Dual PanelNamaken lampu
1Nina TUHAN man Musa,
2"Kataken man Harun gelah adi itamakenna lampu si pitu i bas nahe lampu e, arus iaturna gelah terang lampu e ersinalsal ku lebe."
3Ipatuhi Harun kata TUHAN emaka itamakenna lampu-lampu ngala ku lebe-lebe nahe lampu e.
4Nahe lampu e itepa i bas emas nari mulai datas nari terus ku teruh, sue ras usihen si icidahken TUHAN man Musa.
Pembersihen ras penangkuhen kalak Lewi
5Nina TUHAN man Musa,
6"Peseraplah kalak Lewi i bas kalak Israel si debanna nari, jenari bersihken lah ia kerina,
7alu dalan si bagenda: pirpirken ku ia lau pembersihen e jenari suruh ia ncukur kerina badanna e ras ncuci pakenna. Kenca bage ia nggo bersih rikutken peraturen agama.
8Kenca bage arus ibuatna sada jenggi lembu si nguda denga ras persembahen buah gandum si iperluken si ibahan i bas tepung campur minak saitun, janah kam arus muat sada jenggi lembu guna persembahen pengalemi dosa.
9Kenca bage pepulung kerina perpulungen kalak Israel janah suruh kalak Lewi tedis i lebe-lebe Kemah Perjumpan.
10Bangsa Israel arus namaken tanna ku takal Lewi,
11janah kenca e Harun arus nangkuhken kalak Lewi jadi sada pemere si khusus man bangKu i bas bangsa Israel nari, gelah banci idahina dahinKu.
12Kalak Lewi pe, kenca si e arus namaken tanna ku takal jenggi lembu si dua e; sada ipersembahken guna persembahen pengalemi dosa janah sada nari jadi persembahen tutungen, guna ngelakoken acara pembersihen man kalak Lewi.
13Tangkuhken kalak Lewi jadi sada pemere si khusus man bangKu, janah suruh Harun ras anak-anakna ngaturkenca.
14Peseraplah kalak Lewi alu dalan si e i bas kerina kalak Israel si debanna e nari, gelah ia jadi sikerajangenKu.
15Kenca nggo ibersihken ras itangkuhkenndu kalak Lewi, nggo banci ia erdahin i bas Kemah e.
16Ia nggo Kupindo nggantiken kerina anak sintua i bas bangsa Israel, janah Aku saja empuna ia.
17Tupung Kubunuh kerina anak sintua i Mesir, Kupebadiaken jadi sikerajangenKu anak sintua i bas tep-tep keluarga bangsa Israel, ras anak si pemena i bas tep-tep asuh-asuhen.
18Genduari Kubuat kalak Lewi nggantiken kerina anak sintua i bas bangsa Israel,
19janah Kutugasken kalak Lewi man Harun ras anak-anakna, jadi sada pemere i bas bangsa Israel nari lako erdahin i bas Kemah e jadi si kawal bangsa Israel gelah ula ia kena mara adi ndehersa ia ku Ingan si Badia e."
20Emaka Musa, Harun, ras kerina bangsa Israel nangkuhken kalak Lewi, bagi si ipedahken TUHAN man Musa.
21Ibersihken kalak Lewi dirina, ras icucina pakenna, jenari itangkuhken Harun ia jadi sada pemere si khusus man TUHAN. Harun ka pe erbahan acara perdamen man bana kerina.
22Kalak Israel ndalanken kerina si nggo ipedahken TUHAN man Musa kerna kalak Lewi. Erkite-kiteken si e kalak Lewi nggo banci erdahin i bas Kemah i teruh pengawasen Harun ras anak-anakna.
23Nina TUHAN man Musa,
24"I bas umur dua pulu lima tahun tep-tep kalak Lewi arus ndalanken tugasna i bas Kemah Perjumpan e,
25janah i bas umur lima puluh tahun ia arus ngadi.
26Kenca si e, ia banci nampati temanna kalak Lewi si deban i bas ndalanken tugas i bas Kemah e, tapi la banci ia ndahiken dahin kai pe adi ia saja ngenca ndahisa. Bagenda me arus iatur tugas-tugas kalak Lewi."