Dual PanelIpasu-pasu Jakup si Eperaim ras Manase
1Lanai ndekahsa nari kenca si e, iberitaken man Jusup maka sakit bapana. Erkiteken si e lawes ia ras duana anakna, Manase ras Eperaim ndahi Jakup.
2Kenca nggo ibegi Jakup maka anakna Jusup reh ngenen ia, ipala-palaina kundul i das ingan medemna.
3Nina Jakup man Jusup, "Dibata si Mada Kuasa nggo ncidahken BaNa man bangku i Lus i taneh Kanaan, janah ipasu-PasuNa aku.
4Nina man bangku, 'Aku merekenca bandu nterem anak, gelah alu bage kesusurenndu jadi melala bangsa; Aku mereken taneh enda man kesusurenndu jadi sikerajangenna seh rasa lalap.'"
5Tole nina Jakup, "Jusup, duana anakndu si tubuh i Mesir enda ope denga aku reh ku jenda, eme Eperaim ras Manase aku nge empuna. Duana ia bali ras anakku Ruben ras Simeon.
6Adi lit denga pe nterem anakndu, e lanai bo ia ikira sikerajangenku. Emaka tading-tadingen si ialokenna pagi rehna arah si Eperaim ras Manase nari.
7Si enda kulakoken erkiteken nandendu Rahel. Ceda kal ateku erkiteken kematenna i Kanaan, la ndauh i Eprata nari, sanga aku mulih i Mesopotami nari. Kukuburken ia i dalan ku Eprata." (Eprata eme Betlehem si genduari.)
8Kenca iidah Jakup anak-anak Jusup, isungkunna ia nina, "Ise anak-anak si dua enda?"
9Nina Jusup njabapsa, "Enda me anak-anakku si ibereken Dibata man bangku i Mesir enda." Nina Jakup, "Baba ku jenda gelah kupasu-pasu ia duana."
10Nggo merabun pengenen mata Jakup perban tuana, emaka lanai terang pengidahna. Ibaba Jusup anak e duana man Jakup, emaka idakep Jakup ras iemana duana.
11Nina Jakup man Jusup, "La kuarap banci denga kita jumpa. Genduari labo ngidah kam saja, tapi nggo ibereken Dibata pe kesempaten man bangku ngidah anakndu."
12Dungna iangkip Jusup anak-anak e i bas ampun Jakup nari, jenari erjimpuh ia i lebe-lebe bapana, ayona seh ku taneh.
13Itamaken Jusup si Eperaim arah kawes Jakup gelah Manase arah kemuhen.
14Tapi ipisimbel Jakup tanna, emaka iamparkenna tanna si kemuhen i babo takal Eperaim, aminna pe gia si Eperaim nge anak si nguda, janah tanna si kawes i babo takal Manase, eme sintua.
15Ipasu-pasuna kalak enda duana nina, "Dibata si isembah bapangku Abraham ras Isak, Dibata si nggo negu-negu aku seh wari enda!
16Dibata si nggo nuruh MalekatNa mulahi aku i bas kerina cilaka nari. Ialah si masu-masu kalak enda. Seh maka gelarku ras gelar bapangku Abraham ras Isak tetap nggeluh arah anak enda duana, melala anak ipupusna, kesusurenna pe jadi nterem."
17La mehuli iakap Jusup asum idahna itamaken bapana tanna si kemuhen ku babo takal Eperaim. Erkiteken si e itangkapna tan bapana, ipiserkenna i bas takal Eperaim nari ku takal Manase.
18Nina Jusup man bapana, "La payo bage, bapa. Enda kap sintua; tamaken tanndu si kemuhen ku babo takalna."
19La nggit bapana, janah nina, "Kuteh nge anakku, kuteh nge. Kesusuren Manase pe jadi sada bangsa si mbelin nge denggo. Tapi agina lebih mehaga asa ia, janah kesusurenna jadi bangsa-bangsa si mbelin pagi."
20Emaka ipasu-pasu Jakup ia duana i bas wari si ndai nina, "Adi masu-masu pagi kalak Israel ipakena gelarndu. Nina pagi, 'Bagi Eperaim ras bagi Manase lah kam pagi ibahan Dibata.'" Alu bage ipebelinken Jakup si Eperaim lebih asa Manase.
21Kenca bage nina Jakup man Jusup, "Bagi nggo idahndu jine, nandangi mate me aku. Tapi Dibata tetap nge nemani kam, janah IbabaiNa kam mulih ku negeri nini-ninindu.
22Man bandu nge kubereken taneh Sikem, labo man senina-seninandu. Taneh si mehumur e kubuat nai i bas kalak Amori nari alu pedang ras panahku."