Dual Panel1Bangsa Israel bali kap ras permakan si mpermakani rarasen angin. Ntah pe bagi perburu ngayak-ngayak angin seh ben. Penipun ras perbahanen si rawa-rawa ertambah-tambah i tengah-tengahna. Erbahan perpadanen ia ras Assur, dingen ras Mesir erteman ia i bas perbinagan."
2Lit pengadun TUHAN kerna kalak Juda; Israel pe iukum nge erkiteken lagu langkah rayatna. Ibalasna me man bana sue ras perbahanenna.
3Jakup silawanen ras seninana Esau tupung i bas bertin denga; kenca Jakup nggo mbelin, erbebe ia ras Dibata.
4Rubat ia ras malekat, janah menang ia. Tangis ia dingen mindo pasu-pasu. I Betel reh Dibata njumpai nini-nininta Jakup janah ngerana ia man bana.
5Ia me kap TUHAN Dibata si Mada Kuasa, TUHAN eme kap GelarNa.
6Dage, o kesusuren Jakup, mulihkenlah kam kempak Dibatandu. Tetaplah kam i bas kekelengen si nteguh dingen adillah kam. Timai alu saber perbahanen Dibatandu.
Kata-kata ukumen
7Nina TUHAN, "Kalak Israel bali la bujurna ras kalak Kanaan; ngena kal atena nipu kalak alu timbangen palsu.
8Nina Israel, 'Aku nggo bayak,' nggo melala dat aku ertangku. Janah ise pe la banci ngaduken aku maka aku bayak arah dalan si la bujur."
9Tapi Aku, TUHAN Dibatandu si mabai kam ndarat i Mesir nari, Aku mahanca maka kam ringan ka pagi mulihi i bas kemah-kemah, bali ras tupung Aku reh ndahi kam i gurun pasir.
10"Ngerana Aku man nabi-nabi janah Kubereken man bana melala pengenehen, janah arah nabi-nabi e Kubereken persinget man bangsangKu.
11Amin bage pe berhala-berhala isembahna ka nge i Gileat; emaka kalak si nembahsa la banci la mate. Jenggi lembu ipersembahken i Gilgal; emaka batar-batar si i je jadi gun-gunen batu me pagi i bas juma-juma si nggo itenggalai."
12Nini-nininta Jakup nai arus lompat ku Mesopotami. I jah arus ia erdahin ras kalak mpermakani biri-biri lako ndatken sekalak ndehara.
13TUHAN nuruh sekalak nabi mulahi bangsa Israel i bas perbudaken nari i Mesir, janah nabi eme si mpermakanisa.
14Bangsa Israel nggo erbahanca maka ngilas kal iakap TUHAN; emaka patut nge ia mate erdandanken kejahatenna. Iukum TUHAN me bangsa e, sabap erdandanken ia maka megombang kalak man TUHAN.