku bas takalna?

8Jemak ia sekali saja lah gia, tentu ndigan pe lanai kam nggit ngulihisa; perbebenndu ras ia, asa lalap kam la ngasup ngelupakenca.

9Asa kalak si ngidah Lewiatan, minter bene ukurna, jenari ampar.

10Adi igasgasi, seh kal ia rawana, janah ise pe la pang tedis i lebe-lebena.

11Lit kin kalak selamat si nerang ia? La lit sada pe si bage i belang-belang doni enda.

12Genduari, Kuturiken bandu kerna nahe Lewiatan e, kerna uga gegehna ia, ras bage pe kerna tempasna si mejile.

13La ise pe ngasup ngerigatken baju jubahna, tah multakken baju perang si ipakena.

14Ise ngasup nguak isangna si ngeskes megegeh? Dem salu ipen si seh mejinna.

15Gurungna, ampang-ampang si ersusun-susun melala, kerina leket alu rapat, janah bagi batu piherna.

16Perbahan rapatna sada ras si debanna, seh maka angin pe la siat arah kelang-kelangna.

17Bage teguhna perdemunna kerina, seh maka kai pe la ngasup nirangkenca.

18Adi kebacihen ia, teridah terang si erbinar-binar, matana ernala-nala, bagi matawari si sangana harhar!

19I bas babahna nari, luar gurlah api, bagi si isemburken, erbinar bunga api.

20Cimber api nembur arah lubang igungna, desken asap lau luam i bas kudin i babo api si gara.

21Kesahna mahanca rara gara; i bas babahna nari ndarat jingar api si ernala.

22Kudukna megegeh, birawan kalak di jumpa ras ia.

23Jukut dagingna seh pesingna, desken besi tuangen, sitik pe la lit muyuk-uyukna.

24Pusuhna mersik la meteh mbiar, paguh la terugur bagi batu nanggar.

25Kalak si mbisa pe gentar adi keke ia, bene ukurna perban biarna.

26La lit pedang si banci ngelukai ia, la lit tombak, panah tah lembing si banci nakitisa.

27Besi, desken nggala akapna datena, tembaga, desken kayu buruk akapna melna.

28Salu anak panah la terpelawes ia, batu kalimbawang, bagi segal saja akapna.

29Palu-palu, bagi tangke page akapna, adi ipantemken lembing bana, tawa ia.

30Sisik beltekna, bagi pecah-pecah kaca telapna; adi mentas ia arah kubang, bekasna bagi bekas gereta pengeriken.

31Lau lawit ibahanna erputar-putar bagi lau luam i bas kudin, igawerna bagi minak i bas kudin penggarun.

32Bekasna mentas arah lawit erkinar-kinar. Janah ersiung jadi ugup mbentar.

33La lit si bagi ia i doni enda, ia me mahluk si la lit kebiarenna.

34Rubia-rubia si mehagana kal pe kitik nge akapna; ia nge raja i bas kerina rubia-rubia si merawa."


  Share Facebook  |  Share Twitter

 <<  Ayub 41 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel