Alkitab Mobile SABDA
[VER] : [KARO]     [PL]  [PB] 
 <<  Kejadian 40 >> 

Iterangken Jusup erti nipi kalak tabanen

1Lanai ndekahsa kenca si ndai, kalak si nikapken inemen raja Mesir ras kepala si ngaturken nakanna ersalah man raja e.

2Nembeh ate raja man pegawaina si dua kalak e,

3emaka ipenjarakenna kalak enda i rumah kepala penjara, eme i bas ingan Jusup ipenjaraken.

4Ndekah kalak enda tading i penjara, emaka iangkat kepala penjara e Jusup jadi pelayanna.

5I bas sada berngi, ernipi me si nikapken inemen ras kepala si ngaturken nakan e i bas penjara. Nipi kalak si dua e la seri antusenna.

6Pagina sanga erpagi-pagi idahi Jusup kalak enda. Idahna kalak enda lolah-lolah.

7Nungkun Jusup man bana nina, "Ngkai maka jutjut kal kam sendah?"

8Nina kalak ndai njabapsa, "Duana kami ernipi, tapi ise pe i jenda la lit si beluh ngantusisa." "Dibata nge si mereken kengasupen ngantusi nipi," nina Jusup. "Turiken lah man bangku nipindu e."

9Emaka nina sinikapken inemen raja, "I bas nipingku lit i lebe-lebengku sada batang anggur.

10Lit telu dahanna. Kenca reh bulungna, minter reh bungana, jenari buah anggur mulai tasak.

11Aku sangana ncikep calung ingan minem raja; emaka kubuati buah anggur e, kupereh ku bas calung ndai, kenca bage kubereken man raja."

12Nina Jusup, "Enda me antusenna: dahan si telu e, eme telu wari.

13Telu wari nari ipulahi raja me kam, iampunina kam, janah isuruhna kam mulih erdahin bagi si gelgel. Isikapkenndu ka denggo inemen raja bagi si gelgel e asum kam jadi si ngaturken inemenna.

14Tapi inget min aku kenca nggo sikap pagi sikerajangenndu. Kuarap arah perkuah atendu maka tersinget kam man raja keerna aku, janah sampati aku gelah ndarat i bas rumah tutupen enda nari.

15Sabap si tuhuna kal, iculik nge aku i taneh Heber nari, janah i Mesir enda pe labo lit perbahanenku si erbanca aku patut itamaken ku bas tutupen."

16Kenca ibegi kepala si ngaturken pangan, maka mehuli antusen nipi si ngaturken inemen, emaka nina man Jusup, "Aku pe ernipi. Aku sangana njujung telu raga roti.

17I bas raga si arah dasna kal lit erbage-bage pangan raja, tapi sangana denga kujujung ipangani perik-perik pangan e."

18Nina Jusup njabapsa, "Enda me ertina: raga si telu e, ertina telu wari.

19Telu wari nari ipulahi raja me kam gelah itampul kerahungndu! Kenca bage iolah-olahna badanndu i das tiang, emaka ipangani perik-perik dagingndu."

20Telu wari kenca si e sangana ulang tahun raja iundangna kerina pegawaina. Isuruhna gelah ipedarat singaturken pangan ras inemenna, jenari ibabana kalak si dua e ku lebe-lebe pegawai-pegawaina.

21Singaturken inemen e isuruhna mulihi ndahiken dahinna si gelgel,

22tapi itampulna kerahung kepala si ngaturken pangan e. Kerina e, payo jadi bagi si nggo ikataken Jusup.

23Amin bage gia la iinget si ngaturken inemen e si Jusup, sabap tuhu-tuhu lupa ia.


  Share Facebook  |  Share Twitter

 <<  Kejadian 40 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel