Dual Panel1Dage enda me peduakaliken raja ras Haman man-man ras Ester. Sangana minem-minem anggur, isungkun raja ka sekali nari Ester nina, "Genduari, o kemberahen, turiken dage sura-surandu, maka kubereken. Setengah pe kerajanku enda, tentu kubereken."
2(Est 7:1)
3Ngaloi Kemberahen Ester, "Adi mekuah atendu raja, adi meriah ukurndu nehken pemindonku si meteruk enda, sura-surangku eme: pelepas min aku ras bangsangku nggeluh.
4Sabap aku ras bangsangku nggo idayaken gelah ibunuh. Bicara kami idayaken terjeng iperbudak saja ngenca, tentu sinik saja aku. Tapi kami nandangi ikernepken, imasapken!"
5Emaka nungkun Raja Ahasweros, "Ise pang erbahan si bage? I ja kalakna?"
6Erjabap Ester nina, "Musuh kami, imbang kami, eme Haman si jahat enda!"
7Megi si e mbiar tuhu-tuhu Haman i lebe-lebe raja ras kemberahen. Tedis raja, merawa kal ia, jenari itadingkenna ingan man-man ndai, lawes ia ku peken istana. Iidah Haman maka raja nggo erbahan ketetapen i bas ukurna guna ngukum ia, emaka tetap ideherina kemberahen Ester lako mindo perkuah atena.
8Idabuhkenna bana ku bale-bale Kemberahen Ester mindo ampun. Tapi rembang tupung si e, mulih raja i bas peken e nari. Ngidah si e, alu sora megang nina raja, "Ei! I lebe-lebengku, i bas istanangku pe atem ngelakoken lagu la mehuli nandangi kemberahenku?" Dungna kenca ibelasken raja kata ndai minter reh suruh-suruhen raja, itutupina takal Haman.
9Kenca bage nina Harbona sekalak i bas suruh-suruhen e nari, "Tiang gantungen pe nggo lit ipajekkenna i rumahna, dua pulu dua meter ganjangna. Ate Haman gelah i je igantungken Mordekai, kalak si nggo nelamatken kam." "Gantung Haman i je!" nina raja.
10Emaka igantung me Haman i bas tiang gantungen si ipajekkenna guna Mordekai. Kenca bage maka nggo mbergeh mulihi ukur raja.