Dual PanelBangsa-bangsa si tading i negeri e
1Emaka itadingken TUHAN piga-piga bangsa i negeri e nguji bangsa Israel si la ikut i bas perang i Kanaan nai.
2IlakokenNa e guna ngajar tep-tep sinursur bangsa Israel kerna perang, terlebih-lebih kalak si gelgel e langa pernah erperang.
3Bangsa-bangsa si tading i negeri e, eme limana kota Pilisti, kerina bangsa Kanaan, bangsa Sidon, ras bangsa Hewi si ringan i deleng-deleng Libanon, mulai i Deleng Baal Hermon nari seh ku dalan ku Hamat.
4Bangsa-bangsa e jadi sada ujin man Israel, metehsa nggit tah lang ia ngikutken perentah-perentah si ibereken TUHAN man nini-ninina arah Musa.
5Bageme bangsa Israel tading i tengah-tengah bangsa Kanaan, bangsa Heti, bangsa Amori, bangsa Peris, bangsa Hewi ras bangsa Jebusi.
6Bangsa Israel sibuaten ras bangsa-bangsa enda ndai, janah isembahna dibata bangsa-bangsa e.
Otniel
7Bangsa Israel lupa man TUHAN Dibatana; erdosa ia man TUHAN janah isembahna berhala Baal ras Asera.
8Emaka nembeh TUHAN man Israel, janah IpelepasNa Raja Kusan Risataim i Mesopotami nari naluken ras merentah Israel waluh tahun dekahna.
9Kenca bage maka erlebuh bangsa Israel man TUHAN, emaka IberekenNa sekalak si mbebasken bangsa e, eme Otniel, anak si Kenas, agi Kalep.
10Kesah TUHAN reh man Otniel, emaka ia jadi peminpin bangsa Israel. Otniel lawes erperang, janah ibereken TUHAN man bana kemenangen ngelawan raja Mesopotami e.
11Empat puluh tahun dekahna negeri e dame, janah dungna mate Otniel.
Ehud
12Erdosa ka bangsa Israel man TUHAN. Erkiteken si e ibahan TUHAN maka gegehen Raja Eglon i Moap nari asangken bangsa Israel.
13Eglon erteman ras bangsa Amon ras bangsa Amalek; italuken kalak enda Israel janah ikuasaina kota Jeriho, kota batang kurma e.
14Bangsa Israel lit i teruh kuasa Eglon sepulu waluh tahun dekahna.
15Kenca bage erlebuh bangsa Israel ku TUHAN, emaka IberekenNa sekalak mbebasken bangsa e, eme sekalak si jaluk, Ehud gelarna. Ia anak si Gera, i bas suku Benyamin nari. Isuruh bangsa Israel Ehud ngembahken upeti man Eglon raja Moap.
16Nggo ibahan Ehud sada pedang dua babahna kira-kira setengah meter gedangna. Isilepkenna arah kemuhen i teruh bajuna.
17Kenca bage ibabana persembahen e man Eglon. Eglon eme sekalak si seh kal burna.
18Kenca nggo ibereken Ehud persembahen ndai, isuruhna mulih kalak si maba persembahen e.
19Tapi Ehud jine mulihken i batu si ipahat deher Gilgal nari ndahi Eglon, janah nina, "O Raja, lit tenah rahasia man bandu." Emaka iperentahken raja e suruh-suruhenna, "Lawes kena kerina ndarat!" Emaka ndarat kalak ndai kerina.
20Kenca bage, asum kundul raja e sisada i bas kamarna inganna cimalem-cimalem i datas, idahi Ehud ia nina, "Lit tenah i bas Dibata nari man bandu." Tedis raja e.
21Isintak Ehud pedangna si gantung arah kemuhen alu tanna si kawes, itebakkenna ku beltek raja ndai.
22Teldem kal ibahanna pedang e, ikut ras sukulna pe kerina, janah tabeh-tabehna nutupisa. La irintak Ehud pedang ndai i bas beltek raja nari, janah nduldul pedang e arah pudi, kelang-kelang nahena.
23Kenca bage ndarat Ehud, ipintuna pintun, ierukna,
24emaka lawes ia. Reh suruh-suruhen e, janah idahsa maka pintun e ieruk. Tapi iakap suruh-suruhen e raja sangana i kamar mandi.
25Ndekah sitik itimaina, tapi lalap la italangi raja. Emaka ibuatna kunci jenari italangina pintun e. Idapetina tuanna nggo mate terdang i lante.
26Tarunna tertima-tima, Ehud nggo ndauh lawes. Lawes ia mentasi batu-batu si ipahat e, emaka lompat ia ku Seirah.
27Kenca ia seh i deleng-deleng Eperaim e, iembusna terompet ngelebuh bangsa Israel ku peperangen. Ipinpinna bangsa e ngincuah i deleng-deleng e nari.
28Nina, "Ikutken aku! Nggo ibereken TUHAN kemenangen bandu ngelawan musuh-musuhndu, bangsa Moap e." Emaka ikutken bangsa e Ehud ngincuah janah ikuasaina ingan-ingan bangsa Moap ngepari Lau Jordan. Sekalak pe la ipelepasna ngepar.
29I bas wari e, lit ibunuh kalak enda kira-kira sepuluh ribu kalak tentera bangsa Moap si mbisana; la lit sekalak pe pulah.
30I bas wari si e bangsa Moap italuken bangsa Israel. Kenca bage dame negeri waluh tahun dekahna.
Samgar
31Peminpin kenca Ehud eme Samgar anak Anat. Ia pe ipulahina bangsa Israel alu munuh enem ratus kalak bangsa Pilisti alu sada ciken penggera lembu.