Alkitab Mobile SABDA
[VER] : [KARO]     [PL]  [PB] 
 <<  Hakim-hakim 1 >> 

Adonibesek itangkap suku Juda ras Simeon

1Kenca Josua mate isungkun bangsa Israel TUHAN nina, "Suku si apai kami arus lebe lawes erperang ngelawan bangsa Kanaan?"

2Nina TUHAN njabapsa, "Suku Juda lebe. Aku merekenca negeri e ku bas kuasana."

3Nina kalak Juda man kalak Simeon, "Ota ras kita ku negeri si nggo itetapken man kami, gelah ras kita erperang ngelawan bangsa Kanaan. Kenca bage ras kita ku negeri si nggo itetapken man bandu." Bage me, suku Simeon

4ras suku Juda lawes ku peperangen. TUHAN mereken kemenangen man kalak enda i bas peperangen ngelawan bangsa Kanaan ras bangsa Peris, janah italuken kalak enda lit sepuluh ribu kalak teremna i Besek.

5Ijumpaina i je Adonibesek, emaka ilawan kalak enda ia.

6Kiam Adonibesek, tapi iayaki kalak enda, itangkapna, jenari ikeretna indung jari-jari tan ras nahena.

7Nina Adonibesek, "Pitu puluh raja si nggo ikeret indung jari-jari tan ras nahena mumahi iba-iba nakan i teruh mejangku. Dibata mahanca genduari man bangku bagi kai si kubahan man kalak e." Ibaba ia ku Jerusalem, janah i je me ia mate.

Suku Juda naluken Jerusalem ras Hebron

8Jenari iperang kalak Juda kota Jerusalem janah talu ibanna kota e. Ibunuhina rayatna ras icilukna kuta e.

9Kenca si e lawes ia merang bangsa Kanaan si tading i deleng-deleng negeri e, i teruh deleng-deleng e, ras i negeri si kerah arah Selatan.

10Erdalan kalak enda ngelawan bangsa Kanaan si tading i kota Hebron, si nai igelari Kiryat Arba. I jah italukenna suku Sesai, Ahiman ras Talmai.

Otniel naluken kota Debir (Jos 15:13-19)

11I jah nari erdalan kalak Juda ngelawan kota Debir, si paksa e igelari Kiryat Seper.

12Sekalak i bas kalak enda, Kalep gelarna nina, "Kuserehken anakku Aksah man kalak si ngasup naluken Kiryat Seper."

13Otniel anak Kenas, eme anak senina Kalep, naluken kota e, emaka iserehken Kalep anakna Aksah man Otniel.

14I bas wari perjabun e, iasak Otniel ndeharana mindo selambar juma man bapana. Nusur Aksah i das kaldena nari, emaka isungkun Kalep kai ate anakna.

15Nina Aksah njabapsa, "Ulu lau ateku. Taneh si nggo iberekenndu bangku taneh kerah kap e." Emaka ibereken Kalep man anakna ulu lau si arah gugung ras si arah berneh.

Kemenangen suku Juda ras suku Benyamin

16Sinursur mama Musa eme kalak Keni, lawes terus ras suku Juda i Jeriho nari, si igelari kota Batang Palma e, ku daerah gurun pasir arah Selatan Arad i Juda. I jah me kalak enda tading i tengah-tengah bangsa Amalek.

17Kalak Juda lawes ras kalak Simeon. Isumpahi ras ikernepkenna kota e, emaka ibahanna gelarna Hormah.

18TUHAN si nampati bangsa Juda. Erkiteken si e, daerah si erdeleng-deleng nggo jadi sikerajangen Juda. Tapi daerah sekelewet Gasa, Askelon, ntahpe Ekron ras daerah-daerah sekelewetna la tertalukenca. Bangsa e ringan i gedang-gedang tepi lawit, lit gereta besina. Emaka kalak Juda la ngasup nalukenca.

19(Hak 1:18)

20Bali ras si nggo iperentahken Musa, Hebron nggo ibereken man Kalep. Kalep nggo melawes telu suku sinursur Anak i bas kota e nari.

21Tapi la ipelawes kalak Benyamin bangsa Jebusi si tading i Jerusalem. Emaka bangsa Jebusi tetap denga tading i je ras kalak Benyamin.

Suku Eperaim ras Manase naluken Betel

22Suku Eperaim ras suku Manase, kesusuren Jusup lawes erperang ngelawan kota Betel; paksa si e Betel igelari Lus. Isampati TUHAN kalak enda. Isuruh kalak enda mata-mata ku kota e.

23(Hak 1:22)

24Mata-mata ndai jumpa ras sekalak dilaki emaka isungkunna dilaki ndai nina, "Tuduhken man kami uga dalanna maka banci bengket ku bas kota e. Adi ituduhkenndu la kam isakiti kami."

25Emaka ituduhkenna dalan e man mata-mata ndai, jenari ibunuh bangsa Eperaim ras Manase kerina si i bas kota e, seakatan dilaki si sekalak ndai ras keluargana.

26Arah pudi lawes ia ku negeri Heti, ipantekina sada kota i jah, janah kota ndai igelarina Lus, seh ngayak genduari pe e denga nge gelarna.

Bangsa si la ipelawes bangsa Israel

27Kalak si la ipelawes suku Manase eme si ringan i kota-kota Bet San, Tanak, Dor, Ibleam, Megido ras kalak si ringan i deher kota-kota enda ndai. Kalak Kanaan tetap ertahan i je.

28Kenca bangsa Israel nggo jadi bangsa si megegeh, ipaksana bangsa Kanaan e erdahin man bana, tapi amin bage gia labo ipelawesna kerina bangsa e.

29Suku Eperaim la ipelawesna bangsa Kanaan si ringan i kota Geser. Emaka bangsa Kanaan terus ringan i jah ras suku Eperaim.

30Suku Sebulon la ipelawesna bangsa si ringan i kota Kitron ras Nahalal. Emaka bangsa Kanaan terus ringan i jah ras suku Sebulon, tapi ipaksana kalak e erdahin guna suku Sebulon.

31Suku Aser la ipelawesna bangsa si tading i kota Akko, Sidon, Ahlab, Aksip, Helba, Apek ras Rehop.

32Kalak Aser nggeluh ras bangsa Kanaan si ringan i bas daerah e, erkiteken la ipelawesna bangsa Kanaan e.

33Suku Naptali la ipelawesna bangsa si ringan i kota Bet Semes, ras Betanat. Kalak Naptali enggeluh ras bangsa Kanaan si ringan i bas daerah e, tapi ipaksana bangsa Kanaan erdahin guna kalak Naptali.

34Iasak bangsa Amori suku Dan ku daerah deleng-deleng, janah la ipediatna bangsa e mulihken ku berneh.

35Bangsa Amori terus nggeluh i Ayalon, Salbim, ras i Deleng Heres, tapi bangsa-bangsa e lit i teruh kuasa suku Manase ras suku Eperaim. Emaka ipaksana kalak e erdahin man gunana.

36I Utara Sela, baleng daerah bangsa Edom mentasi Baluren Akrabim.


  Share Facebook  |  Share Twitter

 <<  Hakim-hakim 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel